ዘሑልቍ 27 FHB Father's Heart Bible™

27 ¹ኣጓላት ሰለጰኣድ ድማ ቐረባ። ሰለጰኣድ ከዓ ወዲ ኦፌር እዩ፤ ኦፌር ድማ ወዲ ገለዓድ፥ ገለዓድ ወዲ ማኪር፥ ማኪር ከዓ ወዲ ምናሴ እዩ። ምናሴ ኸዓ ወዲ ዮሴፍ ኮይኑ፥ እዘን ኣጓል ካብ ዓሌት ምናሴ እየን። ስም ኣጓላቱ ድማ እዙይ እዩ፦ ማሕላ፥ ኖዓ፥ ሖግላ፥ ሚልካ፥ ቲርፃ። ²ኣብ ቅድሚ ሙሴን ኣብ ቅድሚ ካህን ኣልኣዛርን ኣብ ቅድሚ እቶም መራሕትን ኵሉ እቲ ማሕበርን፥ ኣብ ኣፍ ደገ መራኸቢ ድንኳን ደው ኢለን ከምዙይ በላ፦ ³“ኣቦና ኣብ ምድረ በዳ ሞተ። ንሱ ግና ኣብ መንጎ እቶም ምስ ሰዓብቲ ቆሬ ኾይኖም ኣብ ልዕሊ ኣቦና ዝተኣከቡ ኣይነበረን፤ ብሓጢኣቱ ደኣ ሞተ እምበር፥ ኣወዳት ኣይነበርዎን። ⁴ወዲ ስለ ዘይነበሮ፥ ስም ኣቦና ኻብ ዓሌቱ ስለ ምንታይ ይጠፍእ? ኣብ መንጎ ኣሕዋት ኣቦና ርስቲ ሃቡና።”

⁵ሙሴ ኸዓ ጕዳየን ኣብ ቅድሚ ኣቦና ኣቕረቦ። ⁶ኣቦና ድማ ንሙሴ ኸምዙይ በሎ፦

⁷“እቲ ኣጓላት ሰለጰኣድ ዝበላ ፅቡቕ እዩ። ኣብ መንጎ ኣሕዋት ኣቦአን ርስቲ ሃበን፤ ርስቲ ኣቦአን ድማ ናብአን ኣመሓላልፍ። ⁸ንደቂ እስራኤል ድማ ከምዙይ ኢልካ ተዛረብ፦ ሓደ ሰብ ወዲ ዘይብሉ እንተ ሞተ፥ ርስቱ ናብ ጓሉ ኣመሓላልፉ። ⁹ጓል ዘይብሉ እንተ ኾይኑ፥ ርስቱ ነሕዋቱ ሃብዎ። ¹⁰ኣሕዋት ዘይብሉ እንተ ኾይኑ፥ ርስቱ ነሕዋት ኣቦኡ ሃብዎ። ¹¹ኣቦኡ ኣሕዋት ዘይብሉ እንተ ኾይኑ፥ ኣብ ዓሌቱ ናብቲ ዝቐርቦ ዘመዱ ርስቱ ሃብዎ፤ ንሱ ኸዓ ይውረሶ። እዙይ ከምቲ ኣቦና ንሙሴ ዝኣዘዞ፥ ንደቂ እስራኤል ስርዓት ፍርዲ እዩ።”

ሙሴ ነታ ምድሪ ይርኢ

¹²ኣቦና ድማ ንሙሴ ኸምዙይ በሎ፦ “ናብ እምባ ዓብሪም ደይብ እሞ፥ ነታ ንደቂ እስራኤል ዝሃብክዎም ምድሪ ርኣያ። ¹³ምስ ረአኻያ ድማ፥ ከምቲ ሓውካ ኣሮን ዝተኣከበ፥ ንስኻውን ናብ ህዝብኻ ክትእከብ ኢኻ፤ ¹⁴ኣብ ምድረ በዳ ፂን እቲ ማሕበር ኣብ ዝተቛየቐሉ ጊዜ፥ ኣብ ቅድሚ ኣዒንቶም ኣብቲ ማይ ቅዱስ ክትገብሩኒ ክነሱ፥ ንትእዛዘይ ስለ ዝዓመፅኩም እዩ፤ እዙይ ማይ መሪባ ቃዴስ፥ ኣብ ምድረ በዳ ፂን እዩ።”

¹⁵ሙሴ ድማ ንኣቦና ኸምዙይ ኢሉ ተዛረቦ፦ ¹⁶“ኣቦ መናፍስቲ ኵሉ ስጋ ኣብ ልዕሊ እዝ ማሕበር ሓደ ሰብ ይሹም፥ ¹⁷ኣብ ቅድሚኦም ዝወፅእ ኣብ ቅድሚኦም ዝኣቱ፥ ዘውፅኦምን ዘእትዎምን ሰብ፥ ማሕበር ኣቦና ኸም ጓሳ ዘይብለን ኣባጊዕ ምእንቲ ከይኸውን።”

¹⁸ኣቦና ድማ ንሙሴ ኸምዙይ በሎ፦ “መንፈስ ኣቦና ዘለዎ ሰብ ዝኾነ፥ ንኢያሱ ወዲ ነዌ ውሰድ እሞ፥ ኢድካ ኣብ ልዕሊኡ ኣንብር። ¹⁹ኣብ ቅድሚ ካህን ኣልኣዛርን ኣብ ቅድሚ ኵሉ እቲ ማሕበርን ኣቕርቦ፤ ኣብ ቅድሚ ኣዒንቶም ድማ ኣዝዞ። ²⁰ኵሉ ማሕበር ደቂ እስራኤል ምእንቲ ኽእዘዝዎ፥ ካብ ስልጣንካ ገለ ሃቦ። ²¹ንሱ ኣብ ቅድሚ ካህን ኣልኣዛር ደው ይብል፤ ንሱ ኸዓ ኣብ ቅድሚ ኣቦና ብፍርዲ ኡሪም ይጥይቐሉ። በቃል ኣልኣዛር ይወፁ፥ በቃሉ ድማ ይኣትዉ፤ ንሱን ኵሎም እቶም ምስኡ ዘለዉ ደቂ እስራኤልን ኵሉ እቲ ማሕበርን።”

²²ሙሴ ድማ ከምቲ ኣቦና ዝኣዘዞ ገበረ፤ ንኢያሱ ወሲዱ፥ ኣብ ቅድሚ ካህን ኣልኣዛርን ኣብ ቅድሚ ኵሉ እቲ ማሕበርን ኣቖሞ። ²³ኣእዳዉ ኣብ ልዕሊኡ ኣንቢሩ ድማ፥ ከምቲ ኣቦና ብሙሴ ዝተዛረቦ ኣዘዞ።