Thaomeishong
Aaronna thaomei shini sākhuia, kala Levinaobingli tara̱ kaseida, sam samtan sāda, ithumwui Avāwui mangāli Israelwui kharinga kachigat thāda phaora—naochizaiwui mahut mikahai, mibingna kalāshāt maleila vāshungnanaipaikhavai. Athumwui otram chi kum maga̱da phangā eina hangphangā tangda.
8 1Ithumwui Avāna Mosesli hānga,
2"Aaronli hānglu: Nana thaomei chi runghai tharan, thaomei shini chi thaomeishongwui mangāli horvāra."
3Thaomeishongwui mangāshong horvā khavai awui thaomei chi runghaida, ithumwui Avāna Mosesli kaso kahai athishurda, Aaronna chithāda sai. 4Thaomeishongwui ot chi: shaokhui kahai sinā, athing eina awon peida shaokhuida sākhuina; ithumwui Avāna Mosesli chithei kahai athishurda tākam eina sai.
Ithumwui Avāwui Vang Tharchigat
5Ithumwui Avāna Mosesli hānga,
6"Israel mibingwui ngachaiwui eina Levinaobing khuilaga athumli tharmilu. 7Athumli tharmi khavai hithāda sālu: athumwuitungli tharkahai tara̱ yikrorlu, athumwui phasā saikorali kuisighai parlu, athumwui kachon ngasa̱ra, kala tharhaora. a a v7 Tharkahai tara̱ hi Levinaobing tharchigatli singkhavai tharmi kahai tara̱ ayur akhana, athumli ithumwui Avāwui mangāli otram ngatha̱ khavai tharngasakhaira da chithei khavaina. 8Athumna seishangwui eina mukvānao akha khuiranu, chiwui tharāzāt kachigat chi thao eina manāt kahai manaktak kahai mathirna, kala nana suihamchigatwui vang seishangwui eina mukvānao kakhane khuira. 9Levinaobing chi kazip khavai kachonshimwui mangāli khuirāra, kala Israel mibingwui yarui ashangva̱ katonga chi kazipkhuilu. 10Nana Levinaobing chi iwui mangāli khuirā tharan, Israelnaobingna Levinaobingwui tungli pāng parra, 11Aaronna Levinaobing chi iwui mangāli khayitta khayitchigat sāra, Israelnaobingwui eina kachigat, iwui otram ngatha̱ khavaina. 12Levinaobingna mukvābingwui kuitungli pāng parra; Levinaobingwui vang pheomi khavai, akha suihamchigatwui vang, akha rikkatā kachigatwui vang ili chigatra. 13Levinaobing chi Aaron eina anaomayarabingwui mangāli haira, kala athum chi iwui mangāli khayitchigat sāda chigatra. 14Israel mibingwui ngachaiwui eina Levinaobing chi ngateida pamlu; Levinaobing iwui ngasāra. 15Chiwui thili nana athumli tharmida khayitchigat sākahai tharan, Levinaobingna kazip khavai kachonshimli otram ngatha̱ khavai zangra. 16Kaja athum chi Israelnaobingwui ngachaiwui eina ili katonga horsangmi kahaina, Israelnaobing saikorawui naochizai, awukwui eina shokkhare saikorawui mahut ina athumli ikhalattawui vang khui kahaina. 17Israelwui naochizai saikora, mila, sha̱keila, iwui ngasāra; Egyptwui naochizai saikora ina shaothatserhaithang, ina ikhalattawui vang tharchigat kahaina. 18Kala ina Israel mibingwui naochizai saikorawui mahut sāda Levibingli phaishok kahaina. 19Ina Levibing chi Aaron kala anaomayarabingli, Israel mibingwui eina lemmet sāda, mihaira; athumna Israel mibingwui vang kazip khavai kachonshimli otram ngatha̱ra, kala Israel mibingwui vang pheomira; chieina Israel mibingna katharapamli vāshungnanai tharan Israel mibingtungli kalāshāt mashokmara."
20Moses eina Aaron kala Israel yarui ashangva̱ katongana, ithumwui Avāna Levibingwui vang Mosesli kakaso saikora tākam eina Levibingli sai; Israel mibingna athumli chithāda sai. 21Levibingna athum khalatta moreiwui eina tharkhuiya, athumwui kachon ngasa̱sera; kala Aaronna athumli ithumwui Avāwui mangāli khayitchigat sai, athumli tharmi khavai athumwui vang pheomi. 22Chiwui thili Levibingna Aaron kala anaomayarabingwui mangāli kazip khavai kachonshimli otram ngatha̱ khavai rāhaira; ithumwui Avāna Mosesli kakaso athishurda athumna Levibingli sai.
23Ithumwui Avāna Mosesli hānga:
24"Hi Levibingwui vang zatra: zingkum maga̱da phangā eina thuilaga, athumna kazip khavai kachonshimwui otram khangatha̱li ot sākhavai zangra. 25Kala zingkum hangphangāwui eina athumna otram khangatha̱ ot eina ngasāmphalungra, kala otram mangatha̱luimara. 26Athumna kazip khavai kachonshimli khamayon eina achinā ngarāli ngachonmira, kha ot masāpaimara. Hithāda nana Levibingli athumwui otpam chi phungmira."
