Avāna Makānkhami Phanit Latluida Sāmi
Ramkasakli Lanphavai Kummei kumkhala, kala misi ruk shonghung matamna makathara vaora mihao khi thaokhavai maleiya — Ithumwui Avāna athumli kachang kha thili nichang kakhani pira. Chiwui thili tabernacle atamli leira sumkhavana lam khaothumra: Awui thangkhavai matamli theina Israelna thangkhala kala phungchanra.
9 1Athumna Egypt ngaleiwui eina shokta kakhane kum, kachāng khareli, Sinai lamhāngli leilakha ithumwui Avāna Mosesli hānga:
2"Israelwui mibingna makānkhami phanit chi atam chāda mayonra. 3Kachāng hiwui tharāda khamatethang, ngazin, chi atam chāda mayonra; chiwui shiyan saikora kala sharphahor saikora athishurda mayonra."
4Chithāda sāda Mosesna Israelwui mibingli makānkhami phanit mayonra da hāngchithei. 5Sinai lamhāngli, ithumwui Avāna Mosesli kaso kahai athishurda, athumna kachāng kharewui tharāda khamatethang, ngazin, makānkhami phanit mayona; chithāda sāda Israelwui mibingna sai. 6Mi kaikhana kathingun saza̱da sāmakhao kahaiwui vang chithang makānkhami phanit mayonshapmana; chieina athumna chithang Moses eina Aaronwui mangāli rai. 7Chi mibingna ali hānga, "Ithum kathingun saza̱da makhao kahaisera. Khisāda ithumna Israelwui mibingwui ngachaili atam chāda ithumwui Avāwui kachigat machigatshapmara?"
8Chieina Mosesna athumli hānga, "Hiwui maramli ithumwui Avāna khi kaso mira kaji ina mananglakha eina tangda hili honda leilu."
9Ithumwui Avāna Mosesli hānga,
10"Israelnaobingli hānglu, kachikathā nathum lah nathumwui naothotbing ngachaili khipākha kathingun saza̱da sāmakhao kahai leiakha, lah kharam katāvali vāda leiakha, ala ithumwui Avāli makānkhami phanit mayonpaira. 11Kachāng kakhanewui tharāda khamatethang, ngazin, chi mayonra, khawok makazang khamui kala khārisi kaje thingnā han eina ngasoda shaira. 12Chi khipākha ngathor eina tangda mahorhaimara, chiwui ara̱ akhala masātekmara, kala makānkhamiwui shiyan saikora athishurda mayonra. 13Kha mi akha kathar leida, kharam mavāla, chithākha makānkhami phanit mamayonakha, chi mipa chili awui mibingwui eina katathaora, khikhalajila ana atam chāda ithumwui Avāwui kachigat machigatmana; chi mipa awui moreiwui vang khayon khuira. a a v13 'awui mibingwui eina katathaora' kaji hi Israelwui kadhara mikhangarum ngachaili eina yaniyanda thānshok khavaiwui pongli kahāngna.
14"Kachikathā nathumli kha̱mi ngasokharā leida makānkhami phanit ithumwui Avāli mayonrumga jiakha, ana makānkhamiwui shiyan kala sharphahor athishurda mayonra. Kha̱mi vangla kala ngalei ramnao vangla shiyan akhamāng eina zatra."
Muiyāna Shongfa Thānmi
15Tabernacle, tuingashit oko kachonshim, chi sākā kahai zimiksho muiyāna chi khaluiphinhaowa; ngazin eina thuilaga ngathor eina tangda chi tabernacletungli mei thāda thei. 16Chithāda thangkachida leichinga: ngashun muiyāna chi khaluiphin, kala ngayā meiwui azak leichinga. 17Kachonshimtungwui eina muiyā lānkahai chitharan, Israelnaobingna zatphokchinga; kala muiyā apanhai apam kachida, Israelnaobingna rāmrah vasāpama. 18Ithumwui Avāwui kakaso athishurda Israelwui mibingna zatphoka; ithumwui Avāwui kakaso athishurda athumna rāmrah sāpama. Muiyā chi tabernacletungli ngasām chirankha, athumna rāmrah sāda pamserhaowa. 19Muiyā chi tabernacletungli atam kachungkha lingsangda, Israelnaobingna ithumwui Avāwui charfa mayonda mazatmana. 20Atam kaikhali muiyā chi pamkhavaitungli atam kateokha maningla tāpama: ithumwui Avāwui kakaso athishurda athumna rāmrah sāpama, ithumwui Avāwui kakaso athishurda athumna zatphoka. 21Atam kaikhali ngazin eina thuilaga ngathor eina tangda muiyā chi tāpama; ngathor muiyā lānkahai chitharan, athumna zatphoka. Ngashunla ngayāla, muiyā lānkahai chitharan, athumna zatphoka. 22Zimiksho khani, kachāng akha, lah atam kasāngkha, muiyā chi tabernacletungli tāpama chirankha, Israelnaobingna rāmrahli pamsera kala mazatmana; china lānkahai chitharan, athumna zatphoka. 23Ithumwui Avāwui kakaso athishurda athumna rāmrah sāpama; awui kakaso athishurda athumna zatphoka. Mosesli khamor eina ithumwui Avāwui kakaso athishurda athumna awui charfa mayona.
