Ị Kasịela M Obi
Abụ dị mkpụmkpụ maka ụbọchị na-esote ikpe. Onye na-abụ abụ ahụ na-ekele Nna ya nʼemeghị ọmarịcha maka iwe chigharịrị azụ na nkasi obi bịarutere, ma kwuo na ya ga-atụkwasị obi, ghara ịtụ egwu. A na-eji ọṅụ esere mmiri, Zayọn na-abụkwa abụ nʼihi na Onye Nsọ ahụ nọ nso.
12 1Nʼụbọchị ahụ, ị ga-asị: “Aga m eto gị, Nna m, nʼihi na ọ bụ ezie na i were iwe megide m, iwe gị alaghachiala azụ, ị kasịela m obi. 2Lee, Nna anyị bụ nzọpụta m; aga m atụkwasị obi ma ghara ịtụ egwu, nʼihi na Nna m bụ ike m na abụ m; ọ ghọọla nzọpụta m.” 3Unu ga-eji ọṅụ na-ekute mmiri site nʼolulu mmiri nke nzọpụta. 4Nʼụbọchị ahụ, unu ga-asị: “Keleenụ Nna anyị, kpọkuonụ aha ya, kọwaaranụ mmadụ niile ọrụ ya, kwusaanụ na aha ya dị elu. 5Bụkuoroonụ Nna anyị abụ, nʼihi na o meela ihe ndị dị ebube; ka e mee ka a mara nke a nʼụwa niile. 6Tie mkpu ike ma jiri ọṅụ bụọ abụ, gị onye bi na Zayọn, nʼihi na Onye Nsọ nke Izrel—Nna anyị—dị ukwuu nʼetiti gị.”
