Wanthung Denshang
Aronei wanthung pemnyet jikkei, hoba Levibü shuong kho dei wenan, mang shuan apan, hoba Israel ka kubü lembü lang tegü seneibü Bou thedanga ik shangetkei—shaang bukbü aenei kukei, aishanga mütshuong shedsikhau akuko nyangko loulabü. Haoeneibü khangenbü kho po 25 ka 50 sühko ki.
8 1Seneibü Bouei Mosa to laukei,
2“Aron to lenashi, ladang nyi wanthung jiklaje, wanthung pemnyet wanthung denshang thea ngesaklabü.”
3Aronei khei tegü kümbei; wanthung denshang thea ngesakla shanga haoei khübü wan sakkei. Kho seneibü Bouei Mosa la sakkubü tegü kikei. 4Wanthung denshangeibü kümsilei kho: hama honei jangan yentibü, chungthem ka chipen shongko jangan yentibü kikei; seneibü Bouei Mosa la dangbü tegütham khei kümbei.
Seneibü Bou Shanga Banbü
5Seneibü Bouei Mosa to laukei,
6“Israel shousi shuong yo ka Levi shuong sungashi, hoba haoen saüenkushi. 7Haoen saüenla shanga, ho kümashi: saüenbü dei haoen to wenan jinkushi, hoba khujinei haoeneibü mang lolo shuan apkushi, hoba haoeneibü neisimei sakkushi, hoba saüenan kishi. a a v7 Saüenbü dei kho Levi shuong banbü ka hübübü lenbü saüenkubü dei che kikei; Seneibü Bou thedanga khangenla shanga haoen saüenan kibü dogo hapanbü kikei. 8Haoenei masu shuong yo ka masu paangshou che sungbajan, khoeibü shausiyung lembü shanga wen inyaibü onang to kheiyoan; hoba shabü lembü shanga masu shuong yo ka masu paangshou nyiboubü che nyi sungbajan. 9Levi shuong kamshang neichem thedanga leijung louashi, hoba Israel shousi shuong mütshang pendou liko yoshaitiashi. 10Ladang nyi Levi shuong ngo thedanga phokulaje, Israel shousi shuongei Levi shuong to haoeneibü ik shangetjan, 11Aronei Levi shuong kho, Israel shousi shuong ka kubü soueibü lembü shanga, ngo khangenla shanga ngo thedanga soueitijan. 12Levi shuongei masu khua to haoeneibü ik shangetjan; Levi shuong shanga saumei saütila shanga, che kho shabü lembü shanga hoba che kho juokbü lembü shanga ngo la lemjan. 13Levi shuong Aron hoba haoeibü shousi shuong thedanga phokushi, hoba haoen ngo thedanga soueibü lembü shanga soueitijan. 14Israel shousi shuong yo ka Levi shuong bangashi; Levi shuong ngeibü kilabü. 15Nyi haoen saüenan soueibü lembü shanga soueitikei phaia, kheijinei Levi shuong kamshang neichem khangenla atlabü. 16Aishanga haoen Israel shousi shuong yo ka ngo la khümbo kubü ki; na ipan shaang hapbü pendou jeiko, khei Israel shousi shuong pendou shaang bukbü jeiko, ngei haoen kü shanga sungkei. 17Israel shaang bukbü pendou, mütkei meisiaukei, ngeibü ki; Ngei Ijep kaoa shaang bukbü pendou ngümbü chaloua, ngei haoen küla saüenkukei. 18Hobaje ngei Israel shousi yoa shaang bukbü pendou jeiko Levi shuong lekei. 19Ngei Aron si haoeibü shousi la Levibü kukei, khei Israel shousi shuong ka jongsak che; haoenei kamshang neichema Israel shousi shuong khangenlabü hoba Israel shousi shuong shanga shabü dela saumei saülabü, khonei Israel shousi shuong lemshang nyangko loujinei haoen thüka lim alotlabü.”
20Hobaje Mosa, Aron hoba Israel shousi shuong pendouei Levi shuong shanga seneibü Bouei Mosa la Levi shuong shangabü sakkubü tegü pendou kümbei; Israel shousi shuongei haoen shanga khei kümbei. 21Hobaje Levi shuongei shabü ka hinseian kikei, hoba haoeneibü neisimei sakkei; hoba Aronei seneibü Bou thedanga soueibü lembü shanga haoen soueitikei, hoba haoen saüenla shanga haoen shanga shabü dela saumei saükei. 22Kho phaia Levi shuong Aron si haoeibü shousi shuong thedanga kamshang neichema khangenla louan atkei; seneibü Bouei Mosa la sakkubü tegü haoenei Levi shuong shanga kümbei.
23seneibü Bouei Mosa to laukei,
24“Ho Levi shuong shangabü ki: po 25 ka thükae, haoen kamshang neichema kümlaleila kümtoleito atlabü. 25Po anjinsem ka thükae haoenei kümsilei khangenbü ka ngailabü, hoba touje akhangenlabü. 26Haoenei kamshang neichema haoeneibü jaisinasi shuong to loan chühko thuilabü, lausikei kümsilei aikei akümlabü. Kho tegü kanei Levi shuong la haoeneibü kümsilei nangan phokuashi.”
