Ufunuo 2

2 ¹"Kwa malaika wa kanisa lililoko Efeso andika: Yeye ashikaye zile nyota saba katika mkono wake wa kuume, atembeaye katikati ya vile vinara saba vya dhahabu, asema hivi:

²"Nayajua matendo yako, na taabu yako, na saburi yako, na ya kuwa huwezi kuwavumilia watu waovu; ukawajaribu wale wajiitao mitume nao sio, ukawaona kuwa waongo. ³Nawe umevumilia na kustahimili kwa ajili ya jina langu, wala hukuchoka. ⁴Lakini nina neno juu yako, kwamba umeuacha upendo wako wa kwanza. ⁵Basi kumbuka ni wapi ulikoanguka; tubu, ukayafanye matendo yako ya kwanza. La sivyo, naja kwako nikakiondoe kinara chako mahali pake—usipotubu. ⁶Lakini una jambo hili: unayachukia matendo ya Wanikolai, ambayo mimi nami nayachukia. ⁷Yeye aliye na sikio, na alisikie neno hili ambalo Roho Mtakatifu ayaambia makanisa. Yeye ashindaye nitampa kula matunda ya mti wa uzima, ulio katika paradiso ya Baba yetu.

Wa Kwanza na wa Mwisho

⁸"Kwa malaika wa kanisa lililoko Smirna andika: Wa kwanza na wa mwisho, aliyekufa kisha akawa hai tena, asema hivi:

⁹"Nayajua mateso yako na umaskini wako—lakini u tajiri—na matukano ya wale wajisemao kuwa Wayahudi nao sio, bali ni sinagogi la Shetani. ¹⁰Usiogope mambo yatakayokupata. Tazama, Ibilisi atawatupa baadhi yenu gerezani ili mjaribiwe; nanyi mtapata dhiki siku kumi. Uwe mwaminifu hata kufa, nami nitakupa taji ya uzima. ¹¹Yeye aliye na sikio, na alisikie neno hili ambalo Roho Mtakatifu ayaambia makanisa. Yeye ashindaye hatadhurika kwa mauti ya pili.

Upanga Mkali Wenye Makali Kuwili

¹²"Kwa malaika wa kanisa lililoko Pergamo andika: Haya ndiyo maneno yake yeye aliye na ule upanga mkali wenye makali kuwili:

¹³"Napajua mahali ukaapo—ndipo penye kiti cha enzi cha Shetani. Nawe walishika sana jina langu, wala hukuikana imani yako kwangu, hata katika siku zile ambazo Antipa, shahidi wangu mwaminifu, aliuawa kwenu, mahali akaapo Shetani. ¹⁴Lakini nina maneno machache juu yako, kwa sababu unao huko watu washikao mafundisho ya Balaamu, aliyemfundisha Balaki kuweka kikwazo mbele ya wana wa Israeli, kula vitu vilivyotolewa sadaka kwa sanamu na kufanya uzinzi. ¹⁵Vivyo hivyo wewe nawe unao watu washikao mafundisho ya Wanikolai vile vile. ¹⁶Basi tubu; la sivyo, naja kwako upesi, nami nitapigana nao kwa upanga wa kinywa changu. ¹⁷Yeye aliye na sikio, na alisikie neno hili ambalo Roho Mtakatifu ayaambia makanisa. Yeye ashindaye nitampa baadhi ya ile mana iliyofichwa, nami nitampa jiwe jeupe lililoandikwa jina jipya asilolijua mtu ila yeye alipokealo.

Macho Kama Mwali wa Moto

¹⁸"Kwa malaika wa kanisa lililoko Thiatira andika: Mwana wa Baba yetu, aliye na macho yake kama mwali wa moto, na miguu yake kama shaba iliyosuguliwa, asema hivi:

¹⁹"Nayajua matendo yako—na upendo wako, na imani yako, na huduma yako, na saburi yako—na ya kuwa matendo yako ya mwisho yamezidi yale ya kwanza. ²⁰Lakini nina neno juu yako, kwamba wamvumilia yule mwanamke Yezebeli, ajiitaye nabii; naye anafundisha na kuwapoteza watumishi wangu waingie katika uzinzi na kula vitu vilivyotolewa sadaka kwa sanamu. ²¹Nami nalimpa muda ili atubu, lakini hataki kutubia uzinzi wake. ²²Tazama, nitamtupa juu ya kitanda cha ugonjwa, na wale wazinio naye watiwe katika dhiki kubwa, wasipoyatubia matendo yake. ²³Nami nitawaua watoto wake. Ndipo makanisa yote yatakapojua ya kuwa mimi ndiye achunguzaye viuno na mioyo, nami nitampa kila mmoja wenu kwa kadiri ya matendo yake. ²⁴Lakini nawaambia ninyi wengine mlioko Thiatira, wote wasioyashika mafundisho haya, wasioyajua yale yaitwayo mafumbo mazito ya Shetani: siwatwiki mzigo mwingine. ²⁵Ila mlichonacho kishikeni sana hata nitakapokuja. ²⁶Na yeye ashindaye na kuyashika matendo yangu hata mwisho, nitampa mamlaka juu ya mataifa, ²⁷naye atawachunga kwa fimbo ya chuma, kama vyombo vya udongo vivunjwavyo vipande vipande—kama vile mimi nami nilivyopokea mamlaka kwa Baba yangu. ²⁸Nami nitampa ile nyota ya asubuhi. ²⁹Yeye aliye na sikio, na alisikie neno hili ambalo Roho Mtakatifu ayaambia makanisa."