ራእይ 2

2 ¹“በኤፌሶን ላለችው ቤተ ክርስቲያን መልአክ እንዲህ ብለህ ጻፍ፤ ሰባቱን ከዋክብት በቀኝ እጁ የያዘ፣ በሰባቱ የወርቅ መቅረዞች መካከል የሚመላለሰው እንዲህ ይላል፤

²“ሥራህን፣ ድካምህንና ትዕግሥትህን ዐውቃለሁ፤ ክፉዎችንም ልትታገሥ እንዳትችል ዐውቃለሁ፤ ሐዋርያት ነን የሚሉትን ሳይሆኑ ፈተንሃቸው፣ ውሸታሞችም ሆነው አገኘሃቸው። ³ስለ ስሜ ታግሠህ ጸንተሃል፣ አልደከምህም። ⁴ነገር ግን የምነቅፍብህ ይህ አለኝ፤ መጀመሪያ የነበረህን ፍቅር ትተሃል። ⁵ስለዚህ ከወዴት እንደ ወደቅህ አስብ፤ ንስሐም ግባ፣ የቀድሞውንም ሥራ አድርግ። አለዚያ ወደ አንተ መጥቼ መቅረዝህን ከስፍራው አነሣለሁ፤ ንስሐ ባትገባ በቀር። ⁶ነገር ግን ይህ አለህ፤ እኔ ደግሞ የምጠላውን የኒቆላውያንን ሥራ ትጠላለህ። ⁷ጆሮ ያለው መንፈስ ቅዱስ ለአብያተ ክርስቲያናት የሚለውን ይስማ። ለሚያሸንፍ በአባታችን ገነት ካለው ከሕይወት ዛፍ እንዲበላ እሰጠዋለሁ።

ፊተኛውና ኋለኛው

⁸“በሰምርኔስ ላለችው ቤተ ክርስቲያን መልአክ እንዲህ ብለህ ጻፍ፤ የሞተና እንደ ገና በሕይወት የኖረ፣ ፊተኛውና ኋለኛው እንዲህ ይላል፤

⁹“መከራህንና ድኽነትህን ዐውቃለሁ፤ ነገር ግን ባለጠጋ ነህ፤ አይሁዳውያን ነን የሚሉትን ሳይሆኑ የሚሳደቡብህን ስድብም ዐውቃለሁ፤ የሰይጣን ምኵራብ ናቸው። ¹⁰ልትቀበለው ያለውን መከራ አትፍራ። ዲያብሎስ ይፈትናችሁ ዘንድ ከእናንተ አንዳንዶችን ወደ እስር ቤት ይጥላል፤ ዐሥር ቀንም መከራ ትቀበላላችሁ። እስከ ሞት ድረስ ታማኝ ሁን፣ የሕይወትንም አክሊል እሰጥሃለሁ። ¹¹ጆሮ ያለው መንፈስ ቅዱስ ለአብያተ ክርስቲያናት የሚለውን ይስማ። የሚያሸንፍ በሁለተኛው ሞት አይጎዳም።

ሁለት አፍ ያለው ስለታም ሰይፍ

¹²“በጴርጋሞን ላለችው ቤተ ክርስቲያን መልአክ እንዲህ ብለህ ጻፍ፤ ሁለት አፍ ያለው ስለታም ሰይፍ ያለው እንዲህ ይላል፤

¹³“የምትኖርበትን ስፍራ፣ ሰይጣን ዙፋኑ ያለበትን ዐውቃለሁ። ነገር ግን ስሜን አጥብቀህ ይዘሃል፤ ሰይጣን በሚኖርበት በእናንተ መካከል ታማኝ ምስክሬ አንቲጳስ በተገደለበት ጊዜ እንኳ በእኔ ያለህን እምነት አልካድህም። ¹⁴ነገር ግን የምነቅፍብህ ጥቂት ነገር አለኝ፤ በዚያ የበልዓምን ትምህርት የሚይዙ አሉ። እርሱ ለእስራኤል ልጆች መሰናክል ያኖር ዘንድ፣ ለጣዖት የተሠዋውን እንዲበሉና ዝሙት እንዲፈጽሙ ባላቅን አስተማረ። ¹⁵እንዲሁም የኒቆላውያንን ትምህርት የሚይዙ አንዳንዶች አሉህ። ¹⁶እንግዲህ ንስሐ ግባ። አለዚያ ፈጥኜ ወደ አንተ እመጣለሁ፤ የሚይዙትንም በአፌ ሰይፍ እዋጋቸዋለሁ። ¹⁷ጆሮ ያለው መንፈስ ቅዱስ ለአብያተ ክርስቲያናት የሚለውን ይስማ። ለሚያሸንፍ የተሰወረ መናን እሰጠዋለሁ፤ የተቀበለው ብቻ የሚያውቀው አዲስ ስም የተጻፈበትንም ነጭ ድንጋይ እሰጠዋለሁ።

እንደ ነበልባል ያሉ ዐይኖች

¹⁸“በትያጥራ ላለችው ቤተ ክርስቲያን መልአክ እንዲህ ብለህ ጻፍ፤ ዐይኖቹ እንደ እሳት ነበልባል፣ እግሮቹም የጋለ ናስ የሚመስሉ የአባታችን ልጅ እንዲህ ይላል፤

¹⁹“ሥራህን ዐውቃለሁ፤ ፍቅርህን፣ እምነትህን፣ አገልግሎትህንና ትዕግሥትህን ዐውቃለሁ፤ የኋለኛውም ሥራህ ከፊተኛው እንደሚበልጥ ዐውቃለሁ። ²⁰ነገር ግን የምነቅፍብህ ይህ አለኝ፤ ነቢይ ነኝ የምትለውን ኤልዛቤልን የተባለችውን ሴት ትታገሣታለህ፤ እርሷም አገልጋዮቼን ዝሙት እንዲፈጽሙና ለጣዖት የተሠዋውን እንዲበሉ እያስተማረች ታስታቸዋለች። ²¹ንስሐ ትገባ ዘንድ ጊዜ ሰጠኋት፤ ነገር ግን ከዝሙቷ ንስሐ ለመግባት አልወደደችም። ²²በደዌ አልጋ ላይ እጥላታለሁ፤ ከእርሷ ጋራ የሚያመነዝሩትንም ከሥራዋ ንስሐ ባይገቡ በቀር ወደ ታላቅ መከራ እጥላቸዋለሁ። ²³ልጆቿንም በሞት እመታለሁ። ያን ጊዜ አብያተ ክርስቲያናት ሁሉ ልብንና ኵላሊትን የምመረምር እኔ እንደ ሆንሁ ያውቃሉ፤ ለእያንዳንዳችሁም እንደ ሥራችሁ እከፍላችኋለሁ። ²⁴ነገር ግን በትያጥራ ላላችሁ ለቀሩት፣ ይህን ትምህርት ለማትይዙ፣ የሰይጣንን ጥልቅ ነገር የተባለውን ላልተማራችሁ እላችኋለሁ፤ ሌላ ሸክም አልጭንባችሁም። ²⁵ዳሩ ግን እስክመጣ ድረስ ያላችሁን አጥብቃችሁ ያዙ። ²⁶የሚያሸንፍና እስከ መጨረሻ ሥራዬን የሚጠብቅ፣ በአሕዛብ ላይ ሥልጣን እሰጠዋለሁ፤ ²⁷እኔ ደግሞ ከአባቴ ሥልጣን እንደ ተቀበልሁ፣ እንደ ሸክላ ዕቃ እየሰባበራቸው በብረት በትር ይገዛቸዋል። ²⁸የንጋትንም ኮከብ እሰጠዋለሁ። ²⁹ጆሮ ያለው መንፈስ ቅዱስ ለአብያተ ክርስቲያናት የሚለውን ይስማ።”