Yirusalem Azü Tokshiba Jungkai Adoka

Yirusalem anema maksü: yimsüsürtem azü tokshir, tebu aser tetsü sensatsü, aenertem tekangshi, putirtem temeshi aser tamajung bendangtsü magizük, ainkartem itemji ajak süsüa yanglur. Tebui ashi, pai lima asoshi jara jakrep nung lidaktsü nisung ka südak, saka kecha mesoa.

Chapter 22.

Tebu O kü dang aru,

Aser na, nisung chir, nai o bendangtsü ma? Azü tokshiba yimti nai o bendangtsü ma? Anungji pa tesempatsü mapa ajak pa dang sangdongang. Shiang, Yamai Tebui ashir, Yimti pei lung nung azü tokshir, aji asünung pa mapang aruogo, aser pei dang süngyanglu yanglur, memerüki kümer. Nai tokshiba azü agi na tai lir, aser nai yangluba süngyanglu agi na memerük lir. Na pei anogo ketdang anüa aruogo, aser ne kümtem ketdang tashi aruogo. Anungji ni na kintem dang maksü ka, linük ajak dang tatalatsü ka kümdaktsü. Na dang anüa alir aser ayangi alirtemi na tatalatsü—tenüng memerükba, rongrongshishi agi sünga yimti.

Ajiang, ne rongnung aliba Israel tamarener shiai, azü tokshitsü asoshi, pei ain inyakdaktsü. Ne nung parnoki tebu aser tetsü sensatsü; ne nung parnoki aener tekangshi; ne nung parnoki lajar aser amitsür dang tamajung benshi. Nai kü temeshibatem mezüngmeshiogo, aser kü amungnütem menentsüogo. Ne nung azü tokshitsü asoshi nüngsenbangsen o jembirtemi lir; ne nung tenem tekülemdak nung chir aser ne rongnung memeshiba mapa inyakertem lir. Ne nung parnoki pei tebu kinungtsü den medem; ne nung parnoki ita shilem aoba tetsür dang raksa. Shibai pei kiyonger kinungtsü den tesempatsü mapa inyak; shibai memeshiba agi pei chir kinungtsü memerüki küm; shibai pei tenu, pei tebu jala raksa. Ne nung azü tokshitsü asoshi parnoki süpokrem agir; nai tetemlok agir, bener aika agir, ne kiyongertem mekangshia tamajung mapa agi bener agir. Aser nai ni mamarogo, ta Tebui ashir.

Tana ajiang, nai agütsüba dishan bener asoshi, aser ne tiyong nung nai tokshiba azü asoshi, ni kü teka pokloktsü. Ni na den benshi anogo nung, ne tasü aittsü ma, ne teka tashi aittsü ma? Ni, ne Tebui, ashiogo, aser inyaktsü. Ni na kintem rongnung prokshidaktsütsü, linük rongnung na ayimsünga arudaktsü, aser ne memerükba na nungi endoktsü. Kintem nükdang na memerüki kümtetdir, ni ne Tebu lir ta nai metettsü.

Aser Tebu O kü dang aru,

Nisung chir, Israel kidong kü dang rüja aküm; parnok ajak misem lung nung yongmenyin, merang tanük, merang, shesa yin lir—taribi rüja lir. Anungji Yamai Tebui ashir, Nenok ajak memerükba kümogo asünung, ni Yirusalem nung nenok anitentsü. Taribi, yongmenyin, merang, shesa yin, aser merang tanük misem lung nung senteptsü ama, aser aji yimsüngdaktsü asoshi iba madak mi ondaka ama, yamaji ni kü mit aser terasaba nung nenok senteptsü, yangji nenok ayu, aser nenok yimsüngdaktsü. Ni nenok senteptsü, aser kü mit mi agi nenok madak ondaktsü, aser nenok iba lung nung yimsüngtsü. Taribi misem lung nung yimsüngba ama, yamaji nenok iba lung nung yimsüngtsü. Idangji ni, nenok Tebui, nenok madak kü terasaba tokshiogo ta nenoki metettsü.

Tanaben Tebu O kü dang aru,

Nisung chir, pa dang shiang, Na merüka masüba linük lir, terasaba anogo nung tzünglu maludaktsü lima lir. Pa shintsürtemi bangjemtep, arüba molusongzü tetepsetba shisatsür ama; parnoki nisung taküm achir, rongsen aser temakzükba oset agir, aser pa lung nung amitsür jenti kümdaktsü. Pa putirtemi kü ozüng raksa, aser kü temeshibatem menentsü; temeshi o memeshiba tsüngda nung parnoki balala memetet, memerük o merük tsüngda nung sayu maka, aser kü amungnütem nungi pei tenük miimbang; anungji ni parnok tiyong nung menena aküm. Pa tongtipurtem tetepsetba shisatsür tsünütem ama lir, azü tokshir, dishan bener agi nisung taküm samatsür. Pa shintsürtemi tiyazü mangdang aser tiyazü tetezütsü agi iba parnok dang temesüngba yanglu, “Yamai Tsüngremi ashir,” ta ashi, saka Tebui mashi. Lima nunger nüburtemi tekülakba aser rakzükrak mapa inyaker; sensaker aser nüngdakba purtem tekangshi, aser aener dang ochiji meyiptsü.

Jara yanglutsü aser lima asoshi tapok nung kü madang noktaka, ni aji masamatsü asoshi, ni parnok rongnungi nisung ka bushi, saka shinga mangu. Anungji ni parnok madak kü terasaba tokshiogo, kü terasaba mi agi parnok meyoka samatsü; parnok jaklaji pei kolak nung ni enloktetogo, ta Tebui ashir.