Uta na putulu kino na ndambo ya mesa ya bakonzi
Motuna ezali ndenge nini Tata na biso, afandi likolo boye, amonaka ata tii awa na se. Eyano ezali oyo asalaka awa akitaka: alongoli mobola na ebelo ya putulu mpo afanda elongo na bana ya mokonzi, mpe apesi mwasi oyo abotaka te ndako etonda na bana.
113 1Haleluya ! Bosanzola Ye, bino basaleli ya Tata na biso ; bosanzola kombo ya Tata na biso. 2Tika ete kombo ya Tata na biso epambolama, uta sik’oyo kino libela na libela. 3Uta na bobimi ya moi kino na kozwa na yango, esengeli kosanzola kombo ya Tata na biso. 4Tata na biso atomboki likolo ya bikolo nyonso, nkembo na Ye eleki likolo. 5Nani azali lokola Tata na biso, oyo avandi likolo na likolo, 6oyo akitaka na nse mpo na kotala likolo mpe mokili ? 7Ye atombolaka mobola uta na putulu mpe alongolaka moto oyo azali na bosenga uta na lokito ya putulu, 8mpo na kovandisa bango elongo na bakonzi, elongo na bakonzi ya bato na Ye. 9Ye avandisaka mwasi oyo abotaka te na ndako na ye, lokola mama ya bana oyo azali na esengo. Haleluya !
