Chifawui Eina Wungnaobingwui Tableli
Ngachāk chi hina: chiyakha kazingli kapama ithumwui Avāna khangachuk hi kathāda yangshapa? Khangahān chi ana kharong tharan kasā chi: kaphalak mili pungrok eina tukshokda wungnaobingli pamngasaka, kala naongarā makhalei preiva̱li naongarā kashang eina shim mia.
113 1Hallelujah! Ali sochikatlu, O ithumwui Avāwui raobing; ithumwui Avā mingli sochikatlu. 2Ithumwui Avā mingli arui eina thuida katang mavaila soranu. 3Zimik kashokwui eina thuida katun eina tangda, ithumwui Avā mingli sochikatranu. 4Ithumwui Avā miyur saikorawuitungli juimeikapa, awui tekhamatei kazingramwuitungli lei. 5Ithumwui Avā kathā khipā lei, kajuipamli kapama, 6ngahamzangda kazingram eina okathuili yangtāia? 7Chifawui eina ana kachāmali khāngkhui, hotlāwui eina khavātali khāngkhuida, 8athumli wungnaobing, awui mibingwui wungnaobing eina ngasoda pam ngasaka. 9Nao maleila sha̱naoli ana awui shimli naobingwui ava̱va̱ mathānthupva̱ sāda okthui ngasaka. Hallelujah!
