Hesabu 28

28 ¹Baba yetu akamwambia Musa,

²"Waamuru wana wa Israeli, waambie: Hakikisheni kutoa sadaka yangu, chakula changu cha sadaka zangu za kuteketezwa kwa moto, harufu nzuri ya kunipendeza mimi, kwa wakati wake uliowekwa. ³Waambie: Hii ndiyo sadaka ya kuteketezwa kwa moto mtakayonitolea: wana-kondoo wawili wa mwaka mmoja wasio na dosari kila siku, sadaka ya kuteketezwa ya daima. ⁴Mtoe mwana-kondoo mmoja asubuhi, na yule mwana-kondoo wa pili wakati wa jioni, ⁵pamoja na sehemu ya kumi ya efa ya unga laini kwa sadaka ya nafaka, iliyochanganywa na robo ya hini ya mafuta yaliyokamuliwa. ⁶Ni sadaka ya kuteketezwa ya daima, iliyoamriwa katika Mlima Sinai kuwa harufu nzuri ya kupendeza, sadaka ya kuteketezwa kwa moto kwangu mimi. ⁷Sadaka yake ya kinywaji ni robo ya hini kwa kila mwana-kondoo; nimimimirie mimi katika mahali patakatifu kama kinywaji chenye nguvu. ⁸Mtoe yule mwana-kondoo wa pili wakati wa jioni, pamoja na sadaka ya nafaka na sadaka ya kinywaji kama za asubuhi, sadaka ya kuteketezwa kwa moto, harufu nzuri ya kunipendeza mimi.

⁹"Siku ya Sabato, toeni wana-kondoo wawili wa mwaka mmoja wasio na dosari, na sehemu mbili za kumi za efa za unga laini uliochanganywa na mafuta kuwa sadaka ya nafaka, pamoja na sadaka yake ya kinywaji. ¹⁰Hii ni sadaka ya kuteketezwa ya kila Sabato, zaidi ya ile sadaka ya kuteketezwa ya daima na sadaka yake ya kinywaji.

Kila Mwezi Mpya

¹¹"Siku ya kwanza ya kila mwezi wenu, nitoleeni sadaka ya kuteketezwa: ng'ombe wawili wachanga, kondoo dume mmoja, wana-kondoo dume saba wa mwaka mmoja, wasio na dosari, ¹²na sehemu tatu za kumi za efa za unga laini uliochanganywa na mafuta kuwa sadaka ya nafaka kwa kila ng'ombe, na sehemu mbili za kumi za efa za unga laini uliochanganywa na mafuta kuwa sadaka ya nafaka kwa yule kondoo dume mmoja, ¹³na sehemu moja ya kumi ya efa ya unga laini uliochanganywa na mafuta kuwa sadaka ya nafaka kwa kila mwana-kondoo—ni sadaka ya kuteketezwa, harufu nzuri, sadaka ya kuteketezwa kwa moto kwangu mimi. ¹⁴Sadaka zao za kinywaji: nusu ya hini ya divai kwa ng'ombe, theluthi ya hini kwa kondoo dume, na robo ya hini kwa mwana-kondoo. Hii ndiyo sadaka ya kuteketezwa ya kila mwezi mpya, mwezi baada ya mwezi, mwaka mzima. ¹⁵Nitoleeni beberu mmoja kuwa sadaka ya dhambi, zaidi ya ile sadaka ya kuteketezwa ya daima na sadaka yake ya kinywaji.

Pasaka

¹⁶"Mwezi wa kwanza, siku ya kumi na nne ya mwezi, ni Pasaka kwangu mimi. ¹⁷Na siku ya kumi na tano ya mwezi huu ni sikukuu; mkate usiotiwa chachu utaliwa kwa siku saba. ¹⁸Siku ya kwanza kutakuwa na kusanyiko takatifu; msifanye kazi yoyote ya kawaida. ¹⁹Nitoleeni sadaka ya kuteketezwa kwa moto, sadaka ya kuteketezwa: ng'ombe wawili wachanga, kondoo dume mmoja, wana-kondoo dume saba wa mwaka mmoja; hakikisheni ni wasio na dosari. ²⁰Sadaka yao ya nafaka: unga laini uliochanganywa na mafuta—sehemu tatu za kumi za efa kwa ng'ombe, na sehemu mbili za kumi za efa kwa kondoo dume, ²¹na kwa kila mmoja wa wale wana-kondoo saba, sehemu moja ya kumi ya efa; ²²na beberu mmoja kuwa sadaka ya dhambi ili kuwafanyia upatanisho. ²³Toeni hizi zaidi ya ile sadaka ya kuteketezwa ya asubuhi, ambayo ndiyo sadaka ya kuteketezwa ya daima. ²⁴Fanyeni hivi kila siku kwa siku saba—ni chakula, harufu nzuri ya kunipendeza mimi—zaidi ya ile sadaka ya kuteketezwa ya daima na sadaka yake ya kinywaji. ²⁵Siku ya saba mtakuwa na kusanyiko takatifu; msifanye kazi yoyote ya kawaida.

Sikukuu ya Majjuma

²⁶"Siku ya malimbuko, mtakaponiletea sadaka mpya ya nafaka katika Sikukuu yenu ya Majjuma, mtakuwa na kusanyiko takatifu; msifanye kazi yoyote ya kawaida. ²⁷Toeni sadaka ya kuteketezwa, harufu nzuri ya kunipendeza mimi: ng'ombe wawili wachanga, kondoo dume mmoja, wana-kondoo dume saba wa mwaka mmoja. ²⁸Pamoja nao itakuwapo sadaka ya nafaka ya unga laini uliochanganywa na mafuta: sehemu tatu za kumi za efa kwa kila ng'ombe, na sehemu mbili za kumi za efa kwa yule kondoo dume mmoja, ²⁹na sehemu moja ya kumi ya efa kwa kila mmoja wa wale wana-kondoo saba; ³⁰pamoja na beberu mmoja ili kuwafanyia upatanisho. ³¹Toeni hizi zaidi ya ile sadaka ya kuteketezwa ya daima na sadaka yake ya nafaka; hakikisheni ni wasio na dosari, pamoja na sadaka zao za kinywaji."