Israel eng' Shitim
Eng' Shitim konamgei Israel ak Baal ne po Peor koboto tiibiigap Moab, ak kong'et angeetap Kwandanyo eng' koroito. Ki yai Phineas ak ng'otit ye kiriirei piik tugul, kotononso koroito eng' eliphuusyek tiptem ak ang'wan, ak kigoochin katabaanet ne po tiseinatet ne koigeny.
Ng'alaali Kwandanyo eng' mustarisyek 4, 11–13, 17–18
25 1Kingo meny Israel eng' Shitim, kotoi piik koruiyo ak tiibiigap Moab. 2Kiguur icheek piik tiseiywegap kamuktaikwak; ak ki am piik ak kong'uruukyi kamuktaikwak. 3Konamgei anyun Israel ak Baal ne po Peor, ak konereech Kwandanyo agobo Israel.
4Komwachi Kwandanyo Musa koleenji, “Nem pounigap piik tugul ak ibar icheek eng' tainnyu eng' asiis, si koweigei angeennyi ne koroomen kong'etee Israel.”
5Koleenji Musa kirwoogigap Israel, “Ibar age tugul eng' okweek piikyik che ki konamgei ak Baal ne po Peor.”
6Kingo pata, koip chii age ne po Israel cheptap Midian konyoonji tupchosyekyik eng' taitap Musa ak tuiyet komugul ne po piigap Israel, ye kiriirei icheek eng' kurgeetap emaitap paornateet. 7Ki keer Phineas weeriitap Eleazar, ne weeriitap Aron tisiindet, kiito, ko ng'eet eng' tuiyet, ak konem ng'otit eunnyi. 8Ki isup chiichooto ne po Israel koba oriit, ak kotoor icheek tugul aeng', chiichooto ne po Israel ak kwonyooto, koit moennyi. Yeityo kotononso koroito ne agobo piigap Israel. 9Chuuto che ki pek eng' koroito ko ki piik eliphuusyek tiptem ak ang'wan.
10Komwachi Kwandanyo Musa koleenji,
11“Phineas weeriitap Eleazar, weeriitap Aron tisiindet, ko kaweeksi angeennyi kong'etee piigap Israel, amu ki koama ng'etkong' agobo kagiilennyu eng' kwenungwong', si matun aeng'eem piigap Israel eng' kagiilennyu. 12Nooto anyun imwa: Agoochi ineendet arorutyennyu ne po kaalyeet. 13Konyooru ineendet ak korotiigap kaa che isubu arorutyetap tiseinateet ne po koigeny, amu ki koama ng'etkong' agobo anee ak koyaun kaigaigaet agobo piigap Israel.” a a v13 Arorutyetap tiseinateet ne po koigeny ne po Phineas ak yootetap kaigaet nenyi, koboorchinei taai Jeso, tisiindet ne po koigeny, ne tinyei kagiilet agobo Kwandanyo, ak tiseiywennyi ne ki igoito konyil agenge ak koigeny, ne ipunji kalyet ne po koigeny ne ma imuch tisiindetap chii age tugul konyoor.
14Kainetap chiichooto ne po Israel ne ki par kobooto cheptap Midian, ko ki Shimri weeriitap Salu, pounindetap kootap kwanisyek eng' Simeik. 15Cheptap Midian ne ki par, ko ki kainennyi Kosbi, cheptap Sur, ne ki metitap kootap kwanisyek eng' Midian.
16Komwachi Kwandanyo Musa koleenji,
17“Iyachi Midianik ko uu puunik ak ibar icheek, 18amu puunikwok icheek eng' ng'wanindanywa, ne ki ong'walok eng' ng'olyoondonooto ne po Peor, ak agobo Kosbi, cheptap pounindetap Midian, tupchennywa, ne ki par eng' peetuutap koroito ne agobo Peor.”