Phongkhami 3

3 ¹"Sardisli khalei churchwui kazingraoli kapikhuilu: Ithumwui Avāwui Manglā shini kala sirā shini singa china hānga: Ina nawui ot kasā thei. Na kharinga da kaho ming lei, kha na thihaira.

²"Ngakarthuilu! Horhaida leikasā kala thikhavai khalei chi pangngasaklu, kaja ina nawui ot kasā iwui Avāwui mangāli kupchanghairasā da matheimana. ³Chiwui vang eina na kathada samphang kala nganā kahai chi phaningunglu; chi mayonlu, kala ning ngateilu. Na makarthuiakha, ina khale mi thāda rāra, kala ina nali khiwui atamli rārakhala kaji na matheimara. ⁴Kha Sardisli khalei na mi kateokha ngavai, athumwui kachon makhao mangasakbing; athum ili ngasoda kachar ngavaida zatra, kaja athum kanābingna. ⁵Khayuiapā chi athum thāda kachar kachon ngavaira, kala ina awui ming chi kharingwui lairikwui eina katang mavaila makhuithuimara. Ina awui ming chi iwui Avāwui mangāli kala awui kazingraobingwui mangāli mayāmira. ⁶Khanā kakā a china Manglā Katharana churchbingli kahāng chi nganākhuiranu.

Philadelphiali

⁷"Kala Philadelphiali khalei churchwui kazingraoli kapikhuilu: Kathara, akachanga, Davidwui sho kasinga, ana shora chi khipānakha mashungmara, ana shungra chi khipānakha mashomara, chi china hithāda hānga:

⁸"Ina nawui ot kasā thei. Yanglu, ina nawui mangāli khipānakha mashungshapa khāmong shokahai akha haira; kaja na pangshap kateokha ngavai, chithālala iwui tui mayonhaira, kala iwui ming mazatmana. ⁹Yanglu, Jehudina da hānglaga maningkasā kakapika, Satanwui synagoguewui eina kaikhali, ina athumli rāda nawui pheiwui mangāli khuktizangda ngasakra, kala ina nali leishihaira kaji athumna theira. ¹⁰Na iwui khāngkatheiwui tui mayonhaira kaji vang eina, okathuili khaleibingli chāng khayang khavai okathui katongawuitungli rākhavai chāng khayang atamwui eina inala nali yangmira. ¹¹Ina thākta rāra. Khipānakha nawui kuihon matukkhuipaishina, nawui khalei chi singtitmalu. ¹²Khayuiapā chili, ina ali iwui Avāwui khorumshimli pakra̱ akha sāra, kala a katang mavaila chiwui eina mathuimara. Awuitungli ina iwui Avāwui ming, kazingramwui eina iwui Avāwui eina katāda khalei iwui Avāwui keinung Jerusalem kadharwui ming, kala iwui ming kadhar chila kapisangra. ^a a v12 Jishuna hili Vare da kahāng tharan, ana Avā chi phokmi—ali chihovāpā, awui khorumshim ana sāda, awui keinung kazingramwui eina katāda khalei chi. ¹³Khanā kakā a china Manglā Katharana churchbingli kahāng chi nganākhuiranu.

Laodiceali

¹⁴"Laodiceali khalei churchwui kazingraoli kapikhuilu: Ningkatonga kala akachanga shākhi, ithumwui Avāwui sākahaiwui haokaphok, Amen china hānga: ^b b v14 Jishu hi haokaphokna, awui eina ithumwui Avāna ot saikora sāmi—pharā sākahai chi maningmana, kha awui eina sākahai ot saikora shokkahai china (John 1:3; Col 1:16).

¹⁵"Ina nawui ot kasā thei: na khamakui maningla, lah kāngma maningmana. Na khamakui lah kāngma sasi kaja phāralā! ¹⁶Chiwui vang eina, na kāngma maningla, khamakui maningmana; na lumra̱sa̱ sāhaiwui vang ina nali iwui khamorwui eina machora̱ mashorthat khavai lei. ¹⁷Na, 'Ina kashānga, ina shānghaira, kala ina khikha makhavātmana,' da hāngkahaiwui vang, na kalākashi, khamayo kānnā, kachāma, mik khangapeo, kala asāmsai eina khalei kaji matheimana. ¹⁸Ina nali hāngchitheiga: iwui eina meili ruikhayang sinā lokhuilu, chithākha nathum kashānga ngasāra; kala ngavai khavai kachon kachar lokhuilu, chithākha nathumwui khamahong khayā matheipaimara; kala namik neomi khavai thao lokhuilu, chithākha nathumna theira. ¹⁹Ina leishi kahaibing chili ina khararmi kala machinmi. Chiwui vang eina ngachonngailu kala ning ngateilu. ²⁰Yanglu! Ina khāmongpheili nganingda khāmong shaoda lei. Kachikathāna iwui akhon shāda khāmong shoakha, ina awuili rākhavāra, awui ngasoda phazāra, kala anala ili ngasoda phazāra. ²¹Ina khalattala yuilaga iwui Avā ngasoda awui wungpamkhongli pamsai thada, inala khayuia chili ili ngasoda iwui wungpamkhongli pamngasakra. ²²Khanā kakā a china Manglā Katharana churchbingli kahāng chi nganākhuiranu."