Masalmo 37 FHB Father's Heart Bible™

37 ¹Lekani kunetseka thangwi ya anyakuphonya; lekani kuchitira njiru ale anacita pyakuipa, ²thangwi ninga uswa anadzauma mwakucimbiza, mbaninga pyakumera pyakubiriwira pinadzabvunda.

³Nyindirani Baba wathu mbamucita pyadidi; khalani m'dziko mbamulima kukhulupirika. ⁴Komerwani na Baba wathu, Iye anadzakupasani pifuno pya ntima wanu.

⁵Perekani njira yanu kuna Baba wathu; nyindirani Iye, Iye anadzacita. ⁶Iye anadzabweresa kulungama kwanu ninga ceza, na ulungami wanu ninga masikati.

⁷Khalani dzii pamaso pa Baba wathu mbamudikhira mwakupirira Iye; lekani kunetseka thangwi ya ule anaphindula m'njira mwace, thangwi ya mamuna anacita masasanyiro akuipa.

⁸Lekani ukali mbamusiya kuipirwa kwanu; lekani kunetseka—pisatsogolera basi ku pyakuipa. ⁹Thangwi anyakuphonya anadzagwandwa, mbwenye ale anadikhira Baba wathu anadzatambira dziko.

¹⁰Pisala n'dzidzi ung'ono, nyakuipa anadzakhala nkhabepo; maseze munyang'anise pa mbuto pace, iye nkhabe kudzakhalapo. ¹¹Mbwenye anyakupfatsa anadzatambira dziko mbakomerwa na ntendere ukulu. ^a a v11 Yezu asakwata pikiro ipi mu malongero ace a nkhombo: “Akomerwa ndi akupfatsa, thangwi iwo anadzatambira dziko” (Mateu 5:5).

¹²Nyakuipa asasanyira pyakuipa kuna wakulungama mbankweta mano ace; ¹³mbwenye Baba Wankulu asanseka, thangwi Baba wathu asaona kuti ntsiku ya nyakuipa iri kufika.

¹⁴Anyakuipa asasolola supada yawo mbagondamisa uta wawo toera kugwisa anyakutcerenga na anyakusauka, toera kupha ale ana njira yakulungama. ¹⁵Supada yawo inadzabaya mitima yawo yene, na mauta awo anadzagwandwa.

¹⁶Mphyadidi kukhala na ping'ono ninga wakulungama ¹⁷thangwi mphambvu za anyakuipa zinadzagwandwa, mbwenye Baba wathu asaphata anyakulungama.

¹⁸Baba wathu asadziwa ntsiku za anyakusowa mathangwi, unthaka wawo unadzakhala kwa muyaya. ¹⁹Iwo nkhabe kudzapaswa manyadzo mu midzidzi yakuipa; mu ntsiku za njala anadzakhuta.

²⁰Mbwenye anyakuipa anadzafa, na anyamalwa a Baba wathu anadzamala ninga maluwa a m'thando—ninga utsi anadzabuluka.

²¹Nyakuipa asabwereka mbakhonda kulipa, mbwenye wakulungama asabvera ntsisi mbapereka. ²²Thangwi ale adasimbwa na Iye anadzatambira dziko, mbwenye ale adatemberwa na Iye anadzagwandwa.

²³Miendo ya munthu isalimbiswa na Baba wathu, Baba wathu asakomerwa na njira ya munthu; ²⁴maseze agwegwedzeke, nkhabe kudzagwa pantsi, thangwi Baba wathu asamphata nkono wace.

²⁵Ndikhali mphale, cincino ndakhala nkhalamba, mbwenye nee ndaona wakulungama mbasiiwa peno anace mbaphemba cakudya. ²⁶Ntsiku zonsene iye asabvera ntsisi mbabwereketsa, na anace asakhala nkhombo.

²⁷Bulukani ku pyakuipa mbamucita pyadidi, penepo munadzakhala kwa muyaya. ²⁸Thangwi Baba wathu asafuna ulungami, nkhabe kudzasiya anyakukhulupirika ace; iwo anadzakoyiwa kwa muyaya, mbwenye mbeu ya anyakuipa inadzagwandwa.

²⁹Anyakulungama anadzatambira dziko mbakhala mwenemu kwa muyaya.

³⁰Mulomo wa wakulungama usalonga udziwi, na lirimi lace lisalonga ulungami. ³¹Pfundziso ya Baba wace iri muntima mwace; miendo yace nkhabe kuterentha.

³²Nyakuipa asabisalira wakulungama mbasaka kumupha; ³³mbwenye Baba wathu nkhabe kudzansiya m'manja mwace, nee kutawirisa kuti apaswe mulandu pakutongwa kwace.

³⁴Dikhirani Baba wathu mbamusunga njira yace, Iye anadzakukwezani toera kutambira dziko; munadzaona pakugwandwa kwa anyakuipa.

³⁵Ndaona munthu wakuipa, wankhanza, mbamwazika ninga muti wakubiriwira wa n'dziko mwace; ³⁶mbwenye iye apita, mwakucimbiza akhalapo tayu; ndansaka, mbwenye iye nee adagumanika.

³⁷Yang'anani wakusowa mathangwi mbamuona wakulungama, thangwi munthu wa ntendere ana ntsogolo. ³⁸Mbwenye anyakudawa anadzafudzwa onsene; ntsogolo wa anyakuipa unadzagwandwa.

³⁹Upulumuki wa anyakulungama usabuluka kuna Baba wathu; Iye ndi nsasa wawo mu n'dzidzi wa nyatwa. ⁴⁰Baba wathu asaaphedza mbaaombola iwo; asaaombola kuna anyakuipa mbaapulumusa, thangwi iwo asathawira kuna Iye.