Daudi ak Magati ne Tiliil
Kingo mweenotigei ak ma tinyei kariik, ki werenji Daudi tisiindet eng' Nob, ak kowe kobooto rotwetap Goliat ak magatiinik che kiisto eng' taitap Kwandanyo. Koger Doeg Edomindet tugul. Yeityo, kingo kagogeer eng' Gat, kosargei Daudi kingo kagowalegei koek ng'olilyot, kotemei saliisyek eng' tigeennyi ak kokururei kurgeet.
21 1Ki nyo Daudi ole mi Ahimelek tisiindet eng' Nob. Ki pwa Ahimelek kotorook ineendet kobotanionu, ak koteebee, “Amune imi inyee ineeng'ung', ma mi chii ne kobooten?” 2Ki leenji Daudi Ahimelek tisiindet, “Ki ang'at anee laitoryat ak kole, ‘Amat konai chii age tugul kiy age tugul agobo panda ne ayookten iwe ak kiy ne ka ang'atin.’ Ka arorchi murenikyik oli age. 3Nee anyun ne itinye? Igoono magatiinik mut, anan kiy age tugul ne imuuch inyooru.”
4Ki leenji tisiindet Daudi, “Ma atinye magatyat ne po otwoknot, atinye kityo magatyat ne tiliil—ngot ko ki ung'gei murenik eng' kwonyiik.”
5Ki wol Daudi tisiindet kole, “Iman ki kiistoyech kwonyiik, ko uu ye king'eetosi kotugul. Tiliil poorwegap murenik agot eng' panda ne po otwoknot; oo kosiir nooto anyun ra, kotiliil poorwekwak!” 6Ki igoochi anyun tisiindet ineendet magatyat ne tiliil, amu mi kityo magatiinik che po taita, che ki kiisto eng' taitap Kwandanyo si kinde magatyat ne lalang' eng' peetuut ne kiisto. a a v6 Magatiinik che po taitap Kwandanyo ko ki magatiinik taman ak aeng' che ki kiriibei eng' olit ne tiliil eng' taitap Kwandanyo ak kiwalei eng' wigit age tugul; ye mi otwoknot ko tisiik kityo che ki chamei koam.
7Ki mi age eng' otwogikyik Saulo eng' peetuunooto, ne ki kitononi eng' taitap Kwandanyo: Doeg Edomindet, kandoigap mestowegap Saulo.
8Ki teebe Daudi Ahimelek, “Tos itinye ng'otit anan rotweet yu? Ki ma aibu rotwennyu anan kariik, amu ki iyeny ng'atuutyetap laitoryat.”
9Ki le tisiindet, “Rotwetap Goliat Philistindet—Goliat, ne kibar inyee atebweetap Elah—mi yu, ne kilaakyi ngoryeet eng' let ap ephod. Nam ngot imache; ma mi age yu.” Ki le Daudi, “Ma mi age ne kergei ak ineendet; igoono.”
Kimwei Daudi Kwo Gath
10Ki ng'eet Daudi eng' peetuunooto ak komwei eng' Saulo, ak konyo ole mi Akis laitoryatap Gath. 11Ago ki wol otwogikyik Akis koleenji ineendet, “Tos ma Daudi niito, laitoryatap emet? Tos ma ineendet ne tyendos icheek agobo ineendet eng' ureryosyekwak, kole, ‘Ki par Saulo eliphusyekyik, kobar Daudi tamanusyegap eliphusyekyik’?”
12Ki konor Daudi ng'aleechooto eng' muguleldanyi, ak koiywei miising' Akis laitoryatap Gath. 13Kowal anyun Daudi yaityennyi eng' taita, ak koyai kou chii ne mugumetiin eng' taita; ki sir eng' kurgotigap kurgeet, ak koyai salisanyi kobwa tamnennyi. 14Ki leenji Akis otwogikyik, “Keer, ogeere chiini kole mugumetiin. Amune oibu ineendet ole amenye? 15Tos nwach anee mugumetik, si oibu niito koyai mugumet eng' anee? Tos ingobwa ineendet koong'wo?”