Weigei che po iman ko poiboiyennyi
Ilaitoroi weigei, keljinet ak kaguiyet. Testai kalewenet komwa kole kiy ne ibooru meet ko ma meet: ne goochin kityo koeet mogornateet, ago ne yumji amitwogik kong'em. Karaarnateet ne ma tinyei ng'omnateet konyoorchi ng'olyoot ne ng'emisyei miising': kuureetap thahabu eng' serutap kiruget.
11 1Wechei Kwandanyo kerutik che dishon, ago weigei che po iman ko poiboiyennyi. 2Ngo konyo menoteet, konyo chotindo; ago mi ng'omnateet eng' che tenen muguleldo. 3Indoe lititindap piik che tonondos icheek, ago ng'emei mastaetap piik che po ibeetapkei icheek. 4Ma keljinet mogornateet eng' peetuutap nereeget, ago isaru imanda eng' meet. 5Yaei imandap piik che ititaat ortinwekwak kotonon, ago but ne ya eng' yaityennyi. 6Isaru imandap piik che tonondos icheek, ago kinam che po ibeetapkei eng' mageekwak. 7Ngomee chiito ne ya, kobet mang'unetanyi, ak koek kiy mang'unet ne iyani kimnateennyi. 8Kisaru ne po iman eng' nyalilda, ak konyo ne ya kotebee olennyi. 9Eng' kutinnyi ko ng'emei ne ma iywei Kamuktaindet chiitap kokwennyi, ago eng' ng'omnateet kisaru piik che po iman. 10Ngomye piik che po iman, kobaibai nganaseet, ak ngolustos piik che ya, komi iryagook che po boiboiyet. 11Eng' beruuretap piik che tonondos kieeti nganaseet, ago eng' kutitap piik che ya kiwong'u. 12Ne reenyei chiitap kokwennyi ko ma tinyei ng'omnateet, ago silem chiito ne tinyei utaatyet. 13Wendi chii ne mwaetaei koboorun tuguuk che nuunyinotiin, ago riibei chii ne tinyei muguleldo ne iyani ne nuunyinot. 14Ye ma mi ng'omnateet, kobut piik, ago eng' abuniik che ing'omita komi kaalyeet. 15Ne yachi kaarorunet toondet konyaliil iman, ago ne wechei namsetap eunek ko riiboot. 16Konyoor kwony ne tinyei rireenet teegisto, ak konyoor muren che ma tinyei rireenet mogornatosyek. 17Yachigei chii ne kinde ne myee, ago ibunjinegei chii ne koroom nyalilda. 18Konyoor ne ya poisyek che po koluet, ago konyoor ne miinei imanda poisyek che po iman. 19Ne kiimeen eng' imanda konyoor saboondo, ago ne isubi yaityet labat komeet. 20Wechei Kwandanyo piik che tinyei muguleldo ne mastaat, ago piik che ititaat ortinwekwak ko poiboiyennyi. 21Onai iman ole ma keunda ne ya, ago keunda lagogap piik che po iman. 22Ko uu ngoryeetap thahabu eng' seruutap oldo kwony ne karaaran ne ma tinyei ruchiinet. 23Mageetap piik che po iman ko ne myee kityo, ago mang'unetap piik che ya ko nereeget. 24Mi chii ne igoochi eng' aiyebindo, ago testai koeet mogornatennyi; ak mi age ne ng'aang'ei ne nyolu, ago koek kibanania. 25Chii ne tinyei aiyebindo koek mogoryo, ak ne imuunyi alak komuuny agine ineegei. 26Chubei piik ne ng'aang'ei paandek, ago kiberuuri ne alda. 27Ne cheeng'ei ne myee eng' kagiiletapkei cheeng'ei beruuret, ago ne isyachi yaityet, konyonjin yaityet. 28Age tugul ne iyani mogornatennyi kobut, ago tuneni piik che po iman ko uu susweek che nyalileen. 29Age tugul ne yachi koonnyi nyalilda kopunji koristo, ago koek chiito ne abusat otwogindetap chiito ne ng'oom muguleldo. 30Logoegap chiito ne po iman ko keetitap sabeet, ago age tugul ne isaru saboonwek ko ng'oom. 31Ngo repaik chiito ne po iman eng' ng'wony, ko siirei anyun ne ya ak kiptengekyot!