ሕዝቅኤል 22 FHB Father's Heart Bible™

22 ¹ቃል ኣቦና ኸዓ ናባይ መፀ፦

²ንስኻ ኸዓ ኣታ ወዲ ሰብ፥ ክትፈርድዶ ኢኻ? ነታ ናይ ደም ኸተማ ክትፈርደላዶ ኢኻ? እምበኣር ኵሉ ፅያፋ ኣፍልጣ። ³ከምዙይ በል፦ ጐይታ ኣቦ ከምዙይ ይብል ኣሎ፦ ኣቲ ኣብ ውሽጥኺ ደም እትኽዒ፥ ጊዜኺ ኸዓ ዝመፅአ ኸተማ፥ ንነብስኺ ጣዖታት ጌርኪ ኸዓ ረኺስኪ። ⁴በቲ ዘፍሰስክዮ ደም በዲልኪ፤ በቲ ዝገበርክዮም ጣዖታት ከዓ ረኺስኪ። ፍፃመኺ ኣቕሪብኪ፥ ናብ መወዳእታ ዓመታትኪ በፂሕኪ። ስለዙይ ንኣህዛብ መፀረፊ፥ ንዅሉ ሃገር ከዓ ባጫ ክገብረኪ እየ። ⁵እቶም ናባኺ ዝቐረቡን ካባኺ ዝረሓቑን፥ ኣቲ ርኽስቲ ስም ዘለኺ፥ ዕግርግር ዝመልኣኪ ኸተማ፥ ክላገፁልኪ እዮም።

⁶እንሆ፥ ነፍሲ ወከፍ መስፍን እስራኤል ኣባኺ ኾይኑ ደም ንምፍሳስ ስልጣኑ ይጥቀም ኣሎ። ⁷ኣባኺ ንኣቦን ኣደን ነዓቑ፤ ኣባኺ ንስደተኛ ገፍዑ፤ ኣባኺ ንደኽታምን መበለትን በደሉ። ⁸ንቅዱሳት ነገረይ ነዓቕኪ፥ ሰናብተይ ከዓ ኣርከስኪ። ⁹ኣባኺ ደም ንምፍሳስ ዝህቅኑ ሓመይቲ ኣለዉ፤ ኣባኺ ኣብ ኣኽራን ዝበልዑን ኣብ ማእኸልኪ ነውሪ ዝገብሩን ኣለዉ። ¹⁰ኣባኺ ምስ ኣንስቲ ኣቦታቶም ይድቅሱ፤ ኣባኺ ነተን ብእዋን ርኽሰት ፅገአን ዘለዋ ኣንስቲ ኣነወሩወን። ¹¹ሓደ ምስ ሰበይቲ ብፃዩ ፅያፍ ይገብር፤ ካልእ ንሰበይቲ ወዱ ብነውሪ የርክሳ፤ ካልእ ከዓ ንሓብቱ፥ ጓል ኣቦኡ፥ ይዕምፃ። ¹²ኣባኺ ደም ንምፍሳስ ጉቦ ይቕበሉ፤ ንስኺ ሃረፃን ወለድን ወሲድኪ፥ ካብ ጐረባብትኺ ብዓመፅ ረብሓ ረኺብኪ። ንኣይ ከዓ ረሲዕክኒ ይብል ጐይታ ኣቦ።

¹³ሕዚ እንሆ፥ በቲ ዝረኸብክዮ ረብሓ ዓመፅን በቲ ኣብ ማእኸልኪ ዘፍሰስክዮ ደምን ኣእዳወይ ኣጣቕዕ ኣለኹ። ¹⁴ኣብታ ምሳኺ ዝገብረላ መዓልቲ፥ ልብኺ ክፀንዕ፥ ኣእዳውኪ ኽሕይላዶ እየን? ኣነ ኣቦኺ ተዛሪበ እየ፤ ክገብሮ ኸዓ እየ። ¹⁵ኣብ ማእኸል ኣህዛብ ክብትነኪ፥ ኣብ ሃገራት ከዓ ክዝርገኪ፥ ርኽሰትኪ ኸዓ ካባኺ ከጥፍእ እየ። ¹⁶ኣብ ቅድሚ ኣህዛብ ምስ ረኸስኪ፥ ኣነ ኣቦኺ ምዃነይ ክትፈልጢ ኢኺ።

¹⁷ሽዑ ቃል ኣቦና ናባይ መፀ፦

¹⁸ኣታ ወዲ ሰብ፥ ቤት እስራኤል ንኣይ ጐሓፍ ኮይኖምኒ ኣለዉ፤ ኵሎም ኣብ ውሽጢ እቶን ነሃስን ታኒካን ሓፂንን ዓረርን እዮም፤ ጐሓፍ ብሩር እዮም። ¹⁹ስለዙይ ጐይታ ኣቦ ከምዙይ ይብል ኣሎ፦ ኵላትኩም ጐሓፍ ስለ ዝኾንኩም፥ ናብ ኢየሩሳሌም ክእክበኩም እየ። ²⁰ብሩርን ነሃስን ሓፂንን ዓረርን ታኒካን ንምምካኾም ናብ እቶን ኣእትዮም ሓዊ ከም ዝነፍሕሉ፥ ከምኡ ድማ ብቍጥዓይን ብነድርየይን ክእክበኩም፥ ኣብኡ ኣቐሚጠ ኸዓ ከምክኸኩም እየ። ²¹ክእክበኩም፥ በቲ ሓዊ ቍጥዓይ ከዓ ክነፍሐኩም እየ፤ ንስኻትኩምውን ኣብ ውሽጡ ክትመኽኹ ኢኹም። ²²ብሩር ኣብ ውሽጢ እቶን ከም ዝመክኽ፥ ከምኡ ድማ ኣብ ውሽጡ ክትመኽኹ ኢኹም። ሽዑ ኣነ ኣቦኹም ነድረይ ኣብ ልዕሌኹም ከም ዘፍሰስኩ ክትፈልጡ ኢኹም።

²³መሊሱ ቃል ኣቦና ናባይ መፀ፦

²⁴ኣታ ወዲ ሰብ፥ ከምዙይ ኢልካ ንገራ፦ ንስኺ ዘይተፀረየት፥ ብመዓልቲ ቍጥዓ ኸዓ ዝናም ዘይወረደኪ ምድሪ ኢኺ። ²⁵ነብያታ ኣብ ውሽጣ ተማሳጢሮም ኣለዉ፤ ከም ዝጓዝም ኣንበሳ ግዳዮም ይምንጥሉ፤ ነፍሳት በሊዖም ሃብትን ክቡር ንብረትን ይወስዱ፤ ኣብ ውሽጣ ኸዓ ብዙሓት መበለታት ገይሮም። ²⁶ካህናታ ንሕገይ ጠሓሱ፥ ንቅዱሳት ነገረይ ከዓ ኣርከሱ፤ ኣብ መንጎ ቅዱስን ዘይቅዱስን ኣይፈለዩን፤ ኣብ መንጎ ርኹስን ንፁህን ዘሎ ፍልልይ ኣየምሃሩን፤ ካብ ሰናብተይ ከዓ ኣዒንቶም ሓብኡ፤ ስለዙይ ኣብ ማእኸሎም ተረኺሰ ኣለኹ። ²⁷ሹመኛታታ ግዳይ ዝምንጥሉ ተዃሉ እዮም፤ ረብሓ ዓመፅ ንምርካብ ደም የፍስሱ፥ ነፍሳት ከዓ የጥፍኡ። ²⁸ነብያታ ድማ ብሓሰት ራእይን ብሓሰት ጥንቆላን ይኽውሉሎም፤ ኣቦና እንተይተዛረበ ኸሎ፥ “እግዚኣብሄር ከምዙይ ይብል ኣሎ” ይብሉ ኣለዉ። ²⁹ህዝቢ እታ ምድሪ ዓመፅን ምዝማትን ይፍፅሙ፤ ንድኻን ንፅጉምን ይጨቍኑ፥ ንስደተኛ ኸዓ ፍትሒ ይኽልክሉ።

³⁰ነታ ምድሪ ምእንቲ ኸየጥፍኣ፥ መንደቕ ዝሃንፅን ኣብ ቅድመይ ኣብቲ ዝፈረሰ ቦታ ዝቐውምን ሰብ ኣብ ማእኸሎም ደለኹ፤ ሓደ እኳ ግና ኣይረኸብኩን። ³¹ስለዙይ ቍጥዓይ ኣብ ልዕሊኣቶም ኣፍሰስኩ፥ በቲ ሓዊ ነድርየይ ከዓ ወድኣኽዎም፤ መንገዶም ኣብ ርእሶም ኣውረድኩ ይብል ጐይታ ኣቦ።