Numeri 9

9 ¹Baba wa sọ̀rọ̀ sí Mose ní aginjù Sinai, ní oṣù kìíní ọdún kejì lẹ́yìn tí wọ́n jáde kúrò ní Ejibiti, pé:

²“Jẹ́ kí àwọn ọmọ Israẹli pa Àjọ̀dún Ìrékọjá mọ́ ní àkókò tí a yàn fún un. ³Ní ọjọ́ kẹrìnlá oṣù yìí, ní àṣálẹ́, ẹ ṣe é ní àkókò tí a yàn fún un, gẹ́gẹ́ bí gbogbo ìlànà rẹ̀ àti gbogbo òfin rẹ̀.”

⁴Nítorí náà Mose sọ fún àwọn ọmọ Israẹli pé kí wọ́n pa Àjọ̀dún Ìrékọjá mọ́. ⁵Ní aginjù Sinai, wọ́n pa Àjọ̀dún Ìrékọjá mọ́ ní ọjọ́ kẹrìnlá oṣù kìíní, ní àṣálẹ́, gẹ́gẹ́ bí Baba wa ti pàṣẹ fún Mose; bẹ́ẹ̀ ni àwọn ọmọ Israẹli ṣe. ⁶Àwọn ọkùnrin kan sì wà tí wọn kò mọ́ nítorí tí wọ́n fọwọ́ kan òkú, wọn kò sì lè ṣe Àjọ̀dún Ìrékọjá ní ọjọ́ náà, nítorí náà wọ́n wá síwájú Mose àti Aaroni ní ọjọ́ náà. ⁷Àwọn ọkùnrin náà sì wí fún un pé, “Àwa kò mọ́ nítorí òkú. Èéṣe tí a ó fi dí wa lọ́wọ́ láti mú ọrẹ Baba wa wá ní àkókò tí a yàn fún un láàrín àwọn ọmọ Israẹli?”

⁸Mose sì wí fún wọn pé, “Ẹ dúró níhìn-ín títí èmi ó fi gbọ́ ohun tí Baba wa yóò pàṣẹ nípa èyí.”

⁹Baba wa sì sọ̀rọ̀ sí Mose pé,

¹⁰“Sọ fún àwọn ọmọ Israẹli pé: bí ẹnikẹ́ni nínú yín tàbí nínú àwọn ìran yín bá jẹ́ aláìmọ́ nítorí òkú, tàbí tí ó bá wà ní ìrìnàjò jíjìn, ó ṣì lè pa Àjọ̀dún Ìrékọjá mọ́ sí Baba wa. ¹¹Ní oṣù kejì, ní ọjọ́ kẹrìnlá, ní àṣálẹ́, wọ́n gbọ́dọ̀ pa á mọ́, kí wọ́n máa fi àkàrà aláìwú àti ewébẹ̀ kíkorò jẹ ẹ́. ¹²Wọn kò gbọ́dọ̀ fi nǹkan kan nínú rẹ̀ sílẹ̀ di òwúrọ̀, wọn kò sì gbọ́dọ̀ ṣẹ́ egungun kankan nínú rẹ̀, wọ́n sì gbọ́dọ̀ pa á mọ́ gẹ́gẹ́ bí gbogbo ìlànà Àjọ̀dún Ìrékọjá. ¹³Ṣùgbọ́n bí ọkùnrin kan bá mọ́, tí kò sì wà ní ìrìnàjò, síbẹ̀ tí kò pa Àjọ̀dún Ìrékọjá mọ́, a ó ké ẹni náà kúrò láàrín àwọn ènìyàn rẹ̀, nítorí tí kò mú ọrẹ Baba wa wá ní àkókò tí a yàn fún un; ọkùnrin náà yóò ru ẹ̀ṣẹ̀ rẹ̀. ^a a v13 Kí a “ké ẹni kan kúrò láàrín àwọn ènìyàn rẹ̀” túmọ̀ sí yíyọ òun kúrò ní gbangba nínú àwùjọ májẹ̀mú Israẹli.

¹⁴“Bí àlejò tí ń gbé láàrín yín bá fẹ́ pa Àjọ̀dún Ìrékọjá mọ́ sí Baba wa, ó gbọ́dọ̀ tẹ̀lé ìlànà àti òfin Àjọ̀dún Ìrékọjá. Ìlànà kan náà ni yóò wà fún àlejò àti ọmọ ìbílẹ̀ bákan náà.”

Ìkùùkuu Náà Ń Tọ́ Ọ̀nà

¹⁵Ní ọjọ́ tí a gbé àgọ́ náà kalẹ̀—àgọ́ ẹ̀rí náà—ìkùùkuu bò ó; láti ìrọ̀lẹ́ títí di òwúrọ̀ ó dàbí iná lórí àgọ́ náà. ¹⁶Bẹ́ẹ̀ ni ó sì rí nígbà gbogbo: ìkùùkuu bò ó ní ọ̀sán, àti ìrísí iná ní òru. ¹⁷Nígbàkigbà tí ìkùùkuu bá gòkè kúrò lórí àgọ́ náà, àwọn ọmọ Israẹli a dìde kúrò; ibikíbi tí ó bá sì bà sí, níbẹ̀ ni àwọn ọmọ Israẹli pa àgọ́ sí. ¹⁸Nípa àṣẹ Baba wa ni àwọn ọmọ Israẹli dìde kúrò; nípa àṣẹ Baba wa ni wọ́n sì pa àgọ́ sí. Níwọ̀n ìgbà tí ìkùùkuu bá dúró lórí àgọ́ náà, wọ́n a dúró ní ibùdó. ¹⁹Nígbà tí ìkùùkuu bá dúró pẹ́ lórí àgọ́ náà fún ọjọ́ púpọ̀, àwọn ọmọ Israẹli a pa àṣẹ Baba wa mọ́, wọn kò sì ní dìde kúrò. ²⁰Nígbà mìíràn ìkùùkuu a dúró lórí àgọ́ náà fún ọjọ́ díẹ̀ péré: nípa àṣẹ Baba wa ni wọ́n pa àgọ́ sí, nípa àṣẹ Baba wa ni wọ́n sì dìde kúrò. ²¹Nígbà mìíràn ìkùùkuu a dúró láti ìrọ̀lẹ́ títí di òwúrọ̀; nígbà tí ó bá gòkè ní òwúrọ̀, wọ́n a dìde kúrò. Yálà ní ọ̀sán tàbí ní òru, nígbà tí ìkùùkuu bá gòkè, wọ́n a dìde kúrò. ²²Yálà ọjọ́ méjì, oṣù kan, tàbí jù bẹ́ẹ̀ lọ, níwọ̀n ìgbà tí ìkùùkuu bá wà lórí àgọ́ náà, àwọn ọmọ Israẹli a dúró ní ibùdó, wọn kò sì ní dìde kúrò; nígbà tí ó bá gòkè, wọ́n a dìde kúrò. ²³Nípa àṣẹ Baba wa ni wọ́n pa àgọ́ sí; nípa àṣẹ rẹ̀ ni wọ́n sì dìde kúrò. Wọ́n pa àṣẹ rẹ̀ mọ́, nípa àṣẹ Baba wa láti ọwọ́ Mose.