Tukunyar Hukunci Mai Tafasa

A ranar da Babila ta fara kewaye birnin, Urushalima tukunya ce mai tsatsa da aka tafasa har ta bushe. A wannan maraice Ubanmu ya ɗauki matar Ezekiyel ya kuma hana shi yin makokinta, alama ce cewa sa'ad da haikali ya faɗi mutane za su yi mamaki har ba za su iya kuka ba.

Babi na 24.

A shekara ta tara, wata na goma, rana ta goma, maganar Ubanmu ta zo mini,

Ɗan mutum, ka rubuta sunan wannan rana, wannan rana kanta. Sarkin Babila ya kewaye Urushalima a wannan rana kanta. Ka yi wa gidan 'yan tawaye misali, ka ce musu, Ga abin da Uba Mai Iko Duka ya ce, “Ka ɗora tukunya a wuta, ka zuba ruwa a ciki. Ka sa guntayen nama a ciki, kowane yanki mai kyau, wato cinya da kafaɗa; ka cika ta da zaɓaɓɓun ƙasusuwa. Ka ɗauki zaɓaɓɓun tumaki daga garke, ka tsiba itace a ƙarƙashinta; ka sa ta tafasa, ka kuma dafa ƙasusuwanta a cikinta.”

Ga abin da Uba Mai Iko Duka ya ce, Kaiton birnin nan mai zub da jini, tukunyar da tsatsarta take a cikinta, wadda tsatsarta ba ta rabu da ita ba! A fitar da nama yanki-yanki; ba a jefa ƙuri'a dominta ba. ^a “Gama jininta yana tsakiyarta; ta ajiye shi a bisa dutse ƙeƙasasshe. Ba ta zubar da shi a ƙasa ba don ta rufe shi da ƙura. Don in tā da hasala in kuma yi sakayya, na ajiye jininta a bisa dutse ƙeƙasasshe, domin kada a rufe shi.”

Saboda haka Uba Mai Iko Duka ya ce, “Kaiton birnin nan mai zub da jini! Ni ma zan tsiba itace sosai. Ka ƙara itace, ka hura wuta, ka dafa nama sosai, ka gauraya kayan yaji, ka bar ƙasusuwa su ƙone. Sa'an nan ka ɗora tukunya wofi a kan garwashinta domin ta yi zafi, tagullarta kuma ta yi ja, domin a narkar da ƙazantarta a cikinta, a kuma ƙare tsatsarta. Ta gajiyar da kanta da wahala, duk da haka tsatsarta mai yawa ba za ta rabu da ita ba; tsatsarta na nan ko a cikin wuta. Ƙazantarki ita ce rashin kunyar ɗabi'arki. Domin na yi ƙoƙari in tsabtace ki amma kika ƙi tsabtuwa, ba za ki ƙara tsabta ba sai na huce fushina a kanki. Ni, Ubanki, na faɗa. Yana zuwa, zan kuma aikata. Ba zan janye ba, ba zan ƙyale ba, ba kuwa zan tausaya ba. Za su hukunta ki bisa ga hanyoyinki da ayyukanki, in ji Uba Mai Iko Duka.”

Uba Ya Ɗauki Matar Ezekiyel

Maganar Ubanmu ta zo mini,

“Ɗan mutum, da bugu ɗaya zan ɗauke maka farin cikin idanunka. Duk da haka kada ka yi makoki ko ka yi kuka, kada kuma hawaye su zubo. ^b Ka yi nishi shiru; kada ka yi makokin matattu. Ka ɗaura rawaninka, ka kuma sa takalma a ƙafafunka; kada ka rufe leɓunanka ko ka ci abincin masu makoki.”

Na yi wa mutane magana da safiyar nan; da yamma matata ta rasu. Washegari da safe na yi yadda aka umarce ni.

Sai mutane suka tambaye ni, Ba za ka gaya mana ma'anar waɗannan abubuwa a gare mu ba—me ya sa kake yin haka?

Sai na ce musu, Maganar Ubanmu ta zo mini,

Ka ce wa gidan Isra'ila, Ga abin da Uba Mai Iko Duka ya ce, “Ga shi, zan ƙazantar da wuri na mai tsarki, wato abin taƙamar ƙarfinku, farin cikin idanunku, abin marmarin ranku; 'ya'yanku maza da mata da kuka bari kuma za su mutu da takobi. Za ku yi yadda na yi, wato ba za ku rufe leɓunanku ba ko ku ci abincin masu makoki. Rawuna za su kasance a kawunanku, takalma kuma a ƙafafunku. Ba za ku yi makoki ko kuka ba, sai dai ku lalace cikin zunubanku, kuna nishi ga juna. Ta haka Ezekiyel ya zama alama a gare ku; za ku yi duk abin da ya yi. Sa'ad da wannan ya faru, za ku sani ni ne Uba Mai Iko Duka.

“Kai kuwa, ɗan mutum—a ranar da zan ɗauke musu kagararsu, farin cikinsu da ɗaukakarsu, farin cikin idanunsu, marmarin zuciyarsu, da 'ya'yansu maza da mata, a wannan rana wani wanda ya tsere zai zo wurinka yă kawo maka labari. A ranar nan, sa'ad da wanda ya tsere ya iso, bakinka zai buɗe; za ka yi magana, ba za ka ƙara yin shiru ba. Ta haka za ka zama alama a gare su, za su kuma sani ni ne Ubanku.”