Yaatei Keechiiryet Ng'ooksek
Mong'u piik che laanyei agenge agenge: kwang'utyet, baret, melektap peetuut agobo nganuuk, yeityo Meet. Eng' ng'eetap kapkorosuut teebe paorinik Kiptaiyat Kwandanyo kole koit ano sait, ak kileenji koong'eti kitigin. Eng' ng'ookset ne po lo kieb piik che nyigoonen ak kosaai koik kobut icheek.
6 1Ki ageere Jeso, Keechiiryet, koyaat agenge eng' ng'ookset tisap, ak ki agas agenge eng' tyong'ik ang'wan che saptos koleenji, eng' kutit ne oo ko uu kingen, “Nyoo!” 2Ki ageer: paraisiit ne leel, chii ne laanyei ne namei kwanget. Ki kigoochi kuutweet, ak ki manda kobelisyei, si kobelis.
3Ye kingo yat Keechiiryet ng'ookset ne po aeng', ki agas tyong'indet ne po aeng' ne saptos koleenji, “Nyoo!” 4Ki manda paraisiit age ne piriireen ko uu maat. Ki kigoochi chii ne laanyei kimnateet konam kaalyeet eng' ng'wony, si kobar piik icheegei, ak ki kigoochi rotweet ne oo.
5Ye kingo yat Keechiiryet ng'ookset ne po somok, ki agas tyong'indet ne po somok ne saptos koleenji, “Nyoo!” Ki ageer—paraisiit ne tuuen, chii ne laanyei ne tinyei kipimaaneet eng' eunnyi. 6Ki agas kiy ne uu kutit among tyong'ik ang'wan che saptos, “Litait agenge ne po nganuuk eng' melektap peetuut, litaisyek somok che po baale eng' melektap peetuut—amat iya mwaita ak divaik!”
7Ye kingo yat Keechiiryet ng'ookset ne po ang'wan, ki agas kutitap tyong'indet ne po ang'wan ne saptos koleenji, “Nyoo!” 8Ki ageere paraisiit ne leelach. Chii ne laanyei ko ki kiguure Meet, ak ki isubi mestoit ineendet. Ki kigoochi Meet ak mestoit kimnateet koboi kebeberta ne po ang'wan ne po ng'wony, kobar eng' rotweet, ak rubeet, ak miondo, ak tyong'igap timiin che po ng'wony.
9Ye kingo yat ng'ookset ne po muut, ki ageere eng' ng'wonyutap kaptisiisyo saboonwegap pichooto che ki kibar amu ng'olyootap Kwandanyo ak amu kayaneet ne ki kitinyei. 10Ki waach eng' kutit ne oo koleenji, “Agoi sait ne ou, Kwanda ne Toroor, ne Tiliil ak ne po iman, ye iirwook ak iyaakyi mugetuut korotiigyo agobo piik che menyei ng'wony?” a a v10 “Sovereign” ko kainet ne iboori Testamente ne Leel agobo kimnateetap Kwandanyo ne po tai tugul — piik che ki kibar amu iyanet soomei ineendet ko uu ne tinyei kimnateet tugul si kotemis tuguuk komyee. 11Ki kigoochi chii tugul ngoryeet ne leel, ak ki kileenji konyoorun sarta kityo kogeny, agoi kosich koiitennywa otwogik che u icheek ak tupchosyekwak, che kibarei ko uu ye ki kibarei icheek.
12Ki ageere Keechiiryet koyaat ng'ookset ne po lo: ki potan ng'wony miising', ak koik asiista ne tuuen ko uu ngoroik ne po sumeek, ak koik arawet komugul ko uu korotiik, 13ak ki sach kecheigap kipsengwet ng'wony, ko uu logoegap mogoonik che ma anyiny che butei mogoywet ye kitumduma eng' usoonet ne kiim. 14Ki milmildo kipsengwet ko uu bukuit ne kigwerei, ak ki kiisto tulweet age tugul ak kipkeramet eng' komoswekwak. 15Ki unygei laitorinigap ng'wony, ak piik che taagunotiin, ak kaptaiyigap lugeet, ak piik che mogornotiin, ak piik che nyigoonen, ak otwogik tugul ak piik che ityagat, eng' kebenonik ak eng' rwandosyegap tuloonook. 16Ki leenji tuloonook ak rwandosyek, “Obutyeech, ak ounech eng' taitap Kamuktaindet ne tebee ng'echereetap laitornatet, ak eng' nereegegap Keechiiryet! 17Amu kagonyo peetuut ne oo ne po nereegegap Kamuktaindet ak Keechiiryet, ak ng'oo ne muuchi kotonon?”