Esekiẹli 44

44 ¹Nígbà náà ni ó mú mi padà wá sí ẹnu-ọ̀nà òde ibi mímọ́ tí ó kọjú sí ìhà ìlà-oòrùn, ó sì ti tì. ²Ó sọ fún mi pé, “Ẹnu-ọ̀nà yìí yóò wà ní títì. A kò gbọdọ̀ ṣí i, kò sì sí ẹnikẹ́ni tí ó lè gbà á wọlé, nítorí Baba wa ti gbà á wọlé; nítorí náà yóò wà ní títì. ³Ọmọ-aládé nìkan—ọmọ-aládé fúnra rẹ̀—ni ó lè jókòó níbẹ̀ láti jẹ oúnjẹ níwájú Baba wa. Ó gbọdọ̀ gba gbọ̀ngàn àbáwọlé ẹnu-ọ̀nà náà wọlé, kí ó sì gba ọ̀nà kan náà jáde.”

⁴Nígbà náà ni ó mú mi gba ẹnu-ọ̀nà àríwá wá síwájú tẹ́mpìlì. Mo wò, ògo Baba wa sì kún ilé rẹ̀; mo sì dojúbolẹ̀.

⁵Baba wa sì sọ fún mi pé, “Ọmọ ènìyàn, fi ọkàn sí i, fi ojú rẹ wò kí o sì fi etí rẹ gbọ́ gbogbo ohun tí mo sọ fún ọ nípa àwọn ìlànà àti òfin ilé mi. Kíyèsí àbáwọlé tẹ́mpìlì àti gbogbo ọ̀nà àbájáde ibi mímọ́.”

⁶Sọ fún ilé ọlọ̀tẹ̀ Israẹli pé: Báyìí ni Baba Olódùmarè wí pé: “Ó tó gẹ́ẹ́ fún gbogbo ohun ìríra yín, ẹ̀yin ilé Israẹli! ⁷Ẹ mú àwọn àjèjì wọlé, àwọn tí kò kọ ilà ní ọkàn àti ní ara, láti wà nínú ibi mímọ́ mi, ní bíba ilé mi jẹ́, nígbà tí ẹ fi oúnjẹ mi, ọ̀rá, àti ẹ̀jẹ̀ rúbọ. Ẹ ba májẹ̀mú mi jẹ́ nípasẹ̀ gbogbo ohun ìríra yín. ⁸Ẹ kò tọ́jú àwọn ohun mímọ́ mi; ẹ fi àwọn ẹlòmíràn ṣe olórí ibi mímọ́ mi ní ipò yín. ⁹Báyìí ni Baba Olódùmarè wí pé: “Kò sí àjèjì kankan, ẹni líle-ọkàn tí kò sì kọ ilà ní ara, nínú gbogbo àwọn àjèjì tí ń gbé àárín àwọn ènìyàn Israẹli, tí ó lè wọ ibi mímọ́ mi.

¹⁰Ṣùgbọ́n àwọn ọmọ Lefi tí wọ́n lọ jìnnà sí mi nígbà tí Israẹli ṣìnà, tí wọ́n rìn kúrò lọ́dọ̀ mi láti tọ àwọn òrìṣà wọn lẹ́yìn, wọn yóò ru ẹ̀bi wọn. ¹¹Wọn yóò ṣiṣẹ́ nínú ibi mímọ́ mi, ní bíbojútó àwọn ẹnu-ọ̀nà tẹ́mpìlì àti ṣíṣe iṣẹ́ nínú rẹ̀. Wọn yóò pa ẹbọ sísun àti ẹbọ fún àwọn ènìyàn, wọn yóò sì dúró ní ìmúratán láti sìn wọ́n. ¹²Wọ́n sìn àwọn ènìyàn níwájú àwọn òrìṣà wọn, wọ́n sì mú Israẹli kọsẹ̀ sínú ẹ̀bi; nítorí náà mo búra sí wọn, ni Baba Olódùmarè wí, wọn yóò sì ru ẹ̀bi wọn. ¹³Wọn kì yóò súnmọ́ mi láti sìn mí gẹ́gẹ́ bí àlùfáà, bẹ́ẹ̀ ni wọn kì yóò sún mọ́ èyíkéyìí nínú àwọn ohun mímọ́ mi tàbí àwọn ohun mímọ́ jùlọ; wọn yóò ru ìtìjú àwọn ohun ìríra tí wọ́n ṣe. ¹⁴Síbẹ̀ èmi yóò yàn wọ́n láti bojútó tẹ́mpìlì, gbogbo iṣẹ́ rẹ̀ àti gbogbo ohun tí a ń ṣe nínú rẹ̀.

¹⁵Ṣùgbọ́n àwọn àlùfáà ọmọ Lefi, àwọn ọmọ Sadoku, tí wọ́n ṣọ́ ibi mímọ́ mi nígbà tí Israẹli ṣìnà kúrò lọ́dọ̀ mi—wọn yóò súnmọ́ mi láti sìn mí, wọn yóò dúró níwájú mi láti fi ọ̀rá àti ẹ̀jẹ̀ rú ẹbọ sí mi, ni Baba Olódùmarè wí. ¹⁶“Wọn yóò wọ ibi mímọ́ mi, wọn yóò súnmọ́ tábìlì mi láti ṣe iṣẹ́ ìránṣẹ́ sí mi, wọn yóò sì pa àwọn ohun tí mo béèrè mọ́.

¹⁷Nígbà tí wọ́n bá wọ àwọn ẹnu-ọ̀nà àgbàlá inú, wọ́n gbọdọ̀ wọ aṣọ ọ̀gbọ̀; kò gbọdọ̀ sí irun àgùntàn nígbà tí wọ́n bá ń ṣiṣẹ́ nínú àwọn ẹnu-ọ̀nà àgbàlá inú àti nínú rẹ̀. ¹⁸Wọ́n gbọdọ̀ wé láwàní ọ̀gbọ̀ ní orí wọn, kí wọ́n sì wọ aṣọ abẹ́ ọ̀gbọ̀ ní ẹ̀gbẹ́ wọn, wọn kì yóò wọ ohunkóhun tí ń mú kí wọn làágùn. ¹⁹Nígbà tí wọ́n bá jáde tọ àwọn ènìyàn lọ sí àgbàlá òde, wọ́n gbọdọ̀ bọ́ àwọn aṣọ tí wọ́n fi ṣiṣẹ́, kí wọ́n fi wọ́n sílẹ̀ nínú àwọn yàrá mímọ́, kí wọ́n sì wọ aṣọ mìíràn, kí wọ́n má baà fi aṣọ wọn ko ìwà mímọ́ ran àwọn ènìyàn.

²⁰Wọn kì yóò fá orí wọn tàbí jẹ́ kí irun wọn gùn; wọ́n gbọdọ̀ máa gé irun orí wọn kúkúrú. ²¹Kò sí àlùfáà kankan tí ó lè mu wáìnì nígbà tí ó bá wọ àgbàlá inú. ²²Wọn kì yóò fẹ́ opó tàbí obìnrin tí a ti kọ sílẹ̀, bí kò ṣe àwọn wúńdíá nínú ìran Israẹli nìkan, tàbí opó àlùfáà. ²³Wọ́n gbọdọ̀ kọ́ àwọn ènìyàn mi ní ìyàtọ̀ tí ó wà láàárín ohun mímọ́ àti ohun àìmọ́, kí wọ́n sì fi hàn wọ́n bí wọ́n ṣe lè mọ ohun eléèérí yàtọ̀ sí ohun tí ó mọ́.

²⁴Nínú aáwọ̀, wọ́n yóò ṣe ìdájọ́ gẹ́gẹ́ bí ìdájọ́ mi. Wọn yóò pa àwọn òfin mi àti àwọn ìlànà mi mọ́ ní gbogbo àwọn àjọ̀dún tí mo yàn, wọn yóò sì ya àwọn ọjọ́ Ìsinmi mi sí mímọ́.

²⁵Àlùfáà kì yóò sún mọ́ òkú láti sọ ara rẹ̀ di aláìmọ́; ṣùgbọ́n nítorí baba, ìyá, ọmọkùnrin, ọmọbìnrin, arákùnrin, tàbí arábìnrin tí kò tí ì lọ́kọ, ó lè ṣe bẹ́ẹ̀. ²⁶Lẹ́yìn ìwẹ̀nùmọ́ rẹ̀, wọn yóò ka ọjọ́ méje fún un. ²⁷Ní ọjọ́ tí ó bá wọ ibi mímọ́, àgbàlá inú, láti ṣiṣẹ́ níbẹ̀, yóò rú ẹbọ ẹ̀ṣẹ̀ rẹ̀, ni Baba Olódùmarè wí.

²⁸“Ogún wọn nìyí: Èmi ni ogún wọn. Ẹ má fún wọn ní ìní kankan ní Israẹli—Èmi ni ìní wọn. ²⁹Wọn yóò jẹ ẹbọ ọkà, ẹbọ ẹ̀ṣẹ̀, àti ẹbọ ẹ̀bi, gbogbo ohun tí a yà sọ́tọ̀ ní Israẹli yóò sì jẹ́ tiwọn. ³⁰Èyí tí ó dára jùlọ nínú gbogbo àkọ́so oríṣiríṣi, àti gbogbo ọrẹ tí ẹ bá mú wá, yóò jẹ́ ti àwọn àlùfáà. Ẹ fún àwọn àlùfáà ní àkọ́kọ́ nínú ìyẹ̀fun yín, kí ìbùkún lè bà lé ilé yín. ³¹Àwọn àlùfáà kì yóò jẹ ẹyẹ tàbí ẹranko kankan tí ó kú fúnra rẹ̀ tàbí tí ẹranko ìgbẹ́ pa.”