Sanlon Paangei Theleklaang Shuong Ipbuda
Setbou shuong weko weko satkei: thüksimin hapbü, haitibü, chalou cheeibü lau youshou hin che mu, kheijinei Hailabü. Khübü danka haitibü shuongei Pendou Thükenbou Bou to touje dogo phekei, hoba tou juong ngaiashi dogo laukei. Kheijinei hau yaangbü shuongei haoen küplepkei hoba laang shuong to haoen khulimbo tuongla suakei.
6 1Ngei Jisu, Sanlon Paang, theleklaang anthüknyet yoa che ipbo chühkei, hoba langkeibü den leibang yoa cheei ngühlang yaangbüei laubü ditkei, “Kaiya!” 2Ngei chühkei: koli thupaibü che, khonei setbouei lau hatan kikei. Hao la khun kua, hoba haoei thüksimin hapan, touje thüksimin hapla hauan satkei.
3Sanlon Paangei nyiboubü theleklaang ipbujinei, ngei nyiboubü langkeibü den laubü ditkei, “Kaiya!” 4Koli saklangbü lubü che hauan loukei. Khonei setbou la kaodak ka sangmai sunglangla, hoba müt cheei che haitiko kümla sei kua, hoba hao la lau yaangbü che kukei.
5Sanlon Paangei semboubü theleklaang ipbujinei, ngei semboubü langkeibü den laubü ditkei, “Kaiya!” Ngei chühkei—koli nakbü che, khonei setbouei haoeibü ika wenam langshang dang che tonkei. 6Langkeibü den leibang kanglanga ngei ngühlang tegübü denche ditkei: “Youshou hin che chalou che mu shanga, barli youshou hin sem chalou che mu shanga—onang hoba ih to teshatjan!”
7Sanlon Paangei leiboubü theleklaang ipbujinei, ngei leiboubü langkeibü den ngühlang laubü ditkei, “Kaiya!” 8Ngei koli senyopbü che hapbei. Khonei setbou nyen Hailabü nyenkei, hee hao phaito loukei. Hailabü hoba hee la kaodak leiboubü an thüka sei kua, touje inei, mühsinou, limei hoba kaodak kabü yama meisiauei haitila shanga.
9Ngaoboubü theleklaang haoei ipbujinei, ngei seneibü Bou ngüh shanga hoba haoenei toukei aukabü shanga haitibü shuongeibü soushou lemshang phanga hapbei. 10Haoen ngekkei, “Lalokche sühko, O saopobü hoba ngühmai Yaangbou Bou, nyi matjema kaodaka kibü shuong thüka seneibü sii shanga phok alamphemlabü?” a a v10 ‘Bunyubou’ kho Thelet Haanbüei seneibü Bou thon thükenbü shanga apyobü nyen ki—haibü shuongei haoen jembü denche jemmaila kümlabü sei pendou lombou tegü hao jungto hilekei. 11Lulu la koli thupaibü neisimei che kua, hoba haoen tegü haitilabü haoeneibü jaisinasi jongsak hoba jaisinasi shuong lühbak penan ashongko, chalou shisho lepde haoen haksoashi dogo haoen to lenkei.
12Ngei Sanlon Paangei lakboubü theleklaang ipbo chühkei: selo kaang nyikei, chanyu wi neisimei kaangbü tegü nakkei, litnyu khümbo sii tegü yeikei, 13hoba khuthük khanshoulitshou shuong kaodak to atkei, yei kaangko shaknyinko bhuklongei haoeibü anyenko hek shuong atbü tegü. 14Müh kho tulai tegü khokan apbei, hoba shongh hoba yungnyu laang pendou khünei kishang ka leishaian apbei. 15Kaodak Choba shuong, yaangenbü shuong, sepai leiyeibou shuong, keibou shuong, kaangbü shuong, sambü weko hoba tükdebü weko pendou laangbob hoba shongh laanga huan apbei. 16Haoen shongh shuong hoba laang shuong to laukei, “Kün thüka khüpetashi, hoba Choba setshanga setbü Mühghaü thenyek ka hoba Sanlon Paang maangshat ka kün huashi! 17Aishanga Mühghaü hoba Sanlon Paangeibü maangshat chalou yaangbü louakei, hoba aoei kho to loda?”
