An Fallasa Zub da Jinin Urushalima

Takardar tuhuma a kan Urushalima: sarakuna suna zub da jini, ana raina iyaye, ana matse baƙi, firistoci suna haɗa tsattsarka da marar tsarki, annabawa kuma suna shafa wa duk wannan farar ƙasa. Ubanmu ya ce ya nemi mutum guda da zai tsaya a tsattsagar katanga saboda ƙasar, amma bai sami kowa ba.

Babi na 22.

Maganar Ubanmu ta zo mini, cewa,

Kai kuwa, ɗan mutum, za ka yi hukunci? Za ka yi wa birni mai zub da jini hukunci? To, ka fuskance ta da dukan abubuwan ƙyama nata. Ka ce, Uba Mai Iko Duka ya ce, Ke birni mai zub da jini a cikinki, har lokacinki ya zo, kike kuma yin wa kanki gumaka, har kika ƙazantu. Ta wurin jinin da kika zubar kin yi laifi, ta wurin gumakan da kika yi kuwa kin ƙazantu. Kin kawo ƙarshenki kusa, kin kai ga ƙarshen shekarunki. Saboda haka na mai da ke abin kunya ga al'ummai, abin ba'a ga kowace ƙasa. Waɗanda suke kusa da ke da waɗanda suke nesa za su yi miki ba'a, ke birni mai ƙazantaccen suna, cike da hargitsi.

Ga shi, kowane sarkin Isra'ila da yake cikinki yana amfani da ikonsa domin yă zub da jini. A cikinki sun rena uba da uwa; a cikinki sun danne baƙo; a cikinki sun yi wa maraya da gwauruwa zalunci. Kin rena tsarkakan abubuwana, kin kuma ƙazantar da Asabacina. A cikinki akwai masu ɓata suna waɗanda suke neman su zub da jini; a cikinki akwai waɗanda suke ci a wuraren tsafi na duwatsu, suna aikata ƙazamun ayyuka a tsakaninki. A cikinki suna kwana da matan ubanninsu; a cikinki suna ƙazantar da mata a lokacin al'adarsu. Wani yana aikata abubuwan ƙyama da matar maƙwabcinsa; wani kuma da kunya yana ƙazantar da matar ɗansa; wani kuma yana ƙazantar da 'yar'uwarsa, 'yar mahaifinsa. A cikinki suna karɓar cin hanci domin su zub da jini; kina karɓar ruwan kuɗi, kina yin riba mai yawan gaske, kina kuma ƙwace wa maƙwabtanki haƙƙinsu da zalunci. Ni kuwa kin manta da ni, in ji Uba Mai Iko Duka.

Yanzu ga shi, na tafa hannuwana saboda ribar da kika samu ta hanyar rashin gaskiya, da kuma jinin da kika zubar a cikinki. Ƙarfin halinki zai dawwama ne, hannuwanki kuma su yi ƙarfi, sa'ad da zan hukunta ki? Ni Ubanki, na yi magana, zan kuma aikata. Zan watsar da ke a cikin al'ummai, in warwatsa ki cikin ƙasashe, in kuma tsarkake ƙazantarki daga gare ki. Sa'ad da aka ƙazantar da ke a gaban al'ummai, za ki san cewa ni ne Ubanki.

Sai maganar Ubanmu ta zo mini, cewa,

Ɗan mutum, gidan Isra'ila ya zama mini dattin ƙarfe; dukansu tagulla ne, da kuza, da baƙin ƙarfe, da dalma a cikin tanderu—dattin azurfa. Saboda haka Uba Mai Iko Duka ya ce, Tun da dukanku kun zama datti, zan tattara ku cikin Urushalima. Kamar yadda ake tara azurfa, da tagulla, da baƙin ƙarfe, da dalma, da kuza cikin tanderu, a hura musu wuta domin a narkar da su, haka zan tattara ku cikin fushina da hasalata, in ajiye ku a can, in kuma narkar da ku. Zan tattara ku, in hura muku wutar fushina, za ku kuwa narke a cikinta. Kamar yadda azurfa take narkewa cikin tanderu, haka za ku narke a cikinta. Sa'an nan za ku san cewa ni Ubanku, na zubo hasalata a kanku.

Har ila yau, maganar Ubanmu ta zo mini, cewa,

Ɗan mutum, ka ce mata, Ke ƙasa ce da ba a tsarkake ba, wadda ba a yi mata ruwan sama ba a ranar fushi. Annabawanta suna haɗa baki kamar zaki mai ruri yana yayyage abin da ya kama; suna cinye rayuka, suna ƙwace dukiya da abubuwa masu daraja, suna kuma sa gwauraye su yi yawa a cikinta. Firistocinta sun karya dokata, sun kuma ƙazantar da tsarkakan abubuwana; ba su bambanta tsakanin mai tsarki da marar tsarki ba, ba su koyar da bambanci tsakanin mai ƙazanta da mai tsabta ba, sun kuma runtse idanunsu daga Asabacina, har aka ƙazantar da ni a cikinsu. Shugabanninta kyarketai ne masu yayyage abin da suka kama, suna zub da jini, suna hallaka rayuka domin ribar rashin gaskiya. Annabawanta sun shafe musu wannan da farar ƙasa ta wurin wahayin ƙarya da duban ƙarya, suna cewa, “Ga abin da Allah ya ce,” alhali kuwa Ubanmu bai yi magana ba. Mutanen ƙasar suna aikata ƙwace da fashi; suna danne matalauta da mabukata, suna kuma hana baƙo adalci.

Na nemi wani a cikinsu wanda zai gina katanga, yă kuma tsaya a gabana a wurin da ya rushe saboda ƙasar, domin kada in hallaka ta—amma ban sami kowa ba. Saboda haka na zubo fushina a kansu, na cinye su da wutar hasalata. Na dawo da hanyarsu a kan kawunansu, in ji Uba Mai Iko Duka.