ዘሑልቍ 26 FHB Father's Heart Bible™

26 ¹ድሕሪ እቲ መቕሰፍቲ፥ ኣቦና ንሙሴን ንኣልኣዛር ወዲ ኻህን ኣሮንን ከምዙይ በሎም፦

²“ካብ ወዲ ዕስራ ዓመት ንላዕሊ ዘሎ፥ ኣብ ሰራዊት እስራኤል ከገልግል ዝኽእል ዅሉ፥ ንብዘሎ ማሕበር ደቂ እስራኤል በብማይ ቤት ኣቦታቶም ቍፅርዎም።”

³ሙሴን ኣልኣዛር ካህንን ድማ ኣብ ጐላጕል ሞኣብ፥ ኣብ ዮርዳኖስ መንፅር ኢያሪኮ፥ ከምዙይ ኢሎም ተዛረብዎም፦ ⁴“ከምቲ ኣቦና ንሙሴ ዝኣዘዞ፥ ነቲ ኻብ ወዲ ዕስራ ዓመት ንላዕሊ ዘሎ ህዝቢ ቍፅሩ።” እዞም ካብ ምድሪ ግብፂ ዝወፁ ደቂ እስራኤል እዚኣቶም እዮም፦

⁵ሮቤል፥ በዅሪ እስራኤል። ደቂ ሮቤል፦ ካብ ሄኖህ፥ ዓሌት ሄኖሃውያን፤ ካብ ፈሉስ፥ ዓሌት ፈሉሳውያን፥ ⁶ካብ ኣስሮን፥ ዓሌት ኣስሮናውያን፤ ካብ ከርሚ፥ ዓሌት ከርማውያን። ⁷እዚኣቶም ዓሌታት ሮቤላውያን እዮም፤ ዝተቘፀሩ ድማ ኣርብዓን ሰለስተን ሽሕን ሸውዓተ ሚእትን ሰላሳን ነበሩ። ⁸ደቂ ፈሉስ፦ ኤልያብ። ⁹ደቂ ኤልያብ ከዓ ነሙኤልን ዳታንን ኣቤሮንን እዮም። እዚኣቶም እቶም ዳታንን ኣቤሮንን፥ ሹመኛታት እቲ ማሕበር ዝነበሩ፥ ኣብ ማሕበር ቆሬ ንሙሴን ንኣሮንን ዝተቓወምዎም፥ ኣብ ልዕሊ ኣቦና ኸዓ ዝተስኡ እዮም። ¹⁰ምድሪ ኣፋ ኸፈተት፤ ንኣኣቶምን ንቆሬን ድማ ወሓጠቶም፤ እቲ ጉጅለ ምስ ሞተ፥ እቲ ሓዊ ድማ ነቶም ክልተ ሚእትን ሓምሳን ሰባት በልዖም። ንሳቶም ከዓ መጠንቀቕታ ኾኑ። ¹¹ደቂ ቆሬ ግና ኣይሞቱን።

¹²ደቂ ስምኦን በብዓሌቶም፦ ካብ ነሙኤል፥ ዓሌት ነሙኤላውያን፤ ካብ ያሚን፥ ዓሌት ያሚናውያን፤ ካብ ያኪን፥ ዓሌት ያኪናውያን፥ ¹³ካብ ዛራ፥ ዓሌት ዛራውያን፤ ካብ ሳኡል፥ ዓሌት ሳኡላውያን። ¹⁴እዚኣቶም ዓሌታት ስምኦናውያን እዮም፦ ዕስራን ክልተን ሽሕን ክልተ ሚእትን።

¹⁵ደቂ ጋድ በብዓሌቶም፦ ካብ ፅፎን፥ ዓሌት ፅፎናውያን፤ ካብ ሓጊ፥ ዓሌት ሓጋውያን፤ ካብ ሹኒ፥ ዓሌት ሹናውያን፥ ¹⁶ካብ ኦዝኒ፥ ዓሌት ኦዝናውያን፤ ካብ ዔሪ፥ ዓሌት ዔራውያን፤ ¹⁷ካብ ኣሮድ፥ ዓሌት ኣሮዳውያን፤ ካብ ኣርኤሊ፥ ዓሌት ኣርኤላውያን። ¹⁸እዚኣቶም ዓሌታት ደቂ ጋድ እዮም፤ ዝተቘፀሩ ድማ ኣርብዓ ሽሕን ሓሙሽተ ሚእትን ነበሩ።

¹⁹ደቂ ይሁዳ ዔርን ኣውናንን እዮም፤ ዔርን ኣውናንን ግና ኣብ ምድሪ ከነዓን ሞቱ። ²⁰ደቂ ይሁዳ በብዓሌቶም፦ ካብ ሴሎም፥ ዓሌት ሴሎማውያን፤ ካብ ፋሬስ፥ ዓሌት ፋሬሳውያን፤ ካብ ዛራ፥ ዓሌት ዛራውያን። ²¹ደቂ ፋሬስ፦ ካብ ኤስሮም፥ ዓሌት ኤስሮማውያን፤ ካብ ሓሙል፥ ዓሌት ሓሙላውያን። ²²እዚኣቶም ዓሌታት ይሁዳ እዮም፤ ዝተቘፀሩ ድማ ሰብዓን ሽዱሽተን ሽሕን ሓሙሽተ ሚእትን ነበሩ።

²³ደቂ ይሳኮር በብዓሌቶም፦ ካብ ቶላ፥ ዓሌት ቶላውያን፤ ካብ ፉዋ፥ ዓሌት ፉዋውያን፥ ²⁴ካብ ያሱብ፥ ዓሌት ያሱባውያን፤ ካብ ሺምሮን፥ ዓሌት ሺምሮናውያን። ²⁵እዚኣቶም ዓሌታት ይሳኮር እዮም፤ ዝተቘፀሩ ድማ ስሳን ኣርባዕተን ሽሕን ሰለስተ ሚእትን ነበሩ።

²⁶ደቂ ዛብሎን በብዓሌቶም፦ ካብ ሴሬድ፥ ዓሌት ሴሬዳውያን፤ ካብ ኤሎን፥ ዓሌት ኤሎናውያን፤ ካብ ያሕልኤል፥ ዓሌት ያሕልኤላውያን። ²⁷እዚኣቶም ዓሌታት ዛብሎናውያን እዮም፤ ዝተቘፀሩ ድማ ስሳ ሽሕን ሓሙሽተ ሚእትን ነበሩ።

²⁸ደቂ ዮሴፍ በብዓሌቶም ምናሴን ኤፍሬምን እዮም። ²⁹ደቂ ምናሴ፦ ካብ ማኪር፥ ዓሌት ማኪራውያን፤ ማኪር ድማ ንገለዓድ ወለደ፤ ካብ ገለዓድ፥ ዓሌት ገለዓዳውያን። ³⁰ደቂ ገለዓድ፦ ካብ ኢዔዘር፥ ዓሌት ኢዔዘራውያን፤ ካብ ኬሌግ፥ ዓሌት ኬሌጋውያን፥ ³¹ካብ ኣስሪኤል ድማ፥ ዓሌት ኣስሪኤላውያን፤ ካብ ሴኬም ከዓ፥ ዓሌት ሴኬማውያን፤ ³²ካብ ሸሚዳ ድማ፥ ዓሌት ሸሚዳውያን፤ ካብ ኦፌር ከዓ፥ ዓሌት ኦፌራውያን። ³³ሰለጰኣድ ወዲ ኦፌር ድማ ኣጓላት ጥራሕ እምበር ኣወዳት ኣይነበርዎን፤ ስም ኣዋልዱ ኸዓ ማሕላ፥ ኖዓ፥ ሖግላ፥ ሚልካ፥ ቲርፃ እዩ። ³⁴እዚኣቶም ዓሌታት ምናሴ እዮም፤ ዝተቘፀሩ ድማ ሓምሳን ክልተን ሽሕን ሸውዓተ ሚእትን ነበሩ።

³⁵እዚኣቶም ደቂ ኤፍሬም በብዓሌቶም እዮም፦ ካብ ሹተላ፥ ዓሌት ሹተላውያን፤ ካብ ቤከር፥ ዓሌት ቤከራውያን፤ ካብ ታሃን፥ ዓሌት ታሃናውያን። ³⁶ደቂ ሹተላ ድማ እዚኣቶም እዮም፦ ካብ ዔራን፥ ዓሌት ዔራናውያን። ³⁷እዚኣቶም ዓሌታት ደቂ ኤፍሬም እዮም፤ ዝተቘፀሩ ድማ ሰላሳን ክልተን ሽሕን ሓሙሽተ ሚእትን ነበሩ። እዚኣቶም ደቂ ዮሴፍ በብዓሌቶም እዮም።

³⁸ደቂ ብንያም በብዓሌቶም፦ ካብ ቤላ፥ ዓሌት ቤላውያን፤ ካብ ኣስቤል፥ ዓሌት ኣስቤላውያን፤ ካብ ኣኪራም፥ ዓሌት ኣኪራማውያን፥ ³⁹ካብ ሸፉፋም፥ ዓሌት ሸፉፋማውያን፤ ካብ ሑፋም፥ ዓሌት ሑፋማውያን። ⁴⁰ደቂ ቤላ ድማ ኣርድን ናዕማንን እዮም፦ ካብ ኣርድ፥ ዓሌት ኣርዳውያን፤ ካብ ናዕማን፥ ዓሌት ናዕማናውያን። ⁴¹እዚኣቶም ደቂ ብንያም ከከም ዓሌቶም እዮም፤ ቍፅሮም ድማ ኣርብዓን ሓሙሽተን ሽሕን ሽዱሽተ ሚእትን ነበረ።

⁴²ደቂ ዳን ከከም ዓሌቶም እዚኣቶም እዮም፦ ካብ ሱሃም ዓሌት ሱሃማውያን። ዓሌታት ዳን ከከም ዓሌቶም እዚኣቶም እዮም። ⁴³ኵሎም ዓሌታት ሱሃማውያን ቍፅሮም ድማ ሱሳን ኣርባዕተን ሽሕን ኣርባዕተ ሚእትን ነበረ።

⁴⁴ደቂ ኣሴር ከከም ዓሌቶም፦ ካብ ዪምና ዓሌት ዪምናውያን፥ ካብ የስዊ ዓሌት የስዋውያን፥ ካብ በሪዓ ዓሌት በሪዓውያን። ⁴⁵ደቂ በሪዓ፦ ካብ ሔቤር ዓሌት ሔቤራውያን፥ ካብ መልኪኤል ዓሌት መልኪኤላውያን። ⁴⁶ኣሴር ድማ ሴራሕ እትበሃል ጓል ነበረቶ። ⁴⁷እዚኣቶም ዓሌታት ደቂ ኣሴር እዮም፤ ዝተቘፀሩ ድማ ሓምሳን ሰለስተን ሽሕን ኣርባዕተ ሚእትን ነበሩ።

⁴⁸ደቂ ንፍታሌም ከከም ዓሌቶም፦ ካብ ያሕፅኤል ዓሌት ያሕፅኤላውያን፥ ካብ ጉኒ ዓሌት ጉናውያን፥ ⁴⁹ካብ ዮፅር ዓሌት ዮፅራውያን፥ ካብ ሺሌም ዓሌት ሺሌማውያን። ⁵⁰እዚኣቶም ዓሌታት ንፍታሌም እዮም፤ ቍፅሮም ድማ ኣርብዓን ሓሙሽተን ሽሕን ኣርባዕተ ሚእትን ነበረ። ⁵¹ብድምር ዝተቘፀሩ ኵሎም ደቂ እስራኤል ድማ ሽዱሽተ ሚእትን ሓደን ሽሕን ሸውዓተ ሚእትን ሰላሳን ነበሩ።

⁵²ኣቦና ድማ ንሙሴ ኸምዙይ በሎ፦

⁵³“ነዚኣቶም ከም ቍፅሪ ስሞም እታ ምድሪ ርስቲ ኽትኮኖም ክትማቐል እያ። ⁵⁴ነቶም ብዙሓት ብዙሕ ርስቲ ሃብ፥ ነቶም ውሑዳት ድማ ሒደት ርስቲ ሃብ፤ ንነፍሲ ወከፍ ድማ ከም መጠን ቍፅሪ ዝተቘፀርዎ ዕፃ ይወሃብ። ⁵⁵ግናኸ እታ ምድሪ ብዕፃ ክትማቐል እያ፤ ከም ስም ነገድ ኣቦታቶም ድማ ይወርሱ። ⁵⁶ርስቶም ድማ ኣብ መንጎ እቶም ብዙሓትን እቶም ውሑዳትን ብዕፃ ይማቐል።”

⁵⁷እዚኣቶም ድማ ከከም ዓሌቶም ዝተቘፀሩ ሌዋውያን እዮም፦ ዓሌት ጌድሶን ማለት ጌድሶናውያን፥ ዓሌት ቀዓት ማለት ቀዓታውያን፥ ዓሌት ሜራሪ ማለት ሜራራውያን። ⁵⁸ዓሌታት ሌዊ ድማ እዚኣቶም እዮም፦ ዓሌት ሊብናውያን፥ ዓሌት ኬብሮናውያን፥ ዓሌት ማህላውያን፥ ዓሌት ሙሳውያን፥ ዓሌት ቆሬያውያን። ቀዓት ከዓ ንእንበረም ወለደ። ⁵⁹ስም ሰበይቲ እንበረም ድማ ዮካብድ ነበረ፤ ንሳ ጓል ሌዊ ኮይና ኣብ ግብፂ ንሌዊ ዝተወለደት እያ። ንሳ ኸዓ ንእንበረም ንኣሮንን ንሙሴን ንማርያም ሓፍቶምን ወለደትሉ። ⁶⁰ንኣሮን ድማ ናዳብን ኣብዩድን ኣልኣዛርን ኢታምርን ተወለዱሉ። ⁶¹ናዳብን ኣብዩድን ግና ኣብ ቅድሚ ኣቦና ክልኩል ሓዊ ምስ ኣቕረቡ ሞቱ። ⁶²እቶም ዝተቘፀሩ ሌዋውያን ድማ፥ ዕድሚኦም ካብ ሓደ ወርሒ ንላዕሊ ዝኾነ ኵሉ ተባዕታይ፥ ዕስራን ሰለስተን ሽሕ ነበሩ። ንሳቶም ከዓ ኣብ መንጎ ደቂ እስራኤል ርስቲ ኣይተውሃቦምን እሞ፥ ምስ ደቂ እስራኤል ኣይተቘፀሩን።

⁶³እዚኣቶም እቶም ሙሴን ኣልኣዛር ካህንን ኣብ ጐላጕል ሞኣብ፥ ኣብ ፈለግ ዮርዳኖስ፥ መንፅር ኢያሪኮ ዝቘፀርዎም እዮም። ⁶⁴ካብ እዚኣቶም ግና፥ ኣብ ምድረ በዳ ሲና ሙሴን ኣሮን ካህንን ዝቘፀርዎም ሓደ እኳ ኣይነበረን። ⁶⁵ኣቦና ብዛዕባኦም “ኣብ ምድረ በዳ ብሞት ክሞቱ እዮም” ኢሉ ነበረ እሞ፥ ብጀካ ካሌብ ወዲ ዮፎኒን ኢያሱ ወዲ ነዌን፥ ሓደ እኳ ኣይተረፈን።