وحی 2 FHB Father's Heart Bible™

2 ¹«اَفِسده اولان کئلئسانین مَله‌یئنه یاز: یدّی اولدوزو صاغ الئنده توتان، یدّی قیزیل چیراقدانین آراسیندا گَزَن بله دیئر:

²«سنئن عمل‌لرئنی، زحمتئنی و صبرئنی بئلئرم، و بئلئرم کی، پئس آداملارا دؤزه بئلمزسن؛ اؤزلرئنه حواری دیئن، آمّا حواری اولمایان آداملاری ائمتاحان اتدئن و اونلاری یالانچی تاپدین. ³منئم آدیما گؤره صبر ادئب دؤزوبسن و یورولمامیسان. ⁴آمّا سنئن ضئدّئنه بو سؤزوم وار: اوّلکی محبّتئنی ترک اتدئن. ⁵اونا گؤره یادینا سال کی، هارادان ییخیلیبسان؛ تؤوبه ات و اوّلکی عمل‌لرئنی گؤر. یوخسا یانینا گلئب چیراقدانینی اؤز یرئندن گؤتوره‌جیم، مگر کی، تؤوبه اده‌سن. ⁶آمّا سنده بو وار: نئکولاسچیلارین عمل‌لرئندن نئفرت ادئرسن کی، من ده اونلاردان نئفرت ادئرم. ⁷قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلنه ائجازه وره‌جیم کی، آتامیزین جنّتئنده اولان حیات آغاجیندان یِسئن.

بئرئنجی و آخیرینجی

⁸«ائزمئرده اولان کئلئسانین مَله‌یئنه یاز: اؤلوب گئنه حیاتا قاییدان بئرئنجی و آخیرینجی بله دیئر:

⁹«سنئن عذابینی و یوخسوللوغونو بئلئرم، آمّا سن وارلیسان؛ و اؤزلرئنی یهودی ادّئعا ادن، آمّا یهودی اولمایان، یعنی شیطان کنئسه‌سی اولانلارین بؤهتانینی بئلئرم. ¹⁰چکه‌جه‌یئن عذابدان قورخما. باخ، ائبلئس سئزی ائمتاحان اتمک اوچون بعضی‌لرئنئزی زئندانا سالاجاق؛ اون گون عذاب چکه‌جکسئنئز. اؤلَنه‌جک وفالی اول، و من سنه حیات تاجینی وره‌جیم. ¹¹قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلن ائکئنجی اؤلومدن ضرر گؤرمه‌یه‌جک.

ائتی ائکی آغیزلی قیلینج

¹²«پِرقاموندا اولان کئلئسانین مَله‌یئنه یاز: ائتی، ائکی آغیزلی قیلینجی اولان بله دیئر:

¹³«هارادا یاشادیغینی بئلئرم، یعنی شیطانین تختی اولان یرده. آمّا سن منئم آدیمی برک توتوبسان و منه اولان ائمانینی هچ ائنکار اتمه‌دئن، حتّا او واختدا کی، شیطانین یاشادیغی یرده، سئزئن آرانیزدا منئم وفالی شاهئدئم آنتئپاس اؤلدورولدو. ¹⁴آمّا سنئن ضئدّئنه بئر نئچه سؤزوم وار: اورادا بعضئلری بَلعامین تعلئمئنی توتورلار. بَلعام بالاقا اؤیرَتدی کی، ائسرایئلئن قاباغینا بودره‌دن قویسون، اونلار دا بوتلره قوربان ورئلَن یمکلردن یسئنلر و زئنا اتسئنلر. ¹⁵بله‌جه سنده ده بعضئلری وار کی، نئکولاسچیلارین تعلئمئنی توتورلار. ¹⁶اونا گؤره تؤوبه ات. یوخسا تزلئکله یانینا گلئب، آغزیمین قیلینجی ائله اونو توتانلارلا دؤیوشه‌جَیم. ¹⁷قولاغی اولان، قوی اشئتسئن کی، موقدّس روح کئلئسالارا نه دیئر. قالئب گلنه گئزلئن مانّا وره‌جیم و اوستونده تزه بئر آد یازیلمیش آغ بئر داش وره‌جیم کی، او آدی اونو آلاندان باشقا هچ کس بئلمئر.

آلوو کئمی گؤزلر

¹⁸«تئیاتئرادا اولان کئلئسانین مَله‌یئنه یاز: گؤزلری اود آلووو کئمی، آیاقلاری دا جئلالانمیش بورونج کئمی اولان آتامیزین اوغلو بله دیئر:

¹⁹«سنئن عمل‌لرئنی بئلئرم، یعنی محبّتئنی، ائمانینی، خئدمتئنی و صبرئنی؛ و بئلئرم کی، سونرا اتدئیئن عمل‌لر اوّلکی‌لردن اوستوندور. ²⁰«آمّا سنئن ضئدّئنه بو سؤزوم وار: اؤزونه پیغمبر دیئن ائزِبِل آدلی آروادا دؤزورسن کی، منئم قوللاریمی تعلئم ورئب آزدیریر، اِله کی، زئنا اتسئنلر و بوتلره قوربان ورئلَن یمکلردن یسئنلر. ²¹من اونا تؤوبه اتمک اوچون واخت وردئم، آمّا او اؤز زئناسیندان تؤوبه اتمک ائسته‌مئر. ²²باخ، من اونو ناخوش یاتاغینا سالاجاغام، و اونونلا زئنا ادنلری ده بؤیوک عذابا سالاجاغام، مگر کی، اونون عمل‌لرئندن دؤنسونلر. ²³و اونون اؤولادلارینی اؤلدوره‌جیم. او زامان بوتون کئلئسالار بئله‌جکلر کی، فئکئرلری و اورَکلری آختاران منم، و هر بئرئنئزه اتدئیئنئز عمل‌لره گؤره عوض وره‌جیم. ²⁴آمّا تئیاتئرادا اولان سئز قالانلارا، یعنی بو تعلئمی توتمایان و شیطانین سؤزده درئن شیلرئنی اؤیرَنمه‌یَن آداملارا دیئرم: سئزئن اوستونوزه باشقا بئر یوک قویمارام. ²⁵آنجاق من گلنه قدر، الئنده اولانی برک توت. ²⁶قالئب گلن و منئم عمل‌لرئمی آخیراجاق ساخلایان آداما، مئلّتلرئن اوستونده حاکئمئیّت وره‌جیم، ²⁷و او، اونلارا دمئر عصا ائله حؤکمرانلیق اده‌جک، اونلاری گئل قابلار کئمی سیندیراجاق، نجه کی، من ده آتامدان حاکئمئیّت آلمیشام. ²⁸و من اونا دان اولدوزونو وره‌جیم. ²⁹قولاغی اولان، قوی اشئتسئن کی، موقدّس روح کئلئسالارا نه دیئر.»