ኣቦ ንፋሲካ ሓደሶ

ፋሲካ ኣብ በረኻ ተብዐለ፤ እቶም ሬሳ ብምንካእ ዝረኸሱ ሰባት ከዓ ብቐሊሉ ኣይተኸልከሉን — ኣቦና ድሕሪ ወርሒ ካልኣይ ምዱብ ጊዜ ሃቦም። እቲ ኣብ ልዕሊ ድንኳን ዘሎ ደመና ድማ ንጕዕዞ ይውስን፦ እስራኤል ንሱ ምስ ተልዓለ ጥራሕ ይጐዓዝን ይሰፍርን።

ምዕራፍ 9።

ኣቦና ኸዓ ካብ ግብፂ ምስ ወፁ ኣብ ካልኣይ ዓመት፥ ኣብ ቀዳመይቲ ወርሒ፥ ኣብ በረኻ ሲና ንሙሴ ከምዙይ ኢሉ ተዛረቦ፦

“ደቂ እስራኤል ፋሲካ በቲ ምዱብ ጊዜኡ የብዕል። ኣብ መበል ዓሰርተ ኣርባዕተ መዓልቲ ናይዛ ወርሒ እዚኣ፥ ክመሲ እንተሎ፥ በቲ ውሱን ጊዜኡ፥ ከም ኵሉ ሕግጋቱን ኵሉ ፍርድታቱን ኣብዕልዎ።”

ሙሴ ድማ ንደቂ እስራኤል ፋሲካ ኸብዕሉ ነገሮም። ከምቲ ኣቦና ንሙሴ ዝኣዘዞ፥ ኣብ በረኻ ሲና፥ ኣብ መበል ዓሰርተ ኣርባዕተ መዓልቲ ናይታ ቐዳመይቲ ወርሒ፥ ክመሲ እንተሎ፥ ፋሲካ ኣብዓሉ፤ ደቂ እስራኤል ድማ ከምኡ ገበሩ። ገሊኦም ሰባት ድማ ሬሳ ሰብ ብምንካእ ረኺሶም፥ በታ መዓልቲ እቲኣ ፋሲካ ኸብዕሉ ኣይከኣሉን፤ በታ መዓልቲ እቲኣ ኸዓ ኣብ ቅድሚ ሙሴን ኣሮንን መፁ። እቶም ሰባት ድማ “ንሕና ሬሳ ሰብ ብምንካእ ረኺስና ኣለና። ስለምንታይ ደኣ ኣብ ማእኸል ደቂ እስራኤል፥ ቍርባን ኣቦና በቲ ምዱብ ጊዜኡ ኻብ ምቕራብ ንኽልከል?” በልዎ።

ሙሴ ኸዓ “ኣቦና ብዛዕባ እዙይ እንታይ ከም ዝእዝዝ ክሳዕ ዝሰምዕ፥ ኣብዙይ ተፀበዩ” በሎም።

ኣቦና ኸዓ ንሙሴ ኸምዙይ ኢሉ ተዛረቦ፦

“ንደቂ እስራኤል ከምዙይ ኢልካ ንገሮም፦ ካባኻትኩም ወይ ካብ ዘርእኹም ሓደ ሰብ ሬሳ ብምንካእ እንተ ረኺሱ፥ ወይ ኣብ ርሑቕ መገዲ እንተ ኣልዩ፥ ንሱ ኸዓ ንኣቦና ፋሲካ የብዕል። ኣብ ካልኣይ ወርሒ፥ ኣብ መበል ዓሰርተ ኣርባዕተ መዓልቲ፥ ክመሲ እንተሎ፥ የብዕል፤ ብቕጫን ብመሪር ሓምልን ገይሮም ይብልዕዎ። ክሳዕ ንግሆ ኻብኡ ኣይተርፍ፤ ዓፅሚ ኻብኡ ኣይስበሩ፤ ከም ኵሉ ሕጊ ፋሲካ ድማ የብዕል። እቲ ንፁህ ዝኾነ፥ ኣብ መገዲ ዘይከደ ሰብ ግና፥ ፋሲካ እንተ ዘየብዓለ፥ ቍርባን ኣቦና በቲ ውሱን ጊዜኡ ኣየቕረበን እሞ፥ እቲ ሰብ እቲ ኻብ ህዝቡ ይቚረፅ፤ እቲ ሰብ እቲ ሓጢኣቱ ኽፆር እዩ። ^a

“ኣብ መንጎኹም ዝነብር ጓና ድማ ንኣቦና ፋሲካ ኸብዕል እንተ ደለየ፥ ከም ሕግን ፍርድን ፋሲካ ይግበር። ንጓናን ንወዲ ዓድን ሓደ ሕጊ ይኹን።”

እቲ ደመና መገዲ ይመርሕ

እቲ ድንኳን፥ ማለት ድንኳን ምስክር፥ ኣብ ዝተኸለሉ መዓልቲ፥ ነቲ ድንኳን ደመና ጐልበቦ፤ ካብ ምሸት ክሳዕ ንግሆ ኸዓ፥ ትርኢቱ ኣብ ልዕሊ እቲ ድንኳን ከም ሓዊ ነበረ። ኵልሻዕ ድማ ከምኡ ነበረ፤ እቲ ደመና ብመዓልቲ ይጐልቦ፥ ብለይቲ ኸዓ ትርኢት ሓዊ ይኸውን ነበረ። እቲ ደመና ካብ ልዕሊ እቲ ድንኳን ክለዓል እንተሎ፥ ደቂ እስራኤል ይጐዓዙ ነበሩ፤ እቲ ደመና ኣብ ዝዓረፈሉ ቦታ ኸዓ፥ ደቂ እስራኤል ይሰፍሩ ነበሩ። ደቂ እስራኤል ብትእዛዝ ኣቦና ይጐዓዙ፥ ብትእዛዝ ኣቦና ድማ ይሰፍሩ ነበሩ። እቲ ደመና ኣብ ልዕሊ እቲ ድንኳን ዝዓረፈሉ ዅሉ ጊዜ፥ ሰፊሮም ይፀንሑ ነበሩ። እቲ ደመና ኣብ ልዕሊ እቲ ድንኳን ብዙሕ መዓልቲ ምስ ፀንሐ፥ ደቂ እስራኤል ሓለዋ ኣቦና ይሕልዉ እምበር፥ ኣይጐዓዙን ነበሩ። ሓደ ሓደ ጊዜ ኸዓ፥ እቲ ደመና ኣብ ልዕሊ እቲ ማሕደር ቑሩብ መዓልቲ ጥራሕ ይፀንሕ ነበረ፤ ብትእዛዝ ኣቦና ይሰፍሩ፥ ብትእዛዝ ኣቦና ድማ ይጐዓዙ ነበሩ። ሓደ ሓደ ጊዜ ኸዓ፥ እቲ ደመና ካብ ምሸት ክሳዕ ንግሆ ይፀንሕ ነበረ፤ ንግሆ እቲ ደመና ምስ ተልዓለ ድማ ይነቕሉ ነበሩ። ብመዓልቲ ኾነ ብለይቲ፥ እቲ ደመና ምስ ተልዓለ፥ ይጐዓዙ ነበሩ። ክልተ መዓልቲ ኾነ ወርሒ ወይ ካብኡ ንላዕሊ፥ እቲ ደመና ኣብ ልዕሊ እቲ ድንኳን ክሳዕ ዝፀንሕ፥ ደቂ እስራኤል ሰፊሮም ይፀንሑ እምበር፥ ኣይጐዓዙን ነበሩ፤ ምስ ተልዓለ ኸዓ ይጐዓዙ ነበሩ። ብትእዛዝ ኣቦና ይሰፍሩ፥ ብትእዛዙ ድማ ይጐዓዙ ነበሩ። ከምቲ ኣቦና ብሙሴ ገይሩ ዝኣዘዞ፥ ሓለዋ ኣቦ ይሕልዉ ነበሩ።