Mishān 28

28 ¹Ithumwui Avāna Mosesli hānga,

²"Israelnaobingli ningmilu, athumli hithāda hānglu: Iwui kachigat, iwui mei eina kachigatwui vang iwui kashakazā, ili ningyāngkhaung nganamkaphā chi, chiwui langchin sākahai atam chili chigatchingra da rimpamlu. ³Athumli hānglu: Hi nathumna ili chigatkhavai mei eina kachigatna: kumkha kākahai achuk kapei yaovānao khani thangkachida, machatlakla rikkatā kachigatna. ⁴Yaonao akha ngathor chigatra, kala yaonao kakhane chi ngazinshong chigatra, ⁵tharāzāt kachigatwui vang manaktak kahai mathir khuilui akhawui akhum tharāwui akha, kala olive thao lengkhor matiwui khum akha manātlaga chigatra. ⁶Machatlakla rikkatā kachigat, Sinai Kaphungli langchin sākahai, ili ningyāngkhaung nganamkaphā, ili mei eina kachigatna. ⁷Chiwui ra̱shakchigat chi yaonao ava̱va̱wui vang lengkhor matiwui khum akhana; katharapamli drakhāra̱ thāda ili heirorra. ⁸Yaonao kakhane chi ngathorwui thāda tharāzātchigat eina ra̱shakchigat eina ngasoda ngazinshong chigatra; hi ili mei eina kachigat, ili ningyāngkhaung nganamkaphāna.

⁹"Sabbaththang, kumkha kākahai achuk kapei yaovānao khani, tharāzātchigatwui vang thao manāt kahai manaktak kahai mathir khuilui akhawui akhum tharāwui khani, kala chiwui ra̱shakchigatla chigatra. ¹⁰Sabbath ava̱va̱wui vang rikkatā kachigat hi, machatlakla rikkatā kachigat eina chiwui ra̱shakchigatli lāngda chigatra.

Changwok Ava̱va̱

¹¹"Nathumwui kachāng ava̱va̱wui khare zimikshothang, ili rikkatā kachigat chigatra: mukvānao khani, yaovā akha, kumkha kākahai achuk kapei yaovānao shini; ¹²tharāzāt kachigatwui vang manaktak kahai mathir thao manātlaga, mukvā ava̱va̱wui vang khuilui akhawui akhum tharāwui kathum, yaovā akhawui vang akhum tharāwui khani, ¹³kala yaonao ava̱va̱wui vang tharāzāt kachigat manaktak kahai mathir thao manātlaga akhum tharāwui akha; hi rikkatā kachigat, ili ningyāngkhaung nganamkaphā, ili mei eina kachigatna. ¹⁴Athumwui ra̱shakchigat chi: mukvāwui vang drakhāra̱ lengkhor akhawui tangkhai, yaovāwui vang lengkhor akhawui khum kathum, kala yaonaowui vang lengkhor matiwui khum akha. Hi zingkum katongali kachāng ava̱va̱thang changwok ava̱va̱wui rikkatā kachigatna. ¹⁵Suihamchigatwui vang mevā akha ili chigatra; hi machatlakla rikkatā kachigat eina chiwui ra̱shakchigatli lāngda chigatra.

Makānkhami Phanit

¹⁶"Kachāng kharewui, kachāng tharāda khamatethang, ili makānkhami phanitna. ¹⁷Kachāng chiwui tharāda kaphangāthang phanitna; shinithang khawok makazang khamui shaira. ¹⁸Kharethang nathum kathara kazip khuira; nathum shairanra̱ kashok ot masāpaimara. ¹⁹Ili mei eina kachigat, rikkatā kachigat sāra: mukvānao khani, yaovā akha, kumkha kākahai yaovānao shini; chibing achuk kapeira. ²⁰Kala athumwui tharāzāt kachigat chi thao manāt kahai manaktak kahai mathirna: mukvāwui vang khuilui akhawui akhum tharāwui kathum, yaovāwui vang akhum tharāwui khani, ²¹kala yaovānao shini kachiva̱wui vang akhum tharāwui akha chigatra; ²²kala nathumwui vang pheomi khavai suihamchigatwui vang mevā akha chigatra. ²³Hibing machatlakla rikkatā kachigat kahai ngathor rikkatā kachigatli lāngda chigatra. ²⁴Shinithang thangkachida hithāda sāra; hi ili mei eina kachigat, ningyāngkhaung nganamkaphāna. Machatlakla rikkatā kachigat kala chiwui ra̱shakchigatli lāngda hi chigatra. ²⁵Kashinethang nathum kathara kazip khuira; nathum shairanra̱ kashok ot masāpaimara.

Haptābingwui Phanit

²⁶"Theishiraiwui zimikshothang, nathumwui Haptābingwui Phanitli ili tharāzāt kachigat kadhar chi khuirā tharan, nathum kathara kazip khuira; nathum shairanra̱ kashok ot masāpaimara. ²⁷Ili ningyāngkhaung nganamkaphā rikkatā kachigat sāra: mukvānao khani, yaovā akha, kumkha kākahai yaovānao shini. ²⁸Chibing eina ngasoda tharāzāt kachigat, thao manāt kahai manaktak kahai mathir: mukvā ava̱va̱wui vang khuilui akhawui akhum tharāwui kathum, yaovā akhawui vang akhum tharāwui khani, ²⁹kala yaovānao shini kachiva̱wui vang akhum tharāwui akha chigatra; ³⁰kala nathumwui vang pheomi khavai mevā akha chigatra. ³¹Athumwui ra̱shakchigat eina ngasoda, hibing machatlakla rikkatā kachigat kala chiwui tharāzāt kachigatli lāngda chigatra; chibing achuk kapei ngasāranu."