ਗਿਣਤੀ 28

28 ¹ਸਾਡੇ ਪਿਤਾ ਨੇ ਮੂਸਾ ਨੂੰ ਆਖਿਆ,

²“ਇਸਰਾਏਲੀਆਂ ਨੂੰ ਹੁਕਮ ਦੇ, ਅਤੇ ਉਨ੍ਹਾਂ ਨੂੰ ਆਖ: ਮੇਰੀ ਭੇਟ, ਮੇਰੀ ਅੱਗ ਦੀਆਂ ਭੇਟਾਂ ਲਈ ਮੇਰਾ ਭੋਜਨ, ਜੋ ਮੇਰੇ ਲਈ ਸੁਗੰਧਤ ਖ਼ੁਸ਼ਬੂ ਹੈ, ਤੁਸੀਂ ਉਹ ਨੂੰ ਉਸ ਦੇ ਠਹਿਰਾਏ ਸਮੇਂ ਉੱਤੇ ਧਿਆਨ ਨਾਲ ਚੜ੍ਹਾਇਆ ਕਰੋ। ³ਉਨ੍ਹਾਂ ਨੂੰ ਆਖ: ਇਹ ਉਹ ਅੱਗ ਦੀ ਭੇਟ ਹੈ ਜੋ ਤੁਸੀਂ ਮੇਰੇ ਲਈ ਚੜ੍ਹਾਉਣੀ ਹੈ: ਹਰ ਦਿਨ ਦੋ ਬੇਦਾਗ਼ ਇੱਕ ਸਾਲ ਦੇ ਲੇਲੇ, ਇੱਕ ਨਿੱਤ ਦੀ ਹੋਮ ਬਲੀ। ⁴ਇੱਕ ਲੇਲਾ ਸਵੇਰ ਨੂੰ ਚੜ੍ਹਾ, ਅਤੇ ਦੂਜਾ ਲੇਲਾ ਸ਼ਾਮ ਦੇ ਵੇਲੇ, ⁵ਨਾਲ ਹੀ ਅਨਾਜ ਦੀ ਭੇਟ ਲਈ ਲਗਭਗ ਦੋ ਸੇਰ ਮੈਦਾ, ਜੋ ਲਗਭਗ ਇੱਕ ਸੇਰ ਪੀੜੇ ਹੋਏ ਤੇਲ ਨਾਲ ਮਿਲਾਇਆ ਹੋਵੇ। ⁶ਇਹ ਇੱਕ ਨਿੱਤ ਦੀ ਹੋਮ ਬਲੀ ਹੈ, ਜੋ ਸੀਨਈ ਪਹਾੜ ਉੱਤੇ ਸੁਗੰਧਤ ਖ਼ੁਸ਼ਬੂ ਲਈ ਠਹਿਰਾਈ ਗਈ ਸੀ, ਮੇਰੇ ਲਈ ਇੱਕ ਅੱਗ ਦੀ ਭੇਟ। ⁷ਉਹ ਦੀ ਪੀਣ ਦੀ ਭੇਟ ਹਰ ਲੇਲੇ ਲਈ ਇੱਕ ਸੇਰ ਹੈ; ਪਵਿੱਤਰ ਥਾਂ ਵਿੱਚ ਉਹ ਨੂੰ ਤੇਜ਼ ਮਧ ਵਾਂਗ ਮੇਰੇ ਲਈ ਡੋਲ੍ਹ ਦੇ। ⁸ਦੂਜਾ ਲੇਲਾ ਸ਼ਾਮ ਦੇ ਵੇਲੇ ਚੜ੍ਹਾ, ਸਵੇਰ ਵਾਲੀ ਅਨਾਜ ਦੀ ਭੇਟ ਅਤੇ ਪੀਣ ਦੀ ਭੇਟ ਵਾਂਗ, ਇੱਕ ਅੱਗ ਦੀ ਭੇਟ, ਮੇਰੇ ਲਈ ਸੁਗੰਧਤ ਖ਼ੁਸ਼ਬੂ।

⁹“ਸਬਤ ਦੇ ਦਿਨ ਦੋ ਬੇਦਾਗ਼ ਇੱਕ ਸਾਲ ਦੇ ਲੇਲੇ ਚੜ੍ਹਾ, ਅਨਾਜ ਦੀ ਭੇਟ ਲਈ ਲਗਭਗ ਚਾਰ ਸੇਰ ਮੈਦਾ ਜੋ ਤੇਲ ਨਾਲ ਮਿਲਾਇਆ ਹੋਵੇ, ਨਾਲ ਹੀ ਉਹ ਦੀ ਪੀਣ ਦੀ ਭੇਟ। ¹⁰ਇਹ ਹਰ ਸਬਤ ਦੀ ਹੋਮ ਬਲੀ ਹੈ, ਨਿੱਤ ਦੀ ਹੋਮ ਬਲੀ ਅਤੇ ਉਹ ਦੀ ਪੀਣ ਦੀ ਭੇਟ ਤੋਂ ਇਲਾਵਾ।

ਹਰ ਨਵਾਂ ਮਹੀਨਾ

¹¹“ਆਪਣੇ ਹਰ ਮਹੀਨੇ ਦੇ ਪਹਿਲੇ ਦਿਨ ਮੇਰੇ ਲਈ ਇੱਕ ਹੋਮ ਬਲੀ ਚੜ੍ਹਾ: ਦੋ ਜੁਆਨ ਬਲਦ, ਇੱਕ ਭੇਡੂ, ਸੱਤ ਇੱਕ ਸਾਲ ਦੇ ਨਰ ਲੇਲੇ, ਜੋ ਬੇਦਾਗ਼ ਹੋਣ, ¹²ਹਰ ਬਲਦ ਲਈ ਅਨਾਜ ਦੀ ਭੇਟ ਵਜੋਂ ਲਗਭਗ ਛੇ ਸੇਰ ਮੈਦਾ ਜੋ ਤੇਲ ਨਾਲ ਮਿਲਾਇਆ ਹੋਵੇ, ਉਸ ਇੱਕ ਭੇਡੂ ਲਈ ਅਨਾਜ ਦੀ ਭੇਟ ਵਜੋਂ ਲਗਭਗ ਚਾਰ ਸੇਰ ਮੈਦਾ ਜੋ ਤੇਲ ਨਾਲ ਮਿਲਾਇਆ ਹੋਵੇ, ¹³ਅਤੇ ਹਰ ਲੇਲੇ ਲਈ ਅਨਾਜ ਦੀ ਭੇਟ ਵਜੋਂ ਦੋ ਸੇਰ ਮੈਦਾ ਜੋ ਤੇਲ ਨਾਲ ਮਿਲਾਇਆ ਹੋਵੇ—ਇੱਕ ਹੋਮ ਬਲੀ, ਇੱਕ ਸੁਗੰਧਤ ਖ਼ੁਸ਼ਬੂ, ਮੇਰੇ ਲਈ ਇੱਕ ਅੱਗ ਦੀ ਭੇਟ। ¹⁴ਉਨ੍ਹਾਂ ਦੀਆਂ ਪੀਣ ਦੀਆਂ ਭੇਟਾਂ: ਬਲਦ ਲਈ ਦੋ ਸੇਰ ਮਧ, ਭੇਡੂ ਲਈ ਇੱਕ ਸੇਰ ਤੋਂ ਥੋੜਾ ਵੱਧ, ਅਤੇ ਲੇਲੇ ਲਈ ਇੱਕ ਸੇਰ। ਇਹ ਹਰ ਨਵੇਂ ਚੰਦ ਦੀ ਹੋਮ ਬਲੀ ਹੈ, ਮਹੀਨੇ-ਮਹੀਨੇ, ਸਾਰਾ ਸਾਲ। ¹⁵ਪਾਪ ਦੀ ਭੇਟ ਵਜੋਂ ਮੇਰੇ ਲਈ ਇੱਕ ਨਰ ਬੱਕਰਾ ਚੜ੍ਹਾ, ਨਿੱਤ ਦੀ ਹੋਮ ਬਲੀ ਅਤੇ ਉਹ ਦੀ ਪੀਣ ਦੀ ਭੇਟ ਤੋਂ ਇਲਾਵਾ।

ਪਸਾਹ

¹⁶“ਪਹਿਲੇ ਮਹੀਨੇ, ਮਹੀਨੇ ਦੇ ਚੌਦਵੇਂ ਦਿਨ, ਮੇਰੇ ਲਈ ਪਸਾਹ ਹੈ। ¹⁷ਇਸ ਮਹੀਨੇ ਦੇ ਪੰਦਰਵੇਂ ਦਿਨ ਇੱਕ ਪਰਬ ਹੈ; ਸੱਤ ਦਿਨ ਪਤੀਰੀ ਰੋਟੀ ਖਾਧੀ ਜਾਂਦੀ ਹੈ। ¹⁸ਪਹਿਲੇ ਦਿਨ ਇੱਕ ਪਵਿੱਤਰ ਸਭਾ ਹੋਵੇ; ਤੁਸੀਂ ਕੋਈ ਆਮ ਕੰਮ ਨਾ ਕਰਿਓ। ¹⁹ਮੇਰੇ ਲਈ ਇੱਕ ਅੱਗ ਦੀ ਭੇਟ, ਇੱਕ ਹੋਮ ਬਲੀ ਚੜ੍ਹਾ: ਦੋ ਜੁਆਨ ਬਲਦ, ਇੱਕ ਭੇਡੂ, ਸੱਤ ਇੱਕ ਸਾਲ ਦੇ ਨਰ ਲੇਲੇ; ਧਿਆਨ ਰੱਖੀਂ ਕਿ ਉਹ ਬੇਦਾਗ਼ ਹੋਣ। ²⁰ਉਨ੍ਹਾਂ ਦੀ ਅਨਾਜ ਦੀ ਭੇਟ: ਮੈਦਾ ਜੋ ਤੇਲ ਨਾਲ ਮਿਲਾਇਆ ਹੋਵੇ—ਬਲਦ ਲਈ ਲਗਭਗ ਛੇ ਸੇਰ, ਭੇਡੂ ਲਈ ਚਾਰ ਸੇਰ, ²¹ਅਤੇ ਸੱਤਾਂ ਲੇਲਿਆਂ ਵਿੱਚੋਂ ਹਰ ਇੱਕ ਨਾਲ ਲਗਭਗ ਦੋ ਸੇਰ; ²²ਅਤੇ ਪਾਪ ਦੀ ਭੇਟ ਵਜੋਂ ਇੱਕ ਨਰ ਬੱਕਰਾ, ਤਾਂ ਜੋ ਤੁਹਾਡੇ ਲਈ ਪ੍ਰਾਸਚਿਤ ਕੀਤਾ ਜਾਵੇ। ²³ਇਹ ਸਵੇਰ ਦੀ ਹੋਮ ਬਲੀ ਤੋਂ ਇਲਾਵਾ ਚੜ੍ਹਾ, ਜੋ ਨਿੱਤ ਦੀ ਹੋਮ ਬਲੀ ਹੈ। ²⁴ਸੱਤ ਦਿਨ ਤਕ ਹਰ ਦਿਨ ਇਹੀ ਕਰ—ਭੋਜਨ, ਮੇਰੇ ਲਈ ਸੁਗੰਧਤ ਖ਼ੁਸ਼ਬੂ—ਨਿੱਤ ਦੀ ਹੋਮ ਬਲੀ ਅਤੇ ਉਹ ਦੀ ਪੀਣ ਦੀ ਭੇਟ ਤੋਂ ਇਲਾਵਾ। ²⁵ਸੱਤਵੇਂ ਦਿਨ ਤੁਸੀਂ ਇੱਕ ਪਵਿੱਤਰ ਸਭਾ ਕਰਿਓ; ਤੁਸੀਂ ਕੋਈ ਆਮ ਕੰਮ ਨਾ ਕਰਿਓ।

ਹਫ਼ਤਿਆਂ ਦਾ ਪਰਬ

²⁶“ਪਹਿਲੇ ਫਲਾਂ ਦੇ ਦਿਨ, ਜਦੋਂ ਤੁਸੀਂ ਆਪਣੇ ਹਫ਼ਤਿਆਂ ਦੇ ਪਰਬ ਉੱਤੇ ਮੇਰੇ ਲਈ ਨਵੀਂ ਅਨਾਜ ਦੀ ਭੇਟ ਲਿਆਉਂਦੇ ਹੋ, ਤਾਂ ਇੱਕ ਪਵਿੱਤਰ ਸਭਾ ਕਰਿਓ; ਕੋਈ ਆਮ ਕੰਮ ਨਾ ਕਰਿਓ। ²⁷ਮੇਰੇ ਲਈ ਸੁਗੰਧਤ ਖ਼ੁਸ਼ਬੂ ਵਜੋਂ ਇੱਕ ਹੋਮ ਬਲੀ ਚੜ੍ਹਾ: ਦੋ ਜੁਆਨ ਬਲਦ, ਇੱਕ ਭੇਡੂ, ਸੱਤ ਇੱਕ ਸਾਲ ਦੇ ਨਰ ਲੇਲੇ। ²⁸ਉਨ੍ਹਾਂ ਨਾਲ ਮੈਦੇ ਦੀ ਅਨਾਜ ਦੀ ਭੇਟ ਹੋਵੇ ਜੋ ਤੇਲ ਨਾਲ ਮਿਲਾਈ ਹੋਵੇ: ਹਰ ਬਲਦ ਲਈ ਲਗਭਗ ਛੇ ਸੇਰ, ਉਸ ਇੱਕ ਭੇਡੂ ਲਈ ਲਗਭਗ ਚਾਰ ਸੇਰ, ²⁹ਅਤੇ ਸੱਤਾਂ ਲੇਲਿਆਂ ਵਿੱਚੋਂ ਹਰ ਇੱਕ ਲਈ ਲਗਭਗ ਦੋ ਸੇਰ; ³⁰ਨਾਲ ਹੀ ਇੱਕ ਨਰ ਬੱਕਰਾ, ਤਾਂ ਜੋ ਤੁਹਾਡੇ ਲਈ ਪ੍ਰਾਸਚਿਤ ਕੀਤਾ ਜਾਵੇ। ³¹ਇਹ ਨਿੱਤ ਦੀ ਹੋਮ ਬਲੀ ਅਤੇ ਉਸ ਦੀ ਅਨਾਜ ਦੀ ਭੇਟ ਤੋਂ ਇਲਾਵਾ ਚੜ੍ਹਾ; ਧਿਆਨ ਰੱਖੀਂ ਕਿ ਉਹ ਬੇਦਾਗ਼ ਹੋਣ, ਉਨ੍ਹਾਂ ਦੀਆਂ ਪੀਣ ਦੀਆਂ ਭੇਟਾਂ ਸਣੇ।”