Dawid hoba Saopobü Wentek
Meimeian hoba insiaubu akibü Dawidei Noba ungshedbou to yepeikei, hoba Goliateibü in, seneibü Bou thedanga ka leibü wentek yoa longkei. Edombü Doegei kho pendou hapbei. Kheijinei Gata lamaleian, Dawidei yemdü phatko kümtian, koukhüm to lai kümko hoba nammaanga seret aplutan jembü langkei khümenkei.
21 1Dawid Noba ungshedbou Ahimelek jungto loukei. Hoba Ahimelek hao shuokla lühjilühko louan hao to phekei, “No aila alongda, no yoa müt che aki?” 2Dawidei ungshedbou Ahimelek to laukei, “Chobaei ngo la ngühkhüm kuko laukei, ‘Ngei no hautibü lam hoba ngei no la sakkubü abou müt cheei angejan.’ Ngei kü heshou shuong neichem che to hautikei. 3Tou nyi yoa ai kia? Kü la wentek ngao kushi, ayingsi nyi ai haplaje kho kushi.”
4Ungshedbouei Dawid to laukei, “Kü yoa kümsilei wentek aki, saopobü wentek ong kia—khei heshou shuong yaksa ka sungngaia longa.”
5Dawidei ungshedbou to jongaikei, “Ngo meimeijinei ponpendou tegü, yaksa kün ka sungngaia kia. Kümsilei lama haujinei kei heshou shuong mang kho saopobü ki; tat chaloua haoeneibü mang khülokche heeko saopobü kilabü?” 6Kheijinei ungshedbouei hao la saopobü wentek kukei, aishanga thedanga phobü wentek ong kikei—kho sungletbü chaloua lematham wentek jeila shanga Bou thedanga ka sungletbü kikei. a a v6 Bou thedanga phobü wentek kho wentek anthüknyi, saopobü neichema Bou thedanga phoan nounyet weko jeibü kikei; ponpendou tegü ungshedbou shuong ong kho shaula thükkei.
7Khünyet chalou Sauleibü sambü yoka che, Bou thedanga adaktia kibü khünei kikei; hao kho Edombü Doeg, Sauleibü sanlombü thüka kongnyu kikei.
8Dawidei Ahimelek to phekei, “Hanei nyi yoa aubu ayingsi in kia lo? Ngei kü in ayingsi insiaubu asungba, aishanga Chobaeibü ngühkhüm kho tongde kikei.”
9Ungshedbouei laukei, “Filistiabü Goliat, no Ela yomanga haitibü Goliateibü in, hanei neiei sholepan ungshed hele phai phobü kia. Nyi mangsühda longa kho louashi; aishanga hanei lubü che aki.” Dawidei laukei, “Kho tegübü aki; kü la kushi.”
Dawid Gat to Satenkei
10Khünyet chalou Dawid loenkei hoba Saul ka satenkei, hoba Gatbü Choba Akish jungto loukei. 11Lausikei Akisheibü sambü shuongei hao to laukei, “Ho kaodak kabü Choba Dawid kho aying lo? Haoenei ao shangabü ka chia atko, ‘Saulei haoeibü hajar haitikei, hoba Dawidei haoeibü hajar an haitikei,’ dogo laubü Dawid kho hao aying lo?”
12Dawidei habü ngüh haoeibü maangpona phokei, hoba Gatbü Choba Akish to aeibou hatkei. 13Kheijinei haoei haoen thedanga haoeibü jungeibü jeikei hoba haoen thedanga ngoubü tegü kümbei; haoei koukhün koukap to dokei hoba haoeibü eok kho sembung to yantikukei. 14Akishei haoeibü sambü shuong to laukei, “Chühashi, kanei müt kho ngoubü ki dogo hapkei. Aila kanei hao kü jungto leian loukei? 15Ngo yoa ngoubü shuong tuikei lo, kanei ho che kü thedanga ngoula leian loukei? Haoei kü chem to lotlabü lo?”
