Mishān 26

26 ¹Kazātkashiwui thili ithumwui Avāna Moses eina pāngmon Aaronwui naomayara Eleazarli hānga,

²"Israel yarui ashangva̱ katongawui eina avāva̱ ngarāwui shimlak athishurda zingkum maga̱ eina thuida chiwui atung Israelwui alungli raili vākashap saikorawui mishān khuilu."

³Jerichowui Jordan ngalemli khalei Moab tampākli Moses eina pāngmon Eleazarna athumli hānga: ⁴"Ithumwui Avāna Mosesli kaso kahai athishurda, zingkum maga̱ eina thuida chiwui atungbing mishān khuilu." Hibing hi Egypt ngaleiwui eina kashoka Israelwui mibingna:

⁵Israelwui naochizai Reuben. Reubenwui naomayarabing: Hanok, Hanokwui shimkhur; Pallu, Palluwui shimkhur, ⁶Hezron, Hezronwui shimkhur; Carmi, Carmiwui shimkhur. ⁷Hibing hi Reubenwui shimkhurbingna; athumwui mashing thing hangmatida kathum shāshini kala thumrāna. ⁸Palluwui naomayara: Eliab. ⁹Eliabwui naomayarabing: Nemuel, Dathan, kala Abiram. Ashangva̱wui kathānabing Dathan eina Abiram hi ithumwui Avāli makhamayā tharan Corahna thānda kakazipli Moses eina Aaronli makhamayābingna. ¹⁰Ngaleina khamor makāda athum eina Corahli mayuisanghaowa, kazip chi thihaida meina mi shākhani hangphangā chuithathaowa; kala athum matheisai ngasāhaowa. ¹¹Kha Corahwui naomayarabingla mathisangmana.

¹²Simeonwui naomayarabing shimkhur athishurda: Nemuel, Nemuelwui shimkhur; Jamin, Jaminwui shimkhur; Jachin, Jachinwui shimkhur, ¹³Zerah, Zerahwui shimkhur; Shaul, Shaulwui shimkhur. ¹⁴Hibing hi Simeonwui shimkhurbingna; athumwui mashing thing maga̱da khani shākhanina.

¹⁵Gadwui naomayarabing shimkhur athishurda: Zephon, Zephonwui shimkhur; Haggi, Haggiwui shimkhur; Shuni, Shuniwui shimkhur, ¹⁶Ozni, Ozniwui shimkhur; Eri, Eriwui shimkhur; ¹⁷Arod, Arodwui shimkhur; Areli, Areliwui shimkhur. ¹⁸Hibing hi Gadwui naomayarabingwui shimkhurbingna; athumwui mashing thing hangmati shāphangāna.

¹⁹Judahwui naomayarabing Er eina Onanna; Er eina Onan Canaan ngaleili thisanghaowa. ²⁰Judahwui naomayarabing shimkhurwui athishurda: Shelahwui eina Shelahshiwui shimkhur; Perezwui eina Perezshiwui shimkhur; Zerahwui eina Zerahshiwui shimkhur. ²¹Perezwui naomayarabing: Hezron, Hezronshiwui shimkhur; Hamul, Hamulshiwui shimkhur. ²²Hibing hi Judahwui shimkhurbingna; athumwui mashing thing hangshinida tharuk shāphangāna.

²³Issacharwui naomayarabing shimkhurwui athishurda: Tola, Tolashiwui shimkhur; Puvah, Puvahshiwui shimkhur; ²⁴Jashubwui eina Jashubshiwui shimkhur; Shimronwui eina Shimronshiwui shimkhur. ²⁵Hibing hi Issacharwui shimkhurbingna; athumwui mashing thing hangtharukta mati shākathumna.

²⁶Zebulunwui naomayarabing shimkhurwui athishurda: Seredwui eina Seredshiwui shimkhur; Elonwui eina Elonshiwui shimkhur; Jahleelwui eina Jahleelshiwui shimkhur. ²⁷Hibing hi Zebulunshiwui shimkhurbingna; athumwui mashing thing hangtharuk shāphangāna.

²⁸Josephwui naomayarabing shimkhurwui athishurda Manasseh eina Ephraimna. ²⁹Manassehwui naomayarabing: Machirwui eina Machirshiwui shimkhur; Machirna Gileadli pharai; Gileadwui eina Gileadshiwui shimkhur. ³⁰Gileadwui naomayarabing: Iezer, Iezershiwui shimkhur; Helek, Helekshiwui shimkhur; ³¹kala Asrielwui eina Asrielshiwui shimkhur; kala Shechemwui eina Shechemshiwui shimkhur; ³²kala Shemidawui eina Shemidashiwui shimkhur; kala Hepherwui eina Hephershiwui shimkhur. ³³Hepherwui naomayara Zelophehad mayarnao mapharāla nao ngalāva̱bingmāng pharai: Mahlah, Noah, Hoglah, Milcah kala Tirzahna. ³⁴Hibing hi Manassehwui shimkhurbingna; athumwui mashing thing hangphangāda khani shāshinina.

³⁵Hi Ephraimwui naomayarabing athumwui shimkhur athishurda: Shuthelah, Shuthelahshi shimkhur; Becher, Bechershi shimkhur; Tahan, Tahanshi shimkhur. ³⁶Kala hi Shuthelahwui naomayarabing: Eranwui eina, Eranshi shimkhur. ³⁷Hibing hi Ephraimwui naomayarabingwui shimkhurbingna; athumwui mashing thingthumrāda khani shāphangāna. Hibing hi athumwui shimkhur athishurda Josephwui naomayarabingna.

³⁸Benjaminwui naomayarabing athumwui shimkhur athishurda: Bela, Belashi shimkhur; Ashbel, Ashbelshi shimkhur; Ahiram, Ahiramshi shimkhur, ³⁹Shephuphamwui eina, Shuphamshi shimkhur; Huphamwui eina, Huphamshi shimkhur. ⁴⁰Belawui naomayarabing: Ard eina Naaman—Ardwui eina, Ardshi shimkhur; Naamanwui eina, Naamanshi shimkhur. ⁴¹Hibing hi Benjaminwui naomayarabingwui shimkhurbingna; athumwui mashing thing hangmatida phangā shātharukna.

⁴²Hi Danwui naomayarabing athumwui shimkhur athishurda: Shuhamwui eina, Shuhamshi shimkhur. Hibing hi Danwui shimkhurbingna. ⁴³Shuhamshi shimkhur saikora athumwui mashing thing hangtharukta mati shāmatina.

⁴⁴Asherwui naomayarabing athumwui shimkhur athishurda: Imnah, Imnahshi shimkhur; Ishvi, Ishvishi shimkhur; Beriah, Beriahshi shimkhur. ⁴⁵Beriahwui naomayarabing: Heber, Hebershi shimkhur; Malchi-el, Malchi-elshi shimkhur. ⁴⁶Asherna Serah hoda naongalāva̱ akha pharai. ⁴⁷Hibing hi Asherwui naomayarabingwui shimkhurbingna; athumwui mashing thing hangphangāda kathum shāmatina.

⁴⁸Naphtaliwui naomayarabing athumwui shimkhur athishurda: Jahzeel, Jahzeelshi shimkhur; Guni, Gunishi shimkhur, ⁴⁹Jezerwui eina, Jezershi shimkhur; Shillemwui eina, Shillemshi shimkhur. ⁵⁰Hibing hi Naphtaliwui shimkhurbingna; athumwui mashing thing hangmatida phangā shāmatina. ⁵¹Hi Israel mibingwui mashing saikora: lakh tharuk thing akha shāshini thumrāna.

⁵²Chiwui thili ithumwui Avāna Mosesli hānga,

⁵³"Hibingli aming mashing athishurda ngalei chi shimlui sākhavai ngayarki kajina. ⁵⁴Shang kateona ngalei teoda samphangra, kala shang kahakana hakta samphangra; ava̱va̱li ashi mashing shānkhui athishurda shimlui mira. ⁵⁵Kha ngalei chi kalā yanglaga ngayarki kajina; athumna avāva̱ ngarāwui shang aming athishurda shimlui samphangra. ⁵⁶Kateo kala kahaka ngachaili kalā yanglaga athumwui shimlui ngayarki kajina."

⁵⁷Hi shimkhur athishurda mashing shānlaga Levinaobingna: Gershonwui shimkhur, Gershonshi; Kohathwui shimkhur, Kohathshi; Merariwui shimkhur, Merarishi. ⁵⁸Leviwui shimkhurbing chi hina: Libnishi shimkhur, Hebronshi shimkhur, Mahlishi shimkhur, Mushishi shimkhur, Korahshi shimkhur. Kala Kohathna Amramli pharai. ⁵⁹Amram preiva̱wui aming Jochebedna, Egyptli Levili kapharā, Leviwui naongalāva̱na; ana Amramli Aaron, Moses kala athum azara̱ Mariamli pharai. ⁶⁰Kala Aaronli Nadab eina Abihu, Eleazar eina Ithamar pharai. ⁶¹Kha Nadab eina Abihuna ithumwui Avāwui mangāli makathar mei kachigatla thihaowa. ⁶²Kachāngkha kākahai eina thuilaga chiwui atung Levinaobingwui mayarnao kachiva̱ shānlaga mashing saikora thing maga̱da kathumna. Athum Israelnaobingwui ngachaili mashānmana, khikhalajila Israelnaobingwui ngachaili athumli shimlui mamimana.

⁶³Jerichowui Jordan ngalemli khalei Moab tampākli Moses kala pāngmon Eleazarna hibingli shānkhui. ⁶⁴Sinai lamhāngli Moses eina pāngmon Aaronna shānlaga mibingwui ngachaili hibingwui khipākha maleimana. ⁶⁵Khikhalajila ithumwui Avāna athumwui pongli hānga, "Athum kachangkhata lamhāngli thira." Chiwui vang Jephunnehwui naomayara Caleb kala Nunwui naomayara Joshua maningla khangatei mathila maleimana.