Ithumwui Avāna Mosesli Hānga
Pharākhare saikora Ithumwui Avāwuisera, kala katei akha eina ngatangkhuira, kaja awui naomayara lākshokmi khavai Egyptwui pharākhare ana khuihaowa. Phanit kala pāngli kala khaveili leikhami khudam chi naongarāna ngahānglakha kahāngmi khavaina. Ana athumli lamhāngwui shongfa eina thānzata, athumwui mangāli muiyā kala meiwui pākra̱ eina zatta.
13 1Ithumwui Avāna Mosesli hānga,
2"Naochizai saikora ili tharchigatlu. Israelnaobingwui ngachaili naopam pharākhare saikora, mila sāla, iwuisera." a a v2 Ithumwui Avāna naochizai saikorali awui khalattawui sāda khangaso; hi khangaso chi Jishuli ungshung samphanga, Jishu chi ithumwui vang Avāna kamikahai naochizarana.
3Mosesna mibingli hānga, "Nathum narkahai shim, Egyptwui eina kashok zimiksho hi phaningunglu, kaja pangshapa pāng eina ithumwui Avāna apam hiwui eina nathumli thānshoka. Khawok kazang khamui mashaipaimana. 4Aja Abib kachāngli nathum shokra. 5Ithumwui Avāna navā ngarāli mira da ngashit kahai seina̱ eina khuira̱ khalong ngalei, Canaannaobing, Hitnaobing, Amornaobing, Hivnaobing, kala Jebusnaobingwui ngaleili nathumli thānakha, kachāng hili otsak hi mayonra. 6Shinithang nathumna khawok makazang khamui shaira, kala kashinethang ithumwui Avāli phanit sāra. 7Shinithang khawok makazang khamui shaira. Khawok kazang khamui nathumwui ngachaili matheipaimara, nathumwui thari saikorali khawok matheipaimara. 8Chithang nawui naomayarali hānglu, "Hi chi ina Egyptwui eina kashok tharan ithumwui Avāna iwui vang sākahaiwui vangna." 9Hi chi nawui vang nawui pāngli khudam kala nawui khaveilila mamalai khavai ngasāra, chithada ithumwui Avāwui ain nawui morchaili leira; kaja pangshapa pāng eina ithumwui Avāna nathumli Egyptwui eina thānshoka. 10Chiwui vang eina langchin sākahai atam chili, kum kachida nana shiyan hi mayonra.
11Ithumwui Avāna nathumli kala navā ngarāli ngashit kahai thāda, nathumli Canaannaobingwui ngaleili thānda chi nathumli mihaiakha, 12Naopam pharākhare saikora ithumwui Avāli phaishokra; nathumwui sha̱keiwui naochizai mayarnao saikora ithumwui Avāwui ngasāra. 13Gadhāwui naochizai saikora yaonao eina huira, kha mahuiakha, chiwui akahung sāthatra. Nawui naomayarabingwui naochizai saikora huira. 14Nawui naomayarana khaleilaga, "Hi khiwui kakhalatkhala?" da ngahānakha, ali hānglu, "Pangshapa pāng eina ithumwui Avāna ithumli narkahai shim, Egyptwui eina thānshoka. 15Pharaohna ngakaishida ithumli chihokhavā mamayāthuwa tharan, ithumwui Avāna Egyptli miwui naochizai eina thuilaga sāwui naochizai eina tangda naochizai saikora sāthata. Chiwui vang eina naopam pharākhare mayarnao saikora ina ithumwui Avāli chigatra, kha iwui naomayarawui naochizai saikora ina huira." 16Hi chi nawui pāngli khudam kala nawui khaveilila ngachai khavei ngasāra, kaja pangshapa pāng eina ithumwui Avāna ithumli Egyptwui eina thānshoka."
Yangmi Kahai Shongfa
17Pharaohna mibingli chihovā tharan, Philistine ngaleili ngareivā shongfa nganaihairalala, ithumwui Avāna chi eina athumli mathanvāthu; kaja ithumwui Avāna hānga, "Athumna rai theiakha, athumna ningateihaida Egyptli hanungpaishina."
18Chiwui vang eina ithumwui Avāna mibingli Red Sea tākhavai siwukwui shongfa eina kuizatngasaka. Israelnaobing raisāri shaksāda Egypt ngaleiwui eina shoka. b b v18 Hebrew tui: Yam Suf, "Long Shamadru."
19Mosesna Josephwui ara̱kui khui, kaja Josephna Israelwui naomayarabingli khangashit akha sāngasakta hānga, "Ithumwui Avāna kachangkhata nathumshong rāra, kala nathumna iwui ara̱kui hiwui eina nathumli ngasoda phungthuira." 20Succothwui eina athumna zatphoksa, lamhāng amarwui khaleili leiwui Ethamli rāmrah vasama. 21Kala ithumwui Avāna shongfa thānmi khavai ngashun muiyāwui pākra̱ eina athumwui mangāli zata, kala athumli hormi khavai ngayā meiwui pākra̱ eina zata; chieina athumna ngashun kala ngayāla zatthei ngasaka. 22Ngashun muiyāwui pākra̱, kala ngayā meiwui pākra̱ chi mibingwui mangāli awui pam eina khalattana mapākthuimana.
