Ngeyi Wumphekini Kikesa
Mukunga wa khunda kikuma kya kilumbu ku manima ma mfundusu. Musingu wisi vutula matondu kwena Tata wandi mu kyedika kikuma kya khabu yina yibaluki amana kikesa kyisa, amana wuzimbudi ni kasya mbundu amana kayukaku bweya. Mamba matekilwa mu kyesi, amana Siyoni wisi yimbila mukuma Watoma kenina bela-bela.
12 1Amana muna kilumbu kina wazímbula: «Yikukumisi ngeyi, Tata wama, mukuma tangwa wákala mu khabu kwena meni, khabu yaku yibaluki, amana wumbongidini kikesa. 2Tala, Tata wetu kenina luhulusu lwama; Yisya mbundu yama amana yiyúkaku bweya, mukuma Tata wama kenina ngolu zama yi mukunga wama; yandi wákituka luhulusu lwama.» 3Mu kyesi lwatekila mamba mu tho za luhulusu. 4Amana muna kilumbu kina lwazímbula: «Vutulakenu matondu kwena Tata wetu, tumbulakenu khumbu yandi, zayikisakenu mihangu myandi kwena bikanda byosu, samunenu ni khumbu yandi yitombulu. 5Yimbilakenu kwena Tata wetu, mukuma wáhanga mambu ma khembu; mana mazayakani muna tsi yosu. 6Thuta ndinga ya ngolu amana yimbila yi kyesi, ngeyi wisi zinga mu Siyoni, mukuma Watoma wa Kiseledi—Tata wetu—kenina mbuta mu kati dyaku.»
