ናብ ሰርዴስ

ሰለስተ ተወሳኺ መልእኽቲ። ሰርዴስ ብህይወት ከም ዘላ ስም ኣለዋ፥ ምዉት ግና እያ፥ ግብራ ኣብ ቅድሚ ኣቦኡ ዘይተፈፀመ። ፊላድልፍያ ቑሩብ ሓይሊ ኣለዋ፥ ቃሉ ግና ሓሊያ፥ ስለዙይ ሓደኳ ክዓፅዎ ዘይኽእል ክፉት ማዕፆ። ሎዶቅያ ርእሳ ሃብታም ትብል፥ ዕራቓ ግና እያ። ንሱ እናኳሕኳሐ፥ እናተፀበየ ደው ኢሉ ኣሎ።

ምዕራፍ 3።

“ናብ መልኣኽ እታ ኣብ ሰርዴስ ዘላ ቤተ ክርስቲያን ከምዙይ ኢልካ ፅሓፍ፦ እቲ ሸውዓተ መናፍስቲ ኣቦናን ሸውዓተ ኸዋኽብትን ዝሓዘ ከምዙይ ይብል፦ ግብርኻ እፈልጥ ኣለኹ። ብህይወት ከም ዘለኻ ስም ኣለካ፥ ግና ምዉት ኢኻ።

“ንቃሕ! ነቲ ዝተረፈ፥ ክመውት ዝቐረበ ኣፅንዓዮ፤ ግብርኻ ኣብ ቅድሚ ኣቦይ ፍፁም ኮይኑ ኣይረኸብኩን እየ እሞ። እምበኣር ከመይ ጌርካ ኸም ዝተቐበልካን ከም ዝሰማዕኻን ዘክር፤ ሓልዎ ድማ፥ ተመለስ። እንተ ዘይነቓሕካ፥ ከም ሰራቒ ኽመፅእ እየ፥ በየነይቲ ሰዓት ከም ዝመፅአካ ኸዓ ኣይትፈልጥን ኢኻ። ኣብ ሰርዴስ ግና ክዳውንቶም ዘየርከሱ ቑሩባት ኣለዉ፤ ይግብኦም እዩ እሞ፥ ፃዕዳ ተኸዲኖም ምሳይ ክኸዱ እዮም። እቲ ዝስዕር ከምኣቶም ፃዕዳ ክዳን ክኽደን እዩ፥ ስሙ ኸዓ ኻብ መፅሓፍ ህይወት ከቶ ኣይድምስሶን እየ። ስሙ ኣብ ቅድሚ ኣቦይ፥ ኣብ ቅድሚ መላእኽቱ ድማ ክምስክር እየ። እዝኒ ዘለዎ፥ እቲ መንፈስ ቅዱስ ንኣብያተ ክርስቲያናት ዝብሎ ዘሎ ይስማዕ።

ናብ ፊላድልፍያ

“ናብ መልኣኽ እታ ኣብ ፊላድልፍያ ዘላ ቤተ ክርስቲያን ድማ ከምዙይ ኢልካ ፅሓፍ፦ እቲ ቅዱስ፥ እቲ ሓቀኛ፥ መፍትሕ ዳዊት ዝሓዘ፥ ዝኸፍት እሞ ዝዓፅዎ ዘይብሉ፥ ዝዓፅውውን ዝኸፍት ዘይብሉ፥ ከምዙይ ይብል፦

“ግብርኻ እፈልጥ ኣለኹ። እንሆ፥ ሓደኳ ክዓፅዎ ዘይኽእል ክፉት ማዕፆ ኣብ ቅድሜኻ ኣንቢረ ኣለኹ፤ ቑሩብ ሓይሊ እንተለኻ፥ ቃለይ ሓሊኻ፥ ስመይ ድማ ዘይከሓድካ ኢኻ እሞ። ካብ ቤተ ፀሎት ሰይጣን ዝኾኑ፥ ኣይሁድ ክነሶም ‘ኣይሁድ ኢና’ ዝብሉ ዘይኮኑ ሓሰውቲ ገሊኣቶም እንሆ ክህበካ እየ፤ ናባኻ መፂኦም ኣብ ቅድሚ እግርኻ ድማ ክሰግዱ፥ ኣነ ኸዓ ኸም ዘፍቀርኩኻ ኽፈልጡ ክገብሮም እየ። ቃል ትዕግስተይ ስለ ዝሓሎኻ፥ ኣነውን ካብታ ነቶም ኣብ ምድሪ ዝነብሩ ኽትፍትኖም፥ ናብ ብዘሎ ዓለም እትመፅእ ናይ ፈተና ሰዓት ክሕልወካ እየ። ቀልጢፈ ክመፅእ እየ። ሓደኳ ነቲ ናትካ ኣኽሊል ምእንቲ ኸይወስዶ፥ ነቲ ዘለካ ኣፅንዖ። እቲ ዝስዕር ኣብ ቤተ መቕደስ ኣቦይ ዓንዲ ክገብሮ እየ፥ ካብኣ ኸዓ ከቶ ኣይወፅእን እዩ። ስም ኣቦይን፥ ስም እታ ኻብ ሰማይ ካብ ኣቦይ እትወርድ ዘላ ሓዳስ ኢየሩሳሌም፥ ስም ከተማ ኣቦይን፥ ሓዱሽ ስመይን ኣብ ልዕሊኡ ክፅሕፎ እየ። ^a እዝኒ ዘለዎ፥ እቲ መንፈስ ቅዱስ ንኣብያተ ክርስቲያናት ዝብሎ ዘሎ ይስማዕ።

ናብ ሎዶቅያ

“ናብ መልኣኽ እታ ኣብ ሎዶቅያ ዘላ ቤተ ክርስቲያን ፅሓፍ፦ እቲ ኣሜን፥ እቲ እሙንን ሓቀኛን ምስክር፥ መጀመርታ ፍጥረት ኣቦና፥ ከምዙይ ይብል፦ ^b

“ግብርኻ እፈልጥ ኣለኹ፤ ዝሑል ኣይኮንካን፥ ውዑይውን ኣይኮንካን። ዝሑል ወይ ውዑይ እንተ ትኸውን ባህ ምበለኒ! እምበኣር፥ ለብተም ስለ ዝበልካ — ውዑይ ወይ ዝሑል ስለ ዘይኴንካ — ካብ ኣፈይ ክተፍአካ ቀሪበ ኣለኹ። ‘ሃብታም እየ፥ ሃብቲ ኣጥረኹ፥ ዝጐድለኒ ነገር የብለይን’ ኢልካ ስለ እትብል፥ ምስኪንን ዜደንግፅን ድኻን ዕዉርን ዕሩቕን ምዃንካ ኸዓ ኣይትፈልጥን ኢኻ። ሃብታም ምእንቲ ኽትከውን ብሓዊ ዝነፀረ ወርቂ፥ ሕፍረት ዕርቃን ምእንቲ ኸይግለፅ እትኽደኖ ፃዕዳ ክዳውንቲ፥ ክትርኢ ምእንቲ ኽትክእል ድማ ንኣዒንትኻ እትልኽዮ ቅብኢ፥ ካባይ ክትዕድግ እመኽረካ ኣለኹ። ኣነ ንዘፍቅሮም ኵሎም፥ እግስፆምን እቐፅዖምን እየ። ስለዙይ ተጋህ፥ ተነሳሕ ድማ። እንሆ! ኣብ ኣፍ ደገ ኾይነ ኳሕኲሐ ኣለኹ። ድምፀይ ሰሚዑ ነቲ ማዕፆ ዝኸፍት ዝኾነ፥ ናብኡ ክኣቱ፥ ምስኡ ድማ ክበልዕ እየ፤ ንሱውን ምሳይ ክበልዕ እዩ። እቲ ዝስዕር ከምቲ ኣነውን ስዒረ ምስ ኣቦይ ኣብ ዙፋኑ ዝተቐመጥኩ፥ ምሳይ ኣብ ዙፋነይ ከቕምጦ እየ። እዝኒ ዘለዎ፥ እቲ መንፈስ ቅዱስ ንኣብያተ ክርስቲያናት ዝብሎ ዘሎ ይስማዕ።”