ዘፀአት 13

13 ¹አባታችን ሙሴን እንዲህ አለው፤

²“በኵርን ሁሉ ለእኔ ቀድስ፤ በእስራኤላውያን መካከል ማሕፀንን ከፍቶ የሚወጣ የመጀመሪያ ሁሉ፣ ሰው ይሁን እንስሳ፣ የእኔ ነው።” ^a a v2 አባታችን በኵርን ሁሉ የራሱ አድርጎ ይጠይቃል፤ ይህም ጥያቄ አብ ስለ እኛ በሰጠን በኵር በሆነው በኢየሱስ ፍጻሜውን ያገኛል።

³ሙሴም ሕዝቡን እንዲህ አላቸው፤ “ከግብፅ፣ ከባርነት ቤት የወጣችሁበትን ይህን ቀን አስታውሱ፤ አባታችን በብርቱ እጅ ከዚህ ስፍራ አውጥቷችኋልና። በእርሾ የተሠራ እንጀራ አትብሉ። ⁴ዛሬ፣ በአቢብ ወር፣ ትወጣላችሁ። ⁵አባታችን ወተትና ማር ወደሚፈስባት፣ ለአባቶቻችሁ ሊሰጣችሁ ወደ ማለላት ምድር፣ ወደ ከነዓናውያን፣ ወደ ኬጢያውያን፣ ወደ አሞራውያን፣ ወደ ኤዊያውያንና ወደ ኢያቡሳውያን አገር ባገባችሁ ጊዜ፣ ይህን ሥርዐት በዚህ ወር ጠብቁ። ⁶ሰባት ቀን ያልቦካ እንጀራ ትበላላችሁ፤ በሰባተኛውም ቀን ለአባታችን በዓል ይሆናል። ⁷ያልቦካ እንጀራ ሰባቱን ቀን ብሉ፤ በመካከላችሁ የቦካ እንጀራ አይገኝ፤ በዳር ድንበራችሁ ሁሉ እርሾ አይገኝ። ⁸በዚያም ቀን ልጅህን፣ ‘ይህ ከግብፅ በወጣሁ ጊዜ አባታችን ስለ እኔ ባደረገልኝ ነገር ምክንያት ነው’ ብለህ ንገረው። ⁹ይህም በእጅህ ላይ ምልክት፣ በግንባርህም ላይ ማስታወሻ ይሆንልሃል፤ የአባታችን ትምህርት በአፍህ እንዲሆን፤ አባታችን በብርቱ እጅ ከግብፅ አውጥቶሃልና። ¹⁰ስለዚህ ይህን ሥርዐት በተወሰነለት ጊዜ ከዓመት ዓመት ጠብቅ።

¹¹አባታችን ላንተና ለአባቶችህ እንደ ማለላችሁ፣ ወደ ከነዓናውያን ምድር ባገባህና ለአንተ በሰጠህ ጊዜ፣ ¹²ማሕፀንን ከፍቶ የሚወጣውን ሁሉ ለአባታችን ለይ፤ የከብቶችህ በኵር ተባት ሁሉ የአባታችን ነው። ¹³የአህያ በኵር ሁሉ በበግ ተቤዠው፤ ባትቤዠው ግን አንገቱን ስበር። ከወንዶች ልጆችህ መካከል በኵርን ሁሉ ተቤዠው። ¹⁴ኋላም ልጅህ፣ ‘ይህ ምን ማለት ነው?’ ብሎ ሲጠይቅህ፣ እንዲህ ብለህ ንገረው፤ ‘አባታችን በብርቱ እጅ ከግብፅ፣ ከባርነት ቤት አወጣን። ¹⁵ፈርዖን እኛን ለመልቀቅ እልከኛ ሆኖ በእምቢታ በጸና ጊዜ፣ አባታችን በግብፅ ውስጥ ከሰው በኵር እስከ እንስሳ በኵር ድረስ፣ በኵር የሆነውን ሁሉ ገደለ። ስለዚህ እኔ ማሕፀንን ከፍቶ የሚወጣውን ተባት ሁሉ ለአባታችን እሠዋለሁ፤ የወንዶች ልጆችን በኵር ሁሉ ግን እቤዣለሁ።’” ¹⁶“ይህም በእጅህ ላይ ምልክት፣ በግንባርህም ላይ ማሰሪያ ይሆናል፤ አባታችን በብርቱ እጅ ከግብፅ አውጥቶናልና።”

ይበልጥ አስተማማኝ መንገድ

¹⁷ፈርዖን ሕዝቡን በለቀቀ ጊዜ፣ የፍልስጥኤማውያን ምድር መንገድ ቅርብ ቢሆንም እንኳ፣ አባታችን በዚያ መንገድ አልመራቸውም፤ አባታችን፣ “ሕዝቡ ጦርነት ቢገጥማቸው ሐሳባቸውን ለውጠው ወደ ግብፅ ይመለሱ ይሆናል” ብሎ ነበርና።

¹⁸ስለዚህ አባታችን ሕዝቡን በምድረ በዳ መንገድ ወደ ቀይ ባሕር አዙሮ መራቸው። እስራኤላውያንም ለጦርነት ተዘጋጅተው ከግብፅ ወጡ። ^b b v18 ዕብራይስጥ፦ ያም ሱፍ፣ “የሸምበቆ ባሕር”።

¹⁹ሙሴም የዮሴፍን አጥንቶች ወሰደ፤ ዮሴፍ የእስራኤልን ልጆች፣ “አባታችን በእርግጥ ይጐበኛችኋል፤ አጥንቶቼንም ከዚህ ከእናንተ ጋራ ይዛችሁ ታወጣላችሁ” ብሎ አምሎአቸው ነበርና። ²⁰ከሱኮት ተነሥተው በምድረ በዳ ዳር በምትገኘው በኤታም ሰፈሩ። ²¹አባታችንም መንገድ ይመራቸው ዘንድ በቀን በደመና ዓምድ፣ ያበራላቸው ዘንድም በሌሊት በእሳት ዓምድ ሆኖ ቀድሟቸው ይሄድ ነበር፤ ስለዚህ ቀንም ሌሊትም መጓዝ ይችሉ ነበር። ²²የቀኑ የደመና ዓምድና የሌሊቱ የእሳት ዓምድ ከሕዝቡ ፊት ከስፍራው ከቶ አልተለየም።