ዘኍልቍ 19

19 ¹አባታችን ሙሴንና አሮንን እንዲህ ብሎ ተናገራቸው፤

²አባታችን ያዘዘው የሕጉ ሥርዐት ይህ ነው፤ ነውር የሌለባት፣ እንከን የሌለባት፣ ከቶ ቀንበር ያልተጫነባት ቀይ ጊደር እንዲያመጡልህ እስራኤላውያንን ንገራቸው። ³ለካህኑ አልዓዛር ስጣት፤ ከሰፈሩ ውጭ ተወስዳ በፊቱ ትታረድ። ⁴ካህኑ አልዓዛር ጣቱን በደሟ ነክሮ ወደ መገናኛው ድንኳን ፊት ለፊት ሰባት ጊዜ ይረጭ። ⁵እርሱ እያየ ጊደሯ ትቃጠል፤ ቈዳዋ፣ ሥጋዋ፣ ደሟና ፈርሷ በአንድነት ይቃጠል። ⁶ካህኑ የዝግባ እንጨት፣ ሂሶጵና ቀይ ፈትል ወስዶ ጊደሯ በምትቃጠልበት እሳት ውስጥ ይጣል። ⁷ካህኑ ልብሱን ይጠብ፤ ሰውነቱንም በውሃ ይታጠብ፤ ከዚያም ወደ ሰፈሩ ይግባ፤ ነገር ግን እስከ ማታ ድረስ ርኩስ ሆኖ ይቈያል። ⁸ያቃጠላትም ሰው ልብሱን በውሃ ይጠብ፤ ሰውነቱንም በውሃ ይታጠብ፤ እስከ ማታም ድረስ ርኩስ ሆኖ ይቈያል።

⁹ንጹሕ የሆነ ሰው የጊደሯን ዐመድ ሰብስቦ ከሰፈሩ ውጭ ባለ ንጹሕ ስፍራ ያስቀምጠው። የእስራኤል ማኅበር ለማንጻት ውሃ እንዲሆን ያስቀምጡታል፤ ኀጢአትን ያስወግዳል። ¹⁰የጊደሯን ዐመድ የሰበሰበው ሰው ልብሱን ይጠብ፤ እስከ ማታም ድረስ ርኩስ ሆኖ ይቈያል። ይህም ለእስራኤላውያንና በመካከላቸው ለሚኖረው መጻተኛ የዘላለም ሥርዐት ይሆናል።

¹¹የማንኛውንም ሰው ሬሳ የነካ ሁሉ ሰባት ቀን ርኩስ ይሆናል። ¹²በሦስተኛውና በሰባተኛው ቀን በእርሱ ራሱን ያንጻ፤ ከዚያም ንጹሕ ይሆናል። በሦስተኛውና በሰባተኛው ቀን ራሱን ባያነጻ ግን ንጹሕ አይሆንም። ¹³ሬሳን፣ ማለት የሞተውን ሰው አካል ነክቶ ራሱን የማያነጻ ሁሉ የአባታችንን ማደሪያ ያረክሳል፤ ያም ሰው ከእስራኤል ተለይቶ ይጠፋል። የማንጻት ውሃ ስላልተረጨበት ርኩስ ሆኖ ይኖራል፤ ርኩሰቱም በእርሱ ላይ ይኖራል።

¹⁴ሕጉ ይህ ነው፤ ሰው በድንኳን ውስጥ ሲሞት፣ ወደ ድንኳኑ የሚገባ ሁሉና በውስጡ ያለ ሁሉ ሰባት ቀን ርኩስ ይሆናል። ¹⁵ክዳን ያልተጣበቀበት የተከፈተ ዕቃ ሁሉ ርኩስ ይሆናል።

¹⁶በሜዳ ላይ በሰይፍ የተገደለን፣ በሞቱ የሞተን፣ የሰውን ዐጥንት ወይም መቃብርን የነካ ሁሉ ሰባት ቀን ርኩስ ይሆናል።

¹⁷ለርኩሱ ሰው ከተቃጠለው የማንጻት መሥዋዕት ዐመድ ወስደው በዕቃ ውስጥ ይጨምሩ፤ በላዩም ንጹሕ የምንጭ ውሃ ይጨምሩ። ¹⁸ንጹሕ የሆነ ሰው ሂሶጵ ወስዶ በውሃው ውስጥ ነክሮ በድንኳኑ ላይ፣ በዕቃዎቹ ሁሉ ላይ፣ በዚያ በነበሩት ሰዎች ሁሉ ላይ፣ ዐጥንትን፣ የተገደለን ሰው፣ ሬሳን ወይም መቃብርን በነካው ሰው ላይ ይረጭ። ¹⁹ንጹሑ ሰው በሦስተኛውና በሰባተኛው ቀን ርኩሱን ይረጨው፤ በሰባተኛውም ቀን ያነጻዋል። ርኩሱም ልብሱን ይጠብ፤ በውሃ ይታጠብ፤ በማታም ንጹሕ ይሆናል። ²⁰ርኩስ ሆኖ ራሱን የማያነጻ ሰው የአባታችንን መቅደስ ስላረከሰ ከጉባኤው ተለይቶ ይጠፋ፤ የማንጻት ውሃ ስላልተረጨበት ርኩስ ነው። ²¹ለእነርሱም የዘላለም ሥርዐት ይህ ይሁን፤ የማንጻትን ውሃ የረጨ ሰው ልብሱን ይጠብ፤ የማንጻትን ውሃ የነካ ሰውም እስከ ማታ ድረስ ርኩስ ይሆናል። ²²ርኩሱ ሰው የሚነካው ሁሉ ርኩስ ይሆናል፤ ያንም የነካ ሰው እስከ ማታ ድረስ ርኩስ ይሆናል።