Phongkhami 2

2 ¹"Ephesusli khalei churchwui kazingraoli hi kapikhuilu: Awui yāpāngli sirā shini kasinga, sinā thaomeishong shiniwui ngachaili kazata a china hi hānga:

²"Ina nawui otsak, nawui yāng, kala nawui khāngkathei thei, kala nana makaphā-makhayābingli maphungshapmana kaji thei; themlāk paokazata da jibing, kha maningbing chili nana tam, kala athumli kakapika da phākhui. ³Nana iwui mingwui vang phungda khānghaira, kala ngachāng machatmana. ⁴Kha ina nawuili hi khayon lei: nana khareli kai leikashi chi horhaira. ⁵Chiwui vang eina na khataramwui eina pitakhala kaji phaningunglu; ningngateilu kala nawui khare otsak chi sālu. Na ning mangateiakha, ina nawuili rāda nawui thaomeishong chi apamwui eina khuithuira. ⁶Kha nawuili hi lei: nana Nicolaitanbingwui otsak chi yangkharinga, chi inala yangkharinga. ⁷Khanā kakā a china Manglā Katharana churchbingli kahahāng chi nganākhuiranu. Khayuia chili ina ithumwui Avāwui Paradiseli khalei kharing thing chi zākhavai mira.

Khare kala Naomeikapa

⁸"Smyrnali khalei churchwui kazingraoli hi kapikhuilu: Khare kala Naomeikapta, thikahaia latluida kharingkahai a china hi hānga:

⁹"Ina nawui kachotkachāng kala nawui chām thei; chithālala na kashāngana. Akhalattali Jehudi da jibing, chithālala Jehudi makhaning, Satanwui synagogue khaleibingwui khamashāt tuila ina thei. ¹⁰Na phungra kachotkachāng chi mangacheealu. Yanglu, chipeena chāng tam khavai nathumwui kaikhali phātopli zangra; kala nathumna tharāthang kachotkachāng phungra. Kathi eina tangda ningkatonga leilu, chithākha ina nali kharingwui kuihon mira. ¹¹Khanā kakā a china Manglā Katharana churchbingli kahahāng chi nganākhuiranu. Khayuia chi kakhane kathina khamā mazakhuimara.

Zankhangasung Kazana Raighai

¹²"Pergamumli khalei churchwui kazingraoli hi kapikhuilu: Zankhangasung kazana raighai kasinga a china hi hānga:

¹³"Na khataramli leikhala kaji ina thei; chi Satanwui wungpamkhong khalei apamna. Chithālala nana iwui ming singtita, kala Satan kapam apam chili, nathumwui ngachaili iwui ningkatonga shākhi Antipas shaothatkahai tharanla, iwuili nawui shitkasang chi makhalanmana. ¹⁴Kha ina nawuili khayon kateokha lei: apamli kaikhana Balaamwui tamkachithei chi singtita. Ana Balakli Israelwui mangāli phei ngaphok ngasak khavai, meoma̱li pha̱phayai kashakazā zākhavai kala khangaso otsak sākhavai tamchithei. ¹⁵Chithāpapama nawuili Nicolaitanbingwui tamkachithei singkasā kaikha lei. ¹⁶Chiwui vang ningngateilu. Chi maningakha, ina thākta nawuili rāda, iwui khamorwui raighai eina chi singkasabingli ngararra. ¹⁷Khanā kakā a china Manglā Katharana churchbingli kahahāng chi nganākhuiranu. Khayuia chili ina ngathum kahai manna mira, kala kachar lunggui akha mira; awuitungli kadhar aming kapisang kahai lei, chi kāsamphanga maningla katei matheimana.

Mik Meiwon Thāda

¹⁸"Thyatira churchwui kazingraoli kapilu: ithumwui Avāwui Naomayara, awui mik meiwon thāda kala aphei kashutkharik kahai pithrai thāda kahai china hithāda hānga:

¹⁹Ina nawui otsak, nawui leikashi, shitkasang, otram khangatha̱, kala khāngkathei theisera; kala nawui otsak khanaowa china khare chi langmei kaji theisera. ²⁰Kha ina nathumtungli hi khamayā leikahaina: akhalatta marān da kahoa sha̱nao Jezebel chili nathumna khayang; ana iwui raobingli tamchitheida phophāli kala meoma̱li pha̱kahai kashakazā phāshakta mikhanam ngasaka. ²¹Ina ali ningngatei khavai atam mi, kha ana awui phokaphāwui eina maningngateimana. ²²Ina ali kakazā petli horkhaira, kala ali phophā kasābingli, athumna awui kasāwui eina mangareithuiakha, kachotkachāng mangāli horkhaira. ²³Kala ina awui naongarāli shaothatra. Chithākha church saikorana ning kala wuklungli kapeoyanga kahai china ina kaji theira, kala ina nathum kachiva̱li nathumwui otsak athishurda sāman mira. ²⁴Kha Thyatirali khalei nathum kateibing, hi tamkachithei masingtitbing, Satanwui khangathuma kathuka da kahoa chi matamkhuibingli: ina nathumtungli otphun khangatei masangmara. ²⁵Kha ina rāranglakha eina tangda nathumwui leikahai chi ngavaptitlu. ²⁶Khayuia, kala iwui otsak khanao eina tangda mayona chili, ina miyurbingtungli pangshap mira, ²⁷kala ina iwui Avāwui eina pangshap samphanga thāda, ana mari khāmshui eina athumli mungra, leikhon ham thāda athumli shaokhaira. ²⁸Kala ina ali ngathor sirā mira. ²⁹Khanā kakā a china Manglā Katharana churchbingli kahāng chi nganākhuiranu."