ሕዝቅኤል 44

44 ¹ከዚያም ወደ ምሥራቅ ወደሚመለከተው ወደ መቅደሱ የውጭ በር መለሰኝ፤ በሩም ተዘግቶ ነበር። ²እንዲህም አለኝ፤ “ይህ በር ተዘግቶ ይኖራል፤ አይከፈትም፤ ማንም ሰው በእርሱ አይገባም፤ አባታችን በእርሱ ገብቶበታልና፤ ስለዚህ ተዘግቶ ይኖራል። ³አለቃው — አለቃው ራሱ — በአባታችን ፊት እንጀራ ለመብላት በዚያ ይቀመጥ፤ በበሩ መመላለሻ አዳራሽ ይግባ፤ በዚያው መንገድም ይውጣ።”

⁴ከዚያም በሰሜኑ በር አድርጎ ወደ ቤተ መቅደሱ ፊት አመጣኝ። ተመለከትሁም፤ የአባታችን ክብር ቤቱን ሞልቶ ነበር፤ በግንባሬም ተደፋሁ።

⁵አባታችንም እንዲህ አለኝ፤ “የሰው ልጅ ሆይ፤ ስለ ቤቴ ሥርዐትና ሕግ የምነግርህን ሁሉ በጥንቃቄ አድምጥ፤ በዐይኖችህ ተመልከት፤ በጆሮዎችህም ስማ። የቤተ መቅደሱንም መግቢያና የመቅደሱን መውጫ ሁሉ ልብ በል።”

⁶ዐመፀኛውን የእስራኤልን ቤት እንዲህ በላቸው፤ ጌታ አባታችን እንዲህ ይላል፤ “የእስራኤል ቤት ሆይ፤ አስጸያፊ ሥራህ ሁሉ ይበቃህ!” ⁷በልባቸውና በሥጋቸው ያልተገረዙ መጻተኞችን በመቅደሴ እንዲኖሩ አስገባሃቸው፤ እንጀራዬን፣ ሥቡንና ደሙን ባቀረብህ ጊዜ ቤቴን አረከስህ። በአስጸያፊ ሥራህ ሁሉ ኪዳኔን አፈረስህ። ⁸የተቀደሱ ነገሮቼን አልጠበቅህም፤ በመቅደሴ ላይ በአንተ ፋንታ ሌሎችን ኀላፊ አደረግህ። ⁹ጌታ አባታችን እንዲህ ይላል፤ “በእስራኤል ሕዝብ መካከል ከሚኖሩ መጻተኞች ሁሉ፣ ልቡ የደነደነና በሥጋው ያልተገረዘ መጻተኛ ወደ መቅደሴ አይግባ።

¹⁰ነገር ግን እስራኤል በተሳሳተ ጊዜ ከእኔ የራቁ፣ ጣዖቶቻቸውን ተከትለው ከእኔ የተንከራተቱ ሌዋውያን በደላቸውን ይሸከማሉ። ¹¹በመቅደሴ ያገለግላሉ፤ የቤተ መቅደሱን በሮች ይጠብቃሉ፤ በውስጡም ያገለግላሉ። ለሕዝቡ የሚቃጠለውን መሥዋዕትና ሌላውን መሥዋዕት ያርዳሉ፤ ሊያገለግሏቸውም ተዘጋጅተው ይቆማሉ። ¹²በጣዖቶቻቸው ፊት ሕዝቡን አገለገሉ፤ እስራኤልንም ወደ በደል አሰናከሉ፤ ስለዚህ እጄን አንስቼ በእነርሱ ላይ ማልሁ፤ ይላል ጌታ አባታችን፤ በደላቸውንም ይሸከማሉ። ¹³ካህናት ሆነው ሊያገለግሉኝ ወደ እኔ አይቀርቡም፤ ወደ ተቀደሱ ነገሮቼ ወይም ወደ ቅድስተ ቅዱሳኑ አይጠጉም፤ ያደረጉትን አስጸያፊ ሥራ ነውር ይሸከማሉ። ¹⁴ይሁን እንጂ ቤተ መቅደሱን፣ አገልግሎቱንም ሁሉ፣ በውስጡም የሚደረገውን ሁሉ እንዲጠብቁ እሾማቸዋለሁ።

¹⁵ነገር ግን እስራኤል ከእኔ በተሳሳተ ጊዜ መቅደሴን የጠበቁ ሌዋውያን ካህናት፣ የሳዶቅ ልጆች — እነርሱ ሊያገለግሉኝ ይቀርባሉ፤ ሥቡንና ደሙን ሊያቀርቡልኝ በፊቴ ይቆማሉ፤ ይላል ጌታ አባታችን። ¹⁶“ወደ መቅደሴ ይገባሉ፤ ያገለግሉኝ ዘንድ ወደ ገበታዬ ይቀርባሉ፤ ትእዛዜንም ይጠብቃሉ።

¹⁷ወደ ውስጠኛው አደባባይ በሮች ሲገቡ የተልባ እግር ልብስ ይልበሱ፤ በውስጠኛው አደባባይ በሮችና በውስጥ ሲያገለግሉ የበግ ጠጕር ልብስ አይልበሱ። ¹⁸በራሳቸው ላይ የተልባ እግር ጥምጥም፣ በወገባቸውም የተልባ እግር የውስጥ ሱሪ ይልበሱ፤ ላብ የሚያመጣባቸውን ምንም ነገር አይልበሱ። ¹⁹ወደ ውጭኛው አደባባይ ወደ ሕዝቡ ሲወጡ ያገለገሉባቸውን ልብሶች አውልቀው በተቀደሱት ክፍሎች ያስቀምጧቸው፤ ሌሎች ልብሶችንም ይልበሱ፤ ይህም በልብሳቸው አማካይነት ቅድስናን ለሕዝቡ እንዳያስተላልፉ ነው።

²⁰ራሳቸውን አይላጩ፤ ጠጕራቸውንም አያስረዝሙ፤ ጠጕራቸውን ተከርክመው ይኑሩ። ²¹ማንም ካህን ወደ ውስጠኛው አደባባይ ሲገባ የወይን ጠጅ አይጠጣ። ²²መበለትን ወይም የተፋታችን ሴት አያግቡ፤ ነገር ግን ከእስራኤል ዘር የሆኑ ደናግልን ወይም የካህንን መበለት ያግቡ። ²³ሕዝቤን በቅዱሱና በተራው መካከል ያለውን ልዩነት ያስተምሩ፤ ርኵሱን ከንጹሑ እንዴት መለየት እንደሚገባም ያሳዩአቸው።

²⁴በክርክር ጊዜ በፍርዴ መሠረት ይፈርዳሉ። በተወሰኑ በዓላቴ ሁሉ ሕጎቼንና ሥርዐቴን ይጠብቃሉ፤ ሰንበቶቼንም ይቀድሳሉ።

²⁵ካህን ወደ ሬሳ ቀርቦ ራሱን አያርክስ፤ ነገር ግን ስለ አባቱ፣ ስለ እናቱ፣ ስለ ልጁ፣ ስለ ሴት ልጁ፣ ስለ ወንድሙ ወይም ስላላገባች እኅቱ ቢሆን ይፈቀድለታል። ²⁶ከነጻ በኋላ ሰባት ቀን ይቈጥሩለታል። ²⁷በዚያ ያገለግል ዘንድ ወደ ቅዱሱ ስፍራ፣ ወደ ውስጠኛው አደባባይ በሚገባበት ቀን የኀጢአቱን መሥዋዕት ያቀርባል፤ ይላል ጌታ አባታችን።

²⁸“ርስታቸው ይህ ነው፤ ርስታቸው እኔ ነኝ። በእስራኤል ጥሪት አትስጧቸው፤ ጥሪታቸው እኔ ነኝ። ²⁹የእህሉን፣ የኀጢአቱንና የበደሉን መሥዋዕት ይበላሉ፤ በእስራኤልም ለእግዚአብሔር የተለየ ሁሉ የእነርሱ ይሆናል። ³⁰የእያንዳንዱ ዐይነት በኵር ፍሬ ሁሉ ምርጡ፣ የምታቀርቡትም መባ ሁሉ ለካህናቱ ይሆናል። በረከትም በቤትህ ላይ እንዲያድር የመጀመሪያውን ሊጥህን ለካህናቱ ስጥ። ³¹ካህናት በራሱ የሞተን ወይም አውሬ የገደለውን ማንኛውንም ወፍ ወይም እንስሳ አይብሉ።”