Zelophehadwui Naongalāva̱bing
Anaonganao manga-na athumwui apāwui ming, anaopa maleira vang kathi ngasa da kaphara, kala Ithumwui Avāna athumwui kachang ngasa da hangra, ram kapiwui lam thangra. Ram ngalei thira da khangalao, Mosesna mihaowui vang yaokhan kha kaphara; Joshua athum pumkhokwui makhali kahangra.
27 1Josephwui naomayara Manassehwui shimkhurbingwui eina, Manassehwui naomayara Machir, Machirwui naomayara Gilead, Gileadwui naomayara Hepher, Hepherwui naomayara Zelophehadwui naongalāva̱bing mangāvāk rai. Awui naongalāva̱bingwui amingna: Mahlah, Noah, Hoglah, Milcah kala Tirzah. 2Athumna Moseswui mangāli, pāngmon Eleazarwui mangāli, kala kathānabing kala yarui ashangva̱ katonga mangāli, kazip khavai kachonshimwui khāmongpheili nganingda hānga: 3"Ithumwui avā lamhāngli thihaowa. Ana Korahwui kazipli ngasoda ithumwui Avāli makhamayāwui kazip khuiung chiwui ngachaili maleimana; ana awui khalatta moreiwui vang thihaida, mayarnao maleimana. 4Khisāda ithumwui avā mayarnao makhaleiwui vang awui aming awui shimkhurwui eina shimānhaora? Ithumli ithumwui avāwui chinaongarāwui ngachaili shimlui milu."
5Chieina Mosesna athumwui tuingaphun chi ithumwui Avāwui mangāli khuivai. 6Kala ithumwui Avāna Mosesli hānga:
7"Zelophehadwui naongalāva̱bingna khamashung chi hānga. Athumwui avāva̱wui chinaongarāwui ngachaili athumli shimlui yar milu, kala athumwui avāva̱wui shimlui chi athumli khuithuiulu. 8Israelwui mibingli hānglu: Mi akhana mayarnao maleila thihaiakha, awui shimlui chi awui naongalāva̱li khuithuihaira. 9Awui naongalāva̱ maleiakha, awui shimlui chi awui achināngarāli mira. 10Awui achināngarā maleiakha, awui shimlui chi awui avāva̱wui achināngarāli mira. 11Awui avāva̱wui achināngarā maleiakha, awui shimlui chi awui shimkhurli khalei nganaimeikap kaji mili mira, kala ana chi shimlui khuiphalungra. Hi ithumwui Avāna Mosesli kaso kahai athishurda, Israelwui mibingwui vang ain shiyan akhana."
Mosesna Ngalei Theihai
12Chieina ithumwui Avāna Mosesli hānga, "Abarim phungreili kālaga, ina Israelwui mibingli mikahai ngalei chi yanglu. 13Nana chi theilaga, nachinā Aaron khuiunga thāda, nala nawui awo-ayiwuili khuiunghaora, 14khikhalajila Zin lamhāngli Kadeshwui Meribahwui tara̱pamli, yarui ashangva̱wui khararli, nathumna iwui kakaso chi masāla ili ngakaishihaowa, kala athumwui mikyanli ili katharanada khayā masāmana."
15Mosesna ithumwui Avāli hānga: 16"Manglākapai saikorawui Avāna yarui ashangva̱wui tungli mi akha phākhuiranu, 17ana athumwui mangāli shokra kala athumwui mangāli zangra, athumli thānshokra kala thānzangra; chieina ithumwui Avāwui yarui ashangva̱ chi yaokahoma makhalei yao thāda maleimara."
18Chieina ithumwui Avāna Mosesli hānga, "Nunwui naomayara Joshua, awui alungli ithumwui Avāwui Manglā khalei mi chili hokhuilu, kala awuitungli napāng parlu. 19Pāngmon Eleazar kala yarui ashangva̱ katongawui mangāli ali nganing ngasaklu, kala athumwui miktāli ali otpam chisinlu. 20Israelnaobing yarui ashangva̱ katongana awui kahāng nganākhavai, nawui pangshap kaikha ali milu. 21Ana pāngmon Eleazarwui mangāli nganingra, kala Eleazarna ithumwui Avāwui mangāli awui vang Urimwui bichar chi ngahānra. Ana, awui ngasoda khalei Israelnaobing saikora, yarui ashangva̱ katongana Eleazarwui tui eina shokra, kala awui tui eina zangra."
22Mosesna ithumwui Avāwui kakaso nganai: ana Joshuali hokhuida pāngmon Eleazar kala yarui ashangva̱ katongawui mangāli ali nganing ngasaka. 23Ithumwui Avāna Mosesli hāngkahai athishurda, ana awuitungli apāng parmi kala ali otpam chisina.
