Numeri 28

28 ¹Baba wa sọ fún Mose pé,

²“Pàṣẹ fún àwọn ọmọ Israẹli, sọ fún wọn pé: Ẹ rí i dájú pé ẹ gbé ọrẹ mi wá, oúnjẹ mi fún àwọn ọrẹ-oúnjẹ mi, òórùn dídùn sí mi, ní àkókò tí a yàn sílẹ̀ rẹ̀. ³Sọ fún wọn pé: Èyí ni ọrẹ-oúnjẹ tí ẹ ó mú wá fún mi: ọ̀dọ́-àgùntàn ọlọ́dún kan méjì tí kò ní àbùkù lójoojúmọ́, ẹbọ sísun déédéé. ⁴Ẹ ó rú ọ̀dọ́-àgùntàn kan ní òwúrọ̀, àti ọ̀dọ́-àgùntàn èkejì ní àṣálẹ́, ⁵pẹ̀lú ìyẹ̀fun dáradára tí ó tó ìwọ̀n lítà méjì fún ọrẹ-ọkà, tí a fi òróró fífún tí ó tó ìwọ̀n lítà kan pò. ⁶Ẹbọ sísun déédéé ni èyí, tí a ti fìdí rẹ̀ múlẹ̀ ní Òkè Sinai fún òórùn dídùn, ọrẹ-oúnjẹ sí mi. ⁷Ọrẹ-ohun-mímu rẹ̀ jẹ́ ìwọ̀n lítà kan fún ọ̀dọ́-àgùntàn kọ̀ọ̀kan; ẹ dà á jáde fún mi ní ibi mímọ́ gẹ́gẹ́ bí ọtí líle. ⁸Ẹ ó rú ọ̀dọ́-àgùntàn èkejì ní àṣálẹ́, pẹ̀lú ọrẹ-ọkà àti ọrẹ-ohun-mímu bí i ti òwúrọ̀, ọrẹ-oúnjẹ, òórùn dídùn sí mi.

⁹“Ní ọjọ́ Ìsinmi, ẹ ó rú ọ̀dọ́-àgùntàn ọlọ́dún kan méjì tí kò ní àbùkù, ìyẹ̀fun dáradára tí ó tó ìwọ̀n lítà mẹ́rin tí a fi òróró pò gẹ́gẹ́ bí ọrẹ-ọkà, pẹ̀lú ọrẹ-ohun-mímu rẹ̀. ¹⁰Èyí ni ẹbọ sísun fún ọjọ́ Ìsinmi kọ̀ọ̀kan, yàtọ̀ sí ẹbọ sísun déédéé àti ọrẹ-ohun-mímu rẹ̀.

Oṣù Tuntun Kọ̀ọ̀kan

¹¹“Ní ọjọ́ kìíní oṣù yín kọ̀ọ̀kan, ẹ ó rú ẹbọ sísun fún mi: akọ màlúù ọ̀dọ́ méjì, àgbò kan, àti ọ̀dọ́-àgùntàn akọ ọlọ́dún kan méje, tí kò ní àbùkù, ¹²ìyẹ̀fun dáradára tí ó tó ìwọ̀n lítà mẹ́fà tí a fi òróró pò gẹ́gẹ́ bí ọrẹ-ọkà fún akọ màlúù kọ̀ọ̀kan, ìyẹ̀fun dáradára tí ó tó ìwọ̀n lítà mẹ́rin tí a fi òróró pò gẹ́gẹ́ bí ọrẹ-ọkà fún àgbò kan náà, ¹³àti ìyẹ̀fun dáradára tí ó tó ìwọ̀n lítà méjì tí a fi òróró pò gẹ́gẹ́ bí ọrẹ-ọkà fún ọ̀dọ́-àgùntàn kọ̀ọ̀kan - ẹbọ sísun, òórùn dídùn, ọrẹ-oúnjẹ sí mi. ¹⁴Àwọn ọrẹ-ohun-mímu wọn: wáìnì tí ó tó ìwọ̀n lítà méjì fún akọ màlúù, tí ó ju ìwọ̀n lítà kan lọ díẹ̀ fún àgbò, àti ìwọ̀n lítà kan fún ọ̀dọ́-àgùntàn. Èyí ni ẹbọ sísun fún oṣù tuntun, láti oṣù dé oṣù, ní gbogbo ọdún. ¹⁵Ẹ ó rú akọ ewúrẹ́ kan fún mi gẹ́gẹ́ bí ẹbọ ẹ̀ṣẹ̀, yàtọ̀ sí ẹbọ sísun déédéé àti ọrẹ-ohun-mímu rẹ̀.

Ìrékọjá

¹⁶“Ní oṣù kìíní, ní ọjọ́ kẹrìnlá oṣù náà, ni Ìrékọjá fún mi. ¹⁷Ní ọjọ́ kẹẹ̀ẹ́dógún oṣù yìí ni àjọ̀dún kan wà; a ó sì máa jẹ àkàrà àìwú fún ọjọ́ méje. ¹⁸Ní ọjọ́ kìíní, àpéjọ mímọ́ yóò wà; ẹ kò gbọdọ̀ ṣe iṣẹ́ ojoojúmọ́ kankan. ¹⁹Ẹ gbé ọrẹ-oúnjẹ wá fún mi, ẹbọ sísun: akọ màlúù ọ̀dọ́ méjì, àgbò kan, ọ̀dọ́-àgùntàn akọ ọlọ́dún kan méje; ẹ rí i dájú pé wọn kò ní àbùkù. ²⁰Ọrẹ-ọkà wọn: ìyẹ̀fun dáradára tí a fi òróró pò—tí ó tó ìwọ̀n lítà mẹ́fà fún akọ màlúù, ìwọ̀n lítà mẹ́rin fún àgbò, ²¹àti pẹ̀lú ọ̀kọ̀ọ̀kan nínú àwọn ọ̀dọ́-àgùntàn méje náà, tí ó tó ìwọ̀n lítà méjì; ²²àti akọ ewúrẹ́ kan gẹ́gẹ́ bí ẹbọ ẹ̀ṣẹ̀ láti ṣe ètùtù fún yín. ²³Ẹ ó rú ìwọ̀nyí ní àfikún sí ẹbọ sísun òwúrọ̀, tí í ṣe ẹbọ sísun déédéé. ²⁴Ẹ ó ṣe èyí lójoojúmọ́ fún ọjọ́ méje—oúnjẹ, òórùn dídùn sí mi—yàtọ̀ sí ẹbọ sísun déédéé àti ọrẹ-ohun-mímu rẹ̀. ²⁵Ní ọjọ́ keje, ẹ ó ṣe àpéjọ mímọ́; ẹ kò gbọdọ̀ ṣe iṣẹ́ ojoojúmọ́ kankan.

Àjọ̀dún Ọ̀sẹ̀

²⁶“Ní ọjọ́ àkọ́so, nígbà tí ẹ bá mú ọrẹ-ọkà tuntun wá fún mi ní Àjọ̀dún Ọ̀sẹ̀ yín, ẹ ṣe àpéjọ mímọ́; ẹ má ṣe iṣẹ́ ojoojúmọ́ kankan. ²⁷Ẹ gbé ẹbọ sísun wá, òórùn dídùn sí mi: akọ màlúù ọ̀dọ́ méjì, àgbò kan, ọ̀dọ́-àgùntàn akọ ọlọ́dún kan méje. ²⁸Pẹ̀lú wọn ni ọrẹ-ọkà ìyẹ̀fun dáradára tí a fi òróró pò: tí ó tó ìwọ̀n lítà mẹ́fà fún akọ màlúù kọ̀ọ̀kan, tí ó tó ìwọ̀n lítà mẹ́rin fún àgbò kan náà, ²⁹àti tí ó tó ìwọ̀n lítà méjì fún ọ̀kọ̀ọ̀kan nínú àwọn ọ̀dọ́-àgùntàn méje náà; ³⁰pẹ̀lú akọ ewúrẹ́ kan láti ṣe ètùtù fún yín. ³¹Ẹ ó rú ìwọ̀nyí yàtọ̀ sí ẹbọ sísun déédéé àti ọrẹ-ọkà rẹ̀; ẹ rí i dájú pé wọn kò ní àbùkù, pẹ̀lú àwọn ọrẹ-ohun-mímu wọn.”