ራእይ 6 FHB Father's Heart Bible™

6 ¹ኢየሱስ እቲ ገንሸል፥ ካብተን ሸውዓተ ማሕተማት ንሓንቲ ኺኸፍት ረአኹ፤ ካብቶም ኣርባዕተ እንስሳ ሓደ ድማ ብድምፂ ነጎዳ “ንዓ!” ክብል ሰማዕኹ። ²ጠመትኩ ድማ፥ እንሆ ፀዓዳ ፈረስ ነበረ፤ እቲ ፈረሰኛ ኸዓ ቀስቲ ሒዙ ነበረ። ኣኽሊልውን ተውሃቦ፤ እናሰዓረ ድማ ኽስዕር ወፀ።

³እቲ ገንሸል ነታ ኻልአይቲ ማሕተም ምስ ከፈተ፥ እቲ ኻልኣይ እንስሳ “ንዓ!” ክብል ሰማዕኹ። ⁴ካልእ ከም ሓዊ ዝቐይሕ ፈረስ ድማ ወፀ። እቲ ፈረሰኛ ኸዓ ሰላም ካብ ምድሪ ኼልግስ፥ ሰባት ንሓድሕዶም ከም ዝቐታተሉ ኺገብር ስልጣን ተውሃቦ፤ ዓብዪ ሰይፊ ድማ ተውሃቦ።

⁵እቲ ገንሸል ነታ ሳልሰይቲ ማሕተም ምስ ከፈተ፥ እቲ ሳልሳይ እንስሳ “ንዓ!” ክብል ሰማዕኹ። ጠመትኩ ኸዓ፥ እንሆ ፀሊም ፈረስ ነበረ፤ እቲ ፈረሰኛ ድማ ሚዛን ኣብ ኢዱ ሒዙ ነበረ። ⁶ኣብ ማእኸል እቶም ኣርባዕተ እንስሳ ድማ ድምፂ ዝመስል ሰማዕኹ፦ “ሓደ መስፈሪ ስርናይ ብዓስቢ ሓንቲ መዓልቲ፥ ሰለስተ መስፈሪ ስገም ድማ ብዓስቢ ሓንቲ መዓልቲ ይኹን፤ ነቲ ዘይትን ነቲ ወይንን ግና ኣይትጕዳእ!”

⁷እቲ ገንሸል ነታ ራብዐይቲ ማሕተም ምስ ከፈተ፥ ድምፂ እቲ ራብዓይ እንስሳ “ንዓ!” ክብል ሰማዕኹ። ⁸ሃሳስ ፈረስ ድማ ረአኹ። ስም እቲ ፈረሰኛ ኸዓ ሞት ነበረ፤ ሲኦል ድማ ይስዕቦ ነበረ። ንሞት ከምኡውን ንሲኦል ድማ፥ ብሰይፍን ብጥሜትን ብፌራን ብኣራዊት ምድርን ኣብ ርብዒ ምድሪ ኺቐትሉ ስልጣን ተውሃቦም።

⁹ነታ ሓምሸይቲ ማሕተም ምስ ከፈተ፥ ኣብ ትሕቲ እቲ መሰውኢ፥ ነፍሳት እቶም ስለ ቃል ኣቦና ከምኡውን ስለ እቲ ዝሓዝዎ ምስክርነት ዝተቐተሉ ረአኹ። ¹⁰ዓው ኢሎም ድማ “ኦ ልዑል ኣቦ፥ ቅዱስን ሓቀኛን፥ ክሳዕ መዓዝ ኢኻ ዘይትፈርድ፥ ደምናውን ኣብ ልዕሊ እቶም ኣብ ምድሪ ዝነብሩ ዘይትበቅለልና?” ኢሎም ፀውዑ። ^a a v10 ‘ልዑል’ ዝብል ቃል፥ ሓድሽ ኪዳን ንላዕለዋይ ስልጣን ኣቦና ጥራሕ ዝሕዞ መዓርግ እዩ፤ እቶም ሰማእታት ድማ ነገራት ከቕንዕ ኵሉ ስልጣን ሒዙ ኸም ዘሎ ጌሮም ናብኡ ይምህለሉ። ¹¹ንነፍሲ ወከፎም ድማ ፀዓዳ ኽዳን ተውሃቦም፤ እቶም ከምቲ ንሳቶም ዝተቐተልዎ ኽቕተሉ ዘለዎም ኣገልገልቲ ብፆቶም ከምኡውን ኣሕዋቶም ቍፅሮም ክሳዕ ዝመልኡ ድማ፥ ገና ቅሩብ ጊዜ ኽዓርፉ ተባህሎም።

¹²እቲ ገንሸል ነታ ሻድሸይቲ ማሕተም ኪኸፍት ረአኹ፤ ብርቱዕ ምንቅጥቃጥ ምድሪ ኾነ፤ ፀሓይ ከም ፀጕራዊ ጨርቂ ፀለመት፤ ምልእቲ ወርሒ ድማ ከም ደም ኮነት፤ ¹³ከዋኽብቲ ሰማይ ድማ ከምቲ ኦም በለስ ብብርቱዕ ንፋስ ምስ ተነቅነቐ ዘይበሰለ ፍሬታቱ ዘውድቕ፥ ናብ ምድሪ ረገፉ። ¹⁴ሰማይ ድማ ከም ጥቕላል መፅሓፍ ተጠቕለለ፤ ኵሉ እምባን ደሴትን ከዓ ካብ ቦታኡ ተንቀሳቐሰ። ¹⁵ነገስታት ምድሪ፥ ዓበይትን ሓለቕቲ ሰራዊትን፥ ሃብታማት ከምኡውን ሓያላት፥ ኵሉ ባርያ ኾነ ናፃ ድማ፥ ኣብ በዓትታትን ኣብ ኣኻውሕ እምባታትን ተሓብኡ። ¹⁶ነቶም እምባታትን ኣኻውሕን ድማ “ኣብ ልዕሌና ውደቑ፤ ካብ ገፅ እቲ ኣብ ዙፋን ዝተቐመጠ እግዚኣብሄር፥ ካብ ቍጥዓ እቲ ገንሸል ድማ ሕብኡና!” በልዎም። ¹⁷“እታ ዓባይ መዓልቲ ቍጥዓ እግዚኣብሄርን ገንሸልን በፂሓ እያሞ፥ ኪፃወራ ዝኽእል መን እዩ?”