Jerusalema sii angtibü tang khibü

Jerusalem khulimbo thushed che: yaangenbou shuongei sii angtida, nyu to bou to aweasüngko, yenbou shuong khonkutikei, ungshedbü shuongei saopobü hoba asaopobü kanglanga ajanyinko, hoba thuseibü shuongei kho pendou huon takda. Seneibü Bouei lauda, kaodak shanga khün ka lombou setla müt che chühkei lausikei aoei alam.

Chapter 22.

Boueibü ngüh kü to loukei,

Hoba no, Müteibü shou, no matjemlabü lo? Sii angbü sangnyu kho no matjemlabü lo? Kheijinei haoeibü mangsenbü kümsilei pendou hao to thangetashi. Lenashi: Thükenbou Bouei hai lauda: O sangnyu, no lulu insiaubu sii angtida, khoei nyi jih loukei, hoba nyi lulu shanga heangsho kümbei, asaopoko yeia. Nyi angtibü siiei nyi shedbü yeia, hoba nyi kümbü heangshoei nyi asaopoko yeia. Nyi kaibü thonbü bangenkua, kaibü po shuongeibü thonbü loutikei. Khoei ngei nyi phangshuong shanga himou che, kaonyek pendou shanga nyikulabü che la yeitilabü. Nyi ka bangbü hoba hü aekabü shuongei nyi nyikulabü—O asaopobü nyen kibü sangnyu, pangetei shenbü.

Chühashi, nyi insiaubu kibü Israelbü yaangenbou mütpem wekoei haoeibü hauei sii angtida. Nyi insiaubu haoenei nyu to bou to aweasüngko; nyi insiaubu haoenei yenbou khonkutikei; nyi insiaubu haoenei bou akibü hoba latnyu to amaibü jungeikei. Nyi ngeibü saopobü peisilei aweasüngko hoba ngeibü Nounyet shuong shedtikei. Nyi insiaubu sii angtila shanga lilisese mütshuong ki; nyi insiaubu shongha lemshang to shaubü shuong hoba nyi yoa asaopobü kümsilei kümbü shuong ki. Nyi insiaubu haoenei lulueibü bou yaksi to jamla; nyi insiaubu haoenei yaksa mang asaopoko kibü yaksi to himou bautida. Aoei jembü lepboueibü yak to mangsenbü kümsilei kümda; toukei aoei jembü shoueibü yak to asaopoko leiluda; toukei aoei jembü na, jembü boueibü shou, to himou bautida. Nyi insiaubu sii angtila shanga haoenei besa leda; nyi phopnam leda, laobou peisilei nyakshinam apda, nyi kaibü lepbü shuong ka besa anyem lepettida. Hoba ngo kho nyi makei, dogo Thükenbou Bouei lauda.

Tou chühashi, nyi kümbü dishan nyakshinam shanga hoba nyi insiaubu nyi angtibü sii shanga ngei ngeibü ik aeto aeto tetbuda. Ngei nyi to jungeibü chaloua, kaibü maang kaangbü kilabü lo, kaibü ik hau kibü kilabü lo? Ngo kaibü Bouei lenkei hoba kümlabü. Ngei nyi phangshuong yoto lintilabü, hoba kaodak shuonga nyi lintilabü, hoba nyi asaopobü nyi ka sungan aplabü. Nyi phangshuong thedanga asaopoko yeikei, nyi ngo kaibü Bou kia dogo ngelabü.

Kheijinei Boueibü ngüh kü to loukei,

Müteibü shou, Israel chung kü shanga odsinot la yeia; haoen pendou namyaüshang insiaubu chinam, tin, namkaang hoba sishai ki, chandinam odsinot ki. Kheijinei Thükenbou Bouei lauda: Kan pendou asaopobü la yeikei yingsije, ngei kan Jerusalem to leishailabü. Chandinam, chinam, namkaang, sishai hoba tin kho namyaüshang insiaubu leishaian, hoba kho tühnyintila shanga wan metjinei, khei tegü ngei kan ngeibü khau hoba maangshata leishailabü, hoba khünei kan phokulabü, hoba kan tühnyintilabü. Ngei kan leishaian ngeibü khau wanei kan thüka metlabü, hoba kan insiaubu tühnyinlabü. Chandinam namyaüshang insiaubu tühnyinbü tegü, kan insiaubu khei tegü tühnyinlabü. Kheijinei ngo kaneibü Bouei kan thüka ngeibü maangshat koukei dogo kan ngelabü.

Tokei Boueibü ngüh kü to loukei,

Müteibü shou, sao to lenashi: Nyi koshikan akibü kaodak che ki, khauangbü chaloua lang ayantibü kaodak ki. Haoeibü tetenbü shuong chela ngühthang yenda, molosaonyu ngühko mei taketbü tegü; haoenei langkei suida, nyaksinam hoba the loubü shuong senda, hoba haoei insiaubu latnyu juongnyu phoda. Haoeibü ungshedbou shuongei ngeibü Ngühkhüm leilutikei hoba ngeibü saopobü peisilei shedtikei; haoenei saopobü si asaopobü kanglanga lulu angekei, hinseibü si ihinseibü kanglanga ai lulu alenkei, hoba haoeneibü nyek ngeibü Nounyet ka küplepbei, khoei ngo haoen yoa shedtila ki. Haoeibü jaishou shuong mei taketbü sholou shuong tegü ki, sii angtiko, dishan nyakshinam shanga langkei mautida. Haoeibü tetenbü shuongei amlangbü mangsang hoba amlangbü thulenbüei haoen shanga ho küplepbei, “Ho Mühghaüei lauda,” dogo lauda, lausikei Bouei alenkei. Kaodak kabü mütshuongei lepettibü hoba soyungbü kümda; haoenei shalebü hoba khambü shuong khonkutida hoba yenbou to ngühmai khüpeilangei tüpbuda.

Ngei haoen yoa kümthang kümla hoba kaodak shanga ngo thedanga khüna loan kitila shanga, khei ngei kao amautila shanga, müt che lambei; lausikei aoeikei ahaptikei. Khoei ngei haoen thüka ngeibü wansak koukei, ngeibü maangshat wanei haoen mautikei. Haoeneibü lamnyu haoen lulueibü khu thüka ngei lottikei, dogo Thükenbou Bouei lauda.