مکاشفہ 2

2 ¹”اِفسس کی کلیسیا کے فرشتے کو لِکھ: جو اپنے دہنے ہاتھ میں سات ستارے تھامے ہوئے ہے اور سونے کے سات چراغدانوں کے درمیان چلتا ہے، وہ یہ فرماتا ہے:

²”میں تیرے کاموں کو، تیری محنت اور تیری برداشت کو جانتا ہوں، اور یہ کہ تُو بدکاروں کو برداشت نہیں کر سکتا؛ اور تُو نے اُنہیں آزمایا جو اپنے آپ کو رسول کہتے ہیں مگر ہیں نہیں، اور اُنہیں جھوٹا پایا۔ ³تُو نے صبر کیا اور میرے نام کی خاطر بوجھ اُٹھایا، اور تھکا نہیں۔ ⁴مگر مجھے تجھ سے یہ شکایت ہے: تُو نے وہ محبت چھوڑ دی جو تجھے پہلے تھی۔ ⁵پس یاد کر کہ تُو کہاں سے گِرا ہے؛ توبہ کر اور اپنے پہلے کام کر۔ ورنہ میں تیرے پاس آؤں گا اور تیرے چراغدان کو اُس کی جگہ سے ہٹا دوں گا—بجز اِس کے کہ تُو توبہ کرے۔ ⁶لیکن تجھ میں یہ بات ہے: تُو نیکُلیوں کے کاموں سے نفرت کرتا ہے، جن سے میں بھی نفرت کرتا ہوں۔ ⁷جس کے کان ہوں وہ سُنے کہ رُوحُ القُدس کلیسیاؤں سے کیا فرماتا ہے۔ جو غالب آئے گا اُسے میں ہمارے باپ کے فردوس میں زندگی کے درخت میں سے کھانے کو دوں گا۔

اوّل اور آخر

⁸”سمُرنہ کی کلیسیا کے فرشتے کو لِکھ: جو اوّل اور آخر ہے، جو مَر گیا اور پھر زندہ ہوا، وہ یہ فرماتا ہے:

⁹”میں تیری مصیبت اور غربت کو جانتا ہوں—حالانکہ تُو دولت مند ہے—اور اُن کی بدگوئی کو بھی جو اپنے آپ کو یہودی کہتے ہیں مگر ہیں نہیں، بلکہ شیطان کی عبادت گاہ ہیں۔ ¹⁰جو دُکھ تُو اُٹھانے کو ہے اُس سے خوف نہ کھا۔ دیکھ، اِبلیس تم میں سے بعض کو قید میں ڈالنے کو ہے تاکہ تم آزمائے جاؤ؛ اور تم دس دن تک مصیبت اُٹھاؤ گے۔ تُو موت تک وفادار رہ، اور میں تجھے زندگی کا تاج دوں گا۔ ¹¹جس کے کان ہوں وہ سُنے کہ رُوحُ القُدس کلیسیاؤں سے کیا کہتا ہے۔ جو غالب آئے گا اُسے دوسری موت سے کوئی نقصان نہ پہنچے گا۔

تیز دو دھاری تلوار

¹²”پرگمُن کی کلیسیا کے فرشتے کو لِکھ: جس کے پاس تیز دو دھاری تلوار ہے، اُس کے یہ الفاظ ہیں:

¹³”میں جانتا ہوں کہ تُو کہاں رہتا ہے—جہاں شیطان کا تخت ہے۔ پھر بھی تُو میرے نام پر قائم ہے اور تُو نے مجھ پر اپنے ایمان کا اِنکار نہ کیا، حتیٰ کہ اُس وقت بھی جب اَنتِپاس، میرا وفادار گواہ، تمہارے درمیان قتل کیا گیا، جہاں شیطان رہتا ہے۔ ¹⁴مگر مجھے تجھ سے چند باتوں کی شکایت ہے: وہاں بعض ایسے ہیں جو بلعام کی تعلیم پر قائم ہیں۔ اُس نے بلق کو سکھایا کہ اِسرائیل کے سامنے ٹھوکر رکھے، تاکہ وہ بُتوں کی قربانی کا کھانا کھائیں اور حرام کاری کریں۔ ¹⁵اِسی طرح تجھ میں بھی بعض ایسے ہیں جو نیکُلیوں کی تعلیم پر قائم ہیں۔ ¹⁶پس توبہ کر۔ ورنہ میں جلد تیرے پاس آؤں گا اور اپنے مُنہ کی تلوار سے اُن سے لڑوں گا جو اُس تعلیم پر قائم ہیں۔ ¹⁷جس کے کان ہوں وہ سُنے کہ رُوحُ القُدس کلیسیاؤں سے کیا کہتا ہے۔ جو غالب آئے گا اُسے میں چھپا ہوا مَنّ دوں گا اور ایک سفید پتھر بھی، جس پر ایک نیا نام لکھا ہوگا جسے پانے والے کے سوا کوئی نہیں جانتا۔

شعلے کی مانند آنکھیں

¹⁸”تُھواتیرہ کی کلیسیا کے فرشتے کو لِکھ: ہمارے باپ کا بیٹا، جس کی آنکھیں آگ کے شعلے کی مانند ہیں اور پاؤں چمکتے ہوئے پیتل کی مانند، وہ یہ فرماتا ہے:

¹⁹”میں تیرے کاموں کو جانتا ہوں—تیری محبت، ایمان، خدمت اور برداشت کو—اور یہ کہ تیرے پچھلے کام پہلوں سے بڑھ کر ہیں۔ ²⁰مگر مجھے تجھ سے یہ شکایت ہے: تُو اُس عورت اِیزبل کو برداشت کرتا ہے، جو اپنے آپ کو نبیہ کہتی ہے، اور میرے بندوں کو تعلیم دے کر گمراہ کرتی ہے کہ وہ حرام کاری کریں اور بُتوں کی قربانی کا کھانا کھائیں۔ ²¹میں نے اُسے توبہ کرنے کی مہلت دی، مگر وہ اپنی حرام کاری سے توبہ نہیں کرنا چاہتی۔ ²²دیکھ، میں اُسے بیماری کے بستر پر ڈال دوں گا، اور اُن کو جو اُس کے ساتھ زنا کرتے ہیں بڑی مصیبت میں، بجز اِس کے کہ وہ اُس کے کاموں سے باز آئیں۔ ²³اور میں اُس کے بچوں کو مار ڈالوں گا۔ تب سب کلیسیائیں جان لیں گی کہ دِلوں اور باطنوں کو جانچنے والا میں ہی ہوں، اور میں تم میں سے ہر ایک کو اُس کے کاموں کے مطابق بدلہ دوں گا۔ ²⁴لیکن تم میں سے باقی جو تُھواتیرہ میں ہو، جو اِس تعلیم پر قائم نہیں، جنہوں نے شیطان کی نام نہاد گہری باتیں نہیں سیکھیں: میں تم پر کوئی اَور بوجھ نہیں ڈالتا۔ ²⁵بس جو تمہارے پاس ہے اُسے مضبوطی سے تھامے رہو جب تک میں نہ آؤں۔ ²⁶جو غالب آئے گا اور آخر تک میرے کاموں پر قائم رہے گا، اُسے میں قوموں پر اِختیار دوں گا، ²⁷اور وہ لوہے کے عصا سے اُن پر حکومت کرے گا، اور اُنہیں مٹی کے برتنوں کی مانند چکناچور کرے گا—جیسا کہ میں نے بھی اپنے باپ سے اِختیار پایا۔ ²⁸اور میں اُسے صبح کا ستارہ دوں گا۔ ²⁹جس کے کان ہوں وہ سُنے کہ رُوحُ القُدس کلیسیاؤں سے کیا فرماتا ہے۔“