Laa 37

37 ¹Kashi kasābingwui vang na khalatta maningkharikalu; khangui ot kasābingli mayuishialu, ²kaja khawo thāda athumna thākta thenghaora, kala won thingra̱ thāda ngazanhaora.

³Ithumwui Avāli shitsanglu, kala khamathā ot sālu; ngaleili ngasopamda ningkatong chi lingsang sālu. ⁴Ithumwui Avāli ringphālu, chithākha ana nawui ningkachāng chi nali khamira.

⁵Nawui apong ithumwui Avāli mihaolu; ali shitsanglu, chithākha ana sāra. ⁶Ana nawui khamashung khangarong chi kahor thāda, kala nawui mashun chi ngashunung thāda horshokngasakra.

⁷Ithumwui Avā mangāli kasaikha pamlu, kala ali ning nganungkhung eina ngaraipamlu; awui shongfali ringpaira mi chiwui vang, makaphā khangarān sākasā mi chiwui vang na khalatta maningkharikalu.

⁸Malungvāt horlu, kala nawui malungkhavāt chihochaohaolu; na khalatta maningkharikalu; kaja chi china makaphāli maningla thānmi. ⁹Kaja kashi kasābing china katathaora, kha ithumwui Avāli kachihānabingna ngalei chi samphangra.

¹⁰Kasha̱kha leilaga, makhayā mi chi maleiluimara; nana awui pam chili munmeida yangakha, a apam chili maleiluimara. ¹¹Kha khanimabingna ngalei chi samphangra, kala chingri kahai mavātlakla ringphāra. ^a a v11 Jishuna hi ngashit kahai chi awui sokhami tamchithei chili khuirāhaira: "Khanimabing chi sokhamina, khikhalajila athumna okathui chi mathunkhuira" (Matthew 5:5).

¹²Makhayā mina khangaronga mili thikhavai ngarāna, kala ali ahā kachātmi; ¹³kha Proho Avāna ali mana̱ya, kaja ithumwui Avāna makhayā miwui atam rārā jikha theikhui.

¹⁴Kachāma kala khavātabingli konglui ngasak khavai, shongfa khangatara mibingli shaothat khavai makhayābingna raighai suta kala malā huna. ¹⁵Athumwui raighai chi athum khalattawui malungli kāpngarui utra, kala athumwui malā chi tekhaora.

¹⁶Makhayā kachungkhabingwui mataikasang chili lāngmeida khangaronga miwui kateokha chi phāmei; ¹⁷kaja makhayābingwui pangshap chi tekhaora, kha ithumwui Avāna khangarongabingli singkhāngmi.

¹⁸Ithumwui Avāna shātmakakābingwui atam thei, kala athumwui shimlui katang mavaila leichingra. ¹⁹Makaphā atamli athum mai mashi ngasakmara; chāmrei atamli athum ningyāng ungra.

²⁰Kha makaphā makhayā china shimānhaora, kala ithumwui Avāwui yangkashebing china seihomphung awonbing thāda thuihaora; meikhut thāda athum thuihaora.

²¹Makaphā mi china khuisāda maruna, kha khangaronga mina lumashan sāda mi. ²²Kaja ana somibing china ram samphangra, kha ana khonkashibing china katathaora.

²³Miwui pheikār chi ithumwui Avāna sakāmira, kala ithumwui Avā china miwui shongfali ningyāng unga; ²⁴ana phei ngaphoklala, kui khāngda mapitāmara, kaja ithumwui Avāna awui pāng singmi.

²⁵I yaron leisai, kala ara I kasar ngasāhaira, chithālala khangaronga horhaikahai, lah awui naongarā zāt pokahai ina matheimana. ²⁶Langpongda ana lumashan sāda kachishuta, kala awui naongarā sokhami ngasāra.

²⁷Makaphāwui eina pākhaida kaphā sālu, chieina na katang mavaila okthuira. ²⁸Kaja ithumwui Avāna mashun leishi kala awui katharabingli mahorhaimara; athum katang mavaila yangmira, kha makhayābingwui naotun china katathaora.

²⁹Khangarongbingna ram samphangra kala chiwuitungli katang mavaila okthuira.

³⁰Khangarongawui khamorna thangkhamei shoka, kala awui malena mashun tui matui. ³¹Awui Avāwui ningkhami china awui wuklungli lei; awui pheikār manganaithuimana.

³²Makhayā mi china khangaronga mili rimpamda kala ali shaothat khavai phai; ³³Kha ithumwui Avāna ali makhayāwui pāngli mahorsangmimara, lah bichar sā tharan ali yonngasak masāmara.

³⁴Ithumwui Avāli ngarailu, kala awui shongfa mayonlu, chieina ana nali ram samphang khavai masot ngasakra; makhayā katathaora tharan na yangra.

³⁵Ina makaphā makhayā, lukhamashan makatha mi akha, akhalatta ramli reisangra khamatek thingrong akha thāda akhalatta ngapānda leisai chi theihaira; ³⁶kha ana thuihaowa, kala kashuirak eina ana maleiluithuwa; ina ali khavā, kha ana masamphangthuwa.

³⁷Shāt makakā mili yanglu, kala mashungrik kahai mili mayonlu, kaja chingri kahai miwui vang naoda phākhavai lei. ³⁸Kha khayonkhamāngbing katonga sāshimānhaora; makhayābingwui naoda phākhavai chi katathaora.

³⁹Khangarongabingwui huikhami chi ithumwui Avāwui eina shoka; kakhanang atamli ana athumwui raipanna. ⁴⁰Ithumwui Avāna athumli ngachonmi kala kanshokmi; makhayābingwui eina ana athumli kanshokmi kala huimi, kaja athumna ali ngayinkhui.