Isaiah 11

11 ¹Jessewui angunrum eina aton akha shokra; awui angayung eina aphāng akhana athei matheira. ^a a v1 Paulna Jishuli Jessewui angayung, awuili yurbingna chihān kahaia da phokmi — Rom 15:12; Rev 5:5; Rev 22:16. ²Ithumwui Avāwui Manglā awuitungli ngasāmra; Manglā chi thangkhamei kala theishingkakhuiwui Manglā, hāngkachithei kala pangshapwui Manglā, theikakhui kala ithumwui Avāli khangacheewui Manglāna, ³kala ana ithumwui Avāli khangachee chili ringphāra. Ana awui mikna kathei eina bichar masāmara, lah awui khanāna kashā eina khangarān masāmara, ⁴kha khamashung khangarong eina ana kachāma mili bichar sāra, kala okathuiwui khanimabingwui vang mashun eina khangarān sāra. Ana akhamorwui lijei eina okathui shaora, kala awui morchaiwui khaksui eina makhayāli sāthatra. ⁵Khamashung khangarong chi awui kashānwui shānneira̱ sāra, kala ning katong chi awui shaksha̱wui shānneira̱ sāra. ⁶Kharāng eina yaonao ngasoda pamra, kuirāng eina chigat ngasoda chifara, seinao kala kazingkha̱ kala asā kakākā ngaraichāhaora—kala naoshinao kateo akhana athumli thānvāra. ⁷Sei eina singom phāshaira, athumwui anaobing ngaraichāda chifara, kala kazingkha̱na mukkā thāda lanji shaira. ⁸Na̱ zākasā naona phara̱wui akhurtungli ngareora, kala na̱ reikahai naona phara̱ kashewui khurli awui pāng pānra. ⁹Iwui kathara kaphung katongali athumna sakazala kashimānla masāmara, kaja tara̱na shamadru khaluiphin thāda okathui chi ithumwui Avāwui theikakhui eina pemra.

¹⁰Chitharan Jessewui angayung Jishu chi yurbingwui vang philān sāda nganingra; yurbingna ali phāra, kala awui ngasām khavaipam chi tekhamatei ngasāra. ^b b v10 Paulna hi tui chi Jishuwui vang hoi — Jessewui ara̱-azā, yurbingli mungkhavai kakarthui, awuili Gentilebingna chihānra (Romans 15:12). ¹¹Chitharan Assyriali, Egyptli, Pathrosli, Cushli, Elamli, Shinarli, Hamathli, kala shamadruwui yikuirambingli khalei awui mibingwui shākkahaibingli khuithui khavai khamunga Avāna awui pāng kakhanelila khāngra. ¹²Ana yurbingwui vang philān akha khāngra kala Israelwui raithā kahaibingli kazipkhuira; okathuiwui achikun matiwui eina ana Judahwui ngapha̱ kahai mibingli rākazipra. ¹³Ephraimwui yuikashi shimānhaora, kala Judahwui yangkashebing chi katatmihaora; Ephraimna Judahli mayuishimara, kala Judahna Ephraimli yangkashe masāmara. ¹⁴Anina zingtunshong Philistinenaobingwui kaphungpheili yongzatra; kala ngaraichāda anina zingshoshongwui mibingli ngaponzatra. Anina Edom kala Moabli akhuira, kala Ammonnaobingna aniwui rao sāra. ¹⁵Ithumwui Avāna Egyptwui shamadruwui pāngthei sāshimitserhaora; sākhamatai siphan eina ana Euphrates kongtungli awui pāng khāngra. Mibingna pheihop tonglaga kānkā khavai ana chi sākhailaga kong shini ngasakra. ^c c v15 Egyptwui shamadru chi Ashee Shamadruna; awui atungshongwui pāngtheibingli Suez Gulf kala Aqaba Gulf ngasoda lei. ¹⁶Egypt ngaleiwui eina athumna katā zimiksholi Israelwui vang chānrei akha khalei thāda, Assyriali khalei awui mibingwui shākkahaiwui vang chānrei akha leira.