Tereet ne Beelei ne po Kirwooget
Eng' peetuut ne kong'eet Babilon koyiem Jerusalem, ko Jerusalem tereet ne munyat ne kabeete peek oriit. Eng' kemeennooto age kweei Kwandanyo chebyosetap Hesekiel ak koleenji komatindiriir, koboornatet kole ye kabare hekaluut ko kong'wanit piik kot ma komuuch koriir.
Ng'alaali Kwandanyo eng' mustarisyek 2–14, 16–17, 21–27
24 1Eng' kenyiitap sogool, eng' arawetap taman, eng' peetuutap taman, ki nyoonwo ng'olyootap Kwandanyo, kole:
2Weeriitap chii, sir kainetap peetuuni, peetuuni ng'enge. Ki yiem laitoryatap Babel Jerusalem eng' peetuuni ng'enge. 3Imwachi koot ne po ngelelyo paraisiit, ak koleenji icheek: Mwaei Kiptaiyat Kwanda kole: “Inde tereet, inde peek oriit. 4Inde kebeberwek oriit, kebeberta age tugul ne myee, beenyeet ak ng'oseet; inyiitaat kawek che korooron. 5Nam che korooron eng' neek, ak iruruuch keetiik kurereetanyi; iyo kobeel, ak iyo kawekyik oriit.”
6Mwaei Kiptaiyat Kwanda kole: Pwo eng' nganaseetap korotiik, tereet ne mi yomnateet oriit, ne ma king'et yomnateennyi! Iste oriit kebeberta kebeberta; ma ki kiwir koik agobo ineendet. a a v6 Ki kiwir koik si kilewen tuguuk; ago yoni ma ki kiwir koik — ipunu kebeberta age tugul ole ma kilewen, ne iboorunoi kirwooget ne po komugul agobo Jerusalem. 7“Amu mi korotiik eng' kwenunnyi; ki inde paragutap koito ne lapat. Ma ki kotumda ng'wony si kotup ineendet ng'ung'unyek. 8Si abois nereegek ak aib kirwooget, ka ande korotiikyik paragutap koito ne lapat, si ma kitup.”
9Mwaei Kiptaiyat Kwanda kole: “Pwo eng' nganaseetap korotiik! Anee agine, aiiruruch keetiik kooi. 10Iriiruch keetiik, ikinde maat, iiyo panyeek komyee, ituiyo mwaita ne ikweng'sei, ak kobeel kawek. 11Yeityo inde tereet ne munyat paragutap nesekyik si kong'wanit ak kolal sugununnyi, si kochootyo murwoonindo oriit ak kobeel yomnateennyi. 12Kagong'etyo eng' poisyet, ago ma king'etunen yomnateennyi ne poi; tebee yomnateennyi agot eng' maat. 13Murwoonindeng'ung' ko atebeeng'ung' ne po teweernateet. Amu ki acheeng' aanyinyin, ago ma icham kianyiny, ma itiliiliitu kogeny agoi anyiit nereegennyu eng' inyee. 14Anee, Kwandang'ung', ka ang'alaal. Nyonei, ak ayai. Ma aeesyegei, ma auny, ak ma awal muguleldanyu. Kirwookyi inyee eng' ortinweguk ak yaitwekuk, mwaei Kiptaiyat Kwanda.”
Konam Kwanda Osotyotap Hesekiel
15Ki nyoonwo ng'olyootap Kwandanyo, kole:
16“Weeriitap chii, eng' pireet agenge, anam boiboietap konyeguk eng' inyee. Ago amat ite, amat iriir, ak mat kobut peegap konyeguk. b b v16 Meetap osotyotap Hesekiel koegu ileet ne sabei: aragetennyi ne ki king'etenchini koiboorunoi betanyeet ne oo ne ma imuuch kemwa ne tuun kogas Israel ye kobetyo Hekaluut. 17Itigen eng' ung'oot; amat ite agobo ne kameetyo. Ingotebee naaryeet meting'ung', ak kweonik eng' keelyeguk; amat ikuch kuting'ung', anan iam amitwogigap kateet.”
18Ki ang'alaalji piik eng' mornennooto; ki me osotyonnyu eng' koskolenyooto. Ki ayai eng' mornet ne siirei ko uu ye ki king'atwo.
19Yeityo koteebenwo piik, kole, Tos ma imwaiwech ne iboorun tuguuchu eng' echeek—amu nee si iyae uu ni?
20Ki aleenji icheek, ale, Ki nyoonwo ng'olyootap Kwandanyo, kole:
21Imwachi kootap Israel: Mwaei Kiptaiyat Kwanda kole: “Keer, areeny olennyu ne tiliil, menatetap kimnatengwong', boiboietap konyegwong', ne omsotei saboondangwong'; ak kobut weeriigwong' ak tiibiigwong' che ki opagakta eng' rotweet. 22Oyai ko uu ye ki ayai: ma okuch kutigwong', anan oam amitwogigap kateet. 23Tebee naaryegwong' eng' metigwong', ak kweonik eng' keelyegwong'. Ma ote, anan oriir, ago obetyo eng' tengekwogikwok ak otigenchigei. 24Egu Hesekiel ileet eng' okweek; oyai tugul che ki yai ineendet. Ye tuun konyo, onai ale aa Kiptaiyat Kwanda.
25“Ak inyee, Weeriitap chii—eng' peetuut ne tuun anam eng' icheek irimeennywa, boiboiyennywa ak toroorutyennywa, boiboietap konyenywa, omsotetap muguleldanywa, ak weeriikwak ak tiibiikwak, 26eng' peetuunooto, konyoonun chii ne kibetito si koibun logoiywek. 27Eng' peetuunooto, ye koit chii ne kibetito, koyaatu kuting'ung'; ing'alaal ak ma isiisyo kogeny. Iegu ileet eng' icheek, ak konai icheek ale aa Kwandang'ung'.”