Wahayin Yahaya 3 FHB Father's Heart Bible™

3 ¹“Ga mala'ikan ikkilisiya da take a Sardisu, ka rubuta cewa, Wanda yake riƙe da Ruhohi bakwai na Ubanmu da kuma taurari bakwai, yana cewa, Na san ayyukanka. Kana da suna cewa kana da rai, amma kai matacce ne.

²“Ka farka! Ka ƙarfafa abin da ya rage, wanda kuma yake gab da mutuwa, gama ban sami ayyukanka cikakke a gaban Ubana ba. ³Saboda haka ka tuna yadda ka karɓa ka kuma ji; ka kiyaye shi, ka kuma tuba. In ba ka zauna a faɗake ba, zan zo kamar ɓarawo, ba kuwa za ka san a wace sa'a zan zo maka ba. ⁴Amma kana da mutane kaɗan a Sardisu waɗanda ba su ɓata tufafinsu ba; za su yi tafiya tare da ni cikin fararen tufafi, gama sun cancanta. ⁵Wanda ya ci nasara za a yi masa sutura cikin fararen tufafi kamarsu, ba kuwa zan taɓa shafe sunansa daga littafin rai ba. Zan kuma shaida sunansa a gaban Ubana da kuma a gaban mala'ikunsa. ⁶Duk mai kunne, yă ji abin da Ruhu Mai Tsarki yake faɗa wa ikkilisiyoyi.

Zuwa ga Filadelfiya

⁷“Ka kuma rubuta wa mala'ikan ikkilisiya da take a Filadelfiya cewa, Mai Tsarkin nan, Mai gaskiyan nan, wanda yake riƙe da mabuɗin Dawuda, wanda yake buɗewa, babu kuma wanda yake rufewa; yake rufewa, babu kuma wanda yake buɗewa, yana cewa,

⁸“Na san ayyukanka. Duba, na sa a gabanka buɗaɗɗiyar ƙofa wadda babu wanda zai iya rufewa, domin kana da ɗan ƙarfi kaɗan, duk da haka ka kiyaye maganata, ba ka kuma musanta sunana ba. ⁹Zan ba da waɗansu daga majami'ar Shaiɗan—waɗanda suke ce wa kansu Yahudawa alhali kuwa ba haka ba ne, suna ƙarya—zan sa su zo su rusuna a gaban ƙafafunka, su kuma san cewa na ƙaunace ka. ¹⁰Domin ka kiyaye maganata ta haƙuri, ni ma zan kiyaye ka daga sa'ar gwaji wadda za ta zo kan dukan duniya, don a gwada waɗanda suke zama a duniya. ¹¹Ina zuwa ba da daɗewa ba. Ka riƙe abin da kake da shi da ƙarfi, domin kada wani yă ƙwace kambinka. ¹²Wanda ya ci nasara, zan mai da shi ginshiƙi a cikin haikalin Ubana, ba kuwa zai taɓa fita daga cikinsa ba. A kansa zan rubuta sunan Ubana, da kuma sunan birnin Ubana, sabuwar Urushalima wadda take saukowa daga Sama daga wurin Ubana, da kuma sabon sunana. ^a a v12 Sa'ad da Yesu yake magana game da Allah a nan, yana nufin Uba ne — wanda ya aiko shi, wanda yake gina haikalinsa, wanda kuma birninsa yake saukowa daga Sama. ¹³Duk mai kunne, yă ji abin da Ruhu Mai Tsarki yake faɗa wa ikkilisiyoyi.

Zuwa ga Laudikiya

¹⁴“Ga mala'ikan ikkilisiya da take a Laudikiya, ka rubuta cewa, Amin, Mashaidi mai aminci kuma na gaskiya, mafarin halittar Ubanmu, yana cewa, ^b b v14 Yesu shi ne tushen da ta wurinsa Ubanmu ya halicci dukan abubuwa — ba shi ne abu na farko da aka halitta ba, a'a, shi ne wanda ta wurinsa dukan halitta ta kasance (Yohanna 1:3; Kolosiyawa 1:16).

¹⁵“Na san ayyukanka: ba ka da sanyi, ba ka kuma da zafi. Kash, da ma kana da sanyi ko kana da zafi! ¹⁶Saboda haka, domin kai ɗumi-ɗumi ne—ba mai zafi ba, ba kuma mai sanyi ba—ina gab da tofar da kai daga bakina. ¹⁷Domin kana cewa, ‘Ni mai arziki ne, na wadata, ba na bukatar kome,’ alhali kuwa ba ka sani ba cewa kai abin tausayi ne, da abin juyayi, da matalauci, da makaho, da kuma tsirara. ¹⁸Ina ba ka shawara, ka sayi zinariya daga wurina wadda aka tace da wuta, domin ka arzuta; da fararen tufafi da za ka sanya, domin kada a tone kunyar tsiraicinka; da kuma maganin shafa wa idanunka, domin ka iya gani. ¹⁹Duk waɗanda nake ƙauna, nakan tsawata musu in kuma horar da su. Saboda haka ka himmantu ka kuma tuba. ²⁰Duba! Ina tsaye ina ƙwanƙwasa ƙofa. Duk wanda ya ji muryata ya kuma buɗe ƙofa, zan shiga wurinsa, in ci abinci tare da shi, shi kuma tare da ni. ²¹Wanda ya ci nasara, zan zaunar da shi tare da ni a kan gadon sarautata, kamar yadda ni ma na ci nasara na kuma zauna tare da Ubana a kan gadon sarautarsa. ²²Duk mai kunne, yă ji abin da Ruhu Mai Tsarki yake faɗa wa ikkilisiyoyi.”