Sardis ke
Aru tinta chithi. Sardis jinda ase koi kene nam ase kintu mori jaise, tai laga Pitri age te itu laga kaam khan pura hoi nai. Philadelphia laga sakti olop ase kintu Tai laga kotha mani rakhise, etu karne ekta khula dorja juntu kun bhi bondh koribo na pare. Laodicea nijor ke dhoni koi kintu nanga ase. Tai khara hoi kene dorja te mari ase, rukhi ase.
3 1“Sardis te thaka girja laga sorgodoot ke likhibi: Kun pora amar Pitri laga sat-ta Atma aru sat-ta tara khan dhori rakhise, Tai eneka koi ase: Moi tumar kaam khan jane. Tumi jinda ase koi kene ekta naam ase, kintu tumi to mora ase.”
2“Jagai uthibi! Ki bachi ase aru moribole ja ase, eitu ke mojbut koribi, kilemane Moi laga Pitri usor te tumar kaam khan pura hua Moi pa-a nai.” 3“Etine, tumi kineka paise aru hunise, eitu mon te rakhibi; eitu ke dhori rakhibi, aru ghuri ahhibi. Jodi tumi jagai nathake, tene hole Moi chor nisena ahhibo, aru Moi tumar usor te ki somoi te ahhibo tumi najanibo.” 4“Kintu Sardis te tumi logot olop manuh ase, kun khan laga kapra moila kora nai; tarkhan boga kapra pindhi kene Moi logot bera bo, kilemane tarkhan layak ase.” 5“Kun jiti loi, tai bhi tarkhan nisena boga kapra pindhibo, aru Moi kitia bhi tar naam jivon laga kitab pora nameti bo. Moi laga Pitri usor te aru Tar sorgodoot khan usor te Moi tar naam shikar koribo.” 6“Kun laga kaan ase, Pobitro Atma pora girja khan ke ki koi ase, eitu tai huni bole dibi.”
Philadelphia ke
7“Aru Philadelphia te thaka girja laga sorgodoot ke likhibi: Kun pobitro ase, kun hosa ase, kun David laga chabi dhori ase, kun pora khule aru kun bhi bondh nakore, kun pora bondh kore aru kun bhi nakhule, Tai eneka koi ase:”
8“Moi tumar kaam khan jane. Sabi, Moi tumar usor te ekta khula dorja rakhise, eitu ke kun bhi bondh koribo napare, kilemane tumi logot olop takot ase, hoile bhi tumi Moi laga kotha mani loise aru Moi laga naam ke mana kora nai.” 9“Saitan laga mondoli pora kunba khan ke Moi dibo—kun tarkhan nijor ke Yehudi koi, kintu tarkhan nohoi; tarkhan misa koi—Moi tarkhan ke anibo aru tumar theng usor te matha jhukai dibo, aru Moi tumi ke morom korise koi kene tarkhan janibo.” 10“Kilemane tumi Moi laga dhorjo laga kotha mani loise, prithibi te thaka manuh khan ke porikha koribole pura jagat uporte ahhibole thaka porikha laga somoi pora Moi bhi tumi ke rakhibo.” 11“Moi joldi ahhi ase. Tumi logot ki ase, eitu ghatikoi dhori rakhibi, kun bhi tumar mukut chingi nolobole.” 12“Kun jiti loi, Moi tai ke Moi laga Pitri laga mondir te ekta khamba bona bo, aru tai kitia bhi eitu nachari bo. Tar uporte Moi laga Pitri laga naam, aru Moi laga Pitri laga sawhor laga naam—kun notun Jerusalem Moi laga Pitri pora sorgo pora nami ahhise—aru Moi laga notun naam Moi likhi dibo.” a a v12 Jitia Jisu yate Isor laga kotha koi ase, Tai Pitri ke matise—Kun pora Tai ke pathaise, kun laga mondir Tai bona ase, kun laga sawhor sorgo pora nami ahhise. 13“Kun laga kaan ase, Pobitro Atma pora girja khan ke ki koi ase, eitu tai huni bole dibi.”
Laodicea ke
14“Laodicea te thaka girja laga sorgodoot ke likhibi: Kun Amen ase, kun biswasi aru hosa gawahi ase, kun amar Pitri laga srishti laga shuruat ase, Tai koi ase:” b b v14 Jisu to amar Pitri pora sob jinis bona diya laga mul ase—prothom bona jinis nohoi, kintu kun laga dwara pura srishti hoise (John 1:3; Col 1:16).
15“Moi tumar kaam khan jane: tumi thanda bhi nohoi aru gorom bhi nohoi. Tumi thanda nahole gorom hoile Moi bhal pabole thakise!” 16“Etine, kilemane tumi komdhum gorom ase—gorom bhi nohoi aru thanda bhi nohoi—Moi tumi ke Moi laga mukh pora thuki phelabole ase.” 17“Kilemane tumi koi ase, ‘Moi dhoni ase, Moi dhun joma korise, aru eku dorkar nai,’ kintu tumi dukhiya, morom lagikena, gorib, andha, aru nangta ase koi kene tumi najane.” 18“Moi tumi ke upodesh di ase: Moi pora jui te sapha kora suna kinibi, titia tumi dhoni hobo; pindhibole boga kapra, titia tumar nangta sorom nadikhibo; aru tumar suku te lagabole tel, titia tumi dikhi pabo.” 19“Kun khan ke Moi morom kore, Moi tarkhan ke gali diye aru sikhai. Etine mon dikena thakibi aru mon ghura bi.” 20“Sabi! Moi dorja te khotkhotai kene khara ase. Kun Moi laga awaj huni kene dorja khule, Moi tar bhitor te ahhibo, tar logot te khabo, aru tai Moi logot te khabo.” 21“Kun jiti loi, Moi tai ke Moi laga singhason te Moi logot te bohai dibo, jineka Moi bhi jiti loise aru Moi laga Pitri logot te Tar singhason te bohise.” 22“Kun laga kaan ase, Pobitro Atma pora girja khan ke ki koi ase, eitu tai huni bole dibi.”