Mishān 25

25 ¹Israelna Shittimli leilakha mibingna Moabwui naongalāva̱bing eina shām kasā sāda wukhananghaowa. ²Athumna mibingli athumwui varebingwui pha̱kaphayāli hoi; kala mibingna shai kala athumwui varebingli khoruma. ³Chiwui vang eina Israelna Peorwui Baalli ngarumhaowa, kala ithumwui Avāna Israelli malungvāthaowa.

⁴Ithumwui Avāna Mosesli hānga, "Mibingwui akhokabing saikorali hokhuilu kala iwui mangāli ngashun kahorli athumli shaothatlu, chieina iwui malungkhavāt Israelwui eina ngareithuihaora."

⁵Mosesna Israelwui bichar kasābingli hānga, "Nathum kachiva̱na Peorwui Baalli ngarumkha awui mibingli shaothatlu."

⁶Chiwui thili athumna kazip khavai kachonshimwui khāmongpheili chapta leilakha Israelwui mi akhana Moses eina Israel ashangva̱ katongawui mangāli achinā ngarāli Midianpava̱ sha̱nao akha khuirai. ⁷Pāngmon Aaronwui nao Eleazarna kapharā Phinehasna chi theilaga, yarui katongawui ngachaiwui eina ngakarthuida awui pāngli kazei akha khuiya. ⁸Ana Israelwui mi chili shimlungli shurthuwa, kala Israelwui mi eina sha̱nao chi ani khanili sha̱naowui wuk eina rungthata. Chitharan Israelwui mibingli rā kazātkashi chi phāhainaowa. ⁹Kazātkashiwui vang thikahaibing chi thing maga̱da matina.

¹⁰Chiwui thili ithumwui Avāna Mosesli hānga,

¹¹"Pāngmon Aaronwui nao Eleazarna kapharā Phinehasna athumwui ngachaili iwui ningkatong eina ningkatong kahaiwui vang iwui malungkhavāt Israelwui mibingwui eina ngareithuimihai; chieina ina iwui ningkatong eina Israelwui mibingli masāshimānmimara. ¹²Chiwui vang eina hānglu: Ina ali iwui chingri kahaiwui tuingashit mira. ¹³Ali kala awui thili awui naomayarabingli katang makhavai pāngmonwui tuingashit leira, khikhalajila ana iwui vang malungchāngda kala Israelwui mibingwui vang pheomihaira." ^a a v13 Phinehaswui katang makhavai pāngmonwui kadhara kala awui pheomi kasā chi, katang makhavai pāngmon Jishuli sāngngarānda chitheia; ithumwui Avāwui vang awui ningkatong kala hotkha eina tangda awui pha̱kaphayā kasāna, mi pāngmon khipānakha samphangkhavai maleiwui katang makhavai chingri kahai khuiraina.

¹⁴Midianpava̱ sha̱nao eina shaokahai Israelwui miwui ming chi Saluwui nao Zimri, Simeonshi shimkhurwui akhavā akhana. ¹⁵Shaokahai Midianpava̱ sha̱naowui ming chi Kozbi hoi, Midianli shimkhurwui akhavā Zurwui naongalāva̱na.

¹⁶Chiwui thili ithumwui Avāna Mosesli hānga,

¹⁷"Midiannaobingli yangkashe thāda sāserlu, kala athumli shaothatlu, ¹⁸kaja athumwui marei-marā eina athum nathumwui yangkashebingna, chi marei-marā eina athumna nathumli Peorwui maramli kala Peorwui vang kazātkashi zimiksholi sāthat kahai athumwui azarva̱ Midianwui kathānawui naongalāva̱ Kozbiwui maramli kapikhaowa."