Wani Toho Daga Kututturen Yesse
Daga kututturen da aka sare, tohon ya tsiro, wanda ba ya shari'a bisa ga abin da idanunsa suka gani amma da adalci ga masu tawali'u. Mafarauci da abin farauta suna kwanciya tare, yaro kuma yana wasa lafiya a ramin maciji, domin duniya ta cika da sanin Ubanmu.
11 1Wani toho zai fito daga kututturen Yesse; daga saiwoyinsa wani Reshe zai ba da 'ya'ya. a a v1 Bulus ya kira Yesu saiwar Yesse wadda al'ummai suke sa begensu gare ta — Rom 15:12; Ru. Yoh. 5:5; Ru. Yoh. 22:16. 2Ruhun Ubanmu zai sauka a kansa—Ruhun hikima da fahimi, Ruhun shawara da iko, Ruhun sani da tsoron Ubanmu, 3zai kuma ji daɗin tsoron Ubanmu. Ba zai yi shari'a bisa ga abin da idanunsa suke gani ba, ba kuwa zai yanke hukunci bisa ga abin da kunnuwansa suke ji ba, 4amma da adalci zai yi wa matalauta shari'a, yă kuma yanke hukunci da gaskiya domin masu tawali'u na duniya. Zai bugi duniya da sandar bakinsa, da kuma numfashin leɓunansa zai kashe mugaye. 5Adalci zai zama ɗamara a ƙugunsa, aminci kuwa zai zama abin ɗamara a ƙwankwasonsa. 6Kyarkeci zai zauna tare da ɗan rago, damisa kuwa za tă kwanta tare da akuya, maraƙi da zaki da dabba mai ƙiba za su kasance tare— ƙaramin yaro kuma zai yi musu jagora. 7Saniya da beyar za su yi kiwo, 'ya'yansu kuma za su kwanta tare, zaki kuma zai ci ciyawa kamar sa. 8Jariri mai shan nono zai yi wasa a kan ramin gamsheƙa, yaron da aka yaye kuma zai sa hannunsa a cikin kogon maciji mai dafi. 9Ba za su yi lahani ko su yi hallaka a kan dukan dutsena mai tsarki ba, gama duniya za tă cika da sanin Ubanmu kamar yadda ruwaye suke rufe teku.
10A wannan rana saiwar Yesse za tă tsaya kamar tuta ga mutane; al'ummai za su neme shi, wurin hutawarsa zai kuwa zama mai ɗaukaka. b b v10 Bulus ya ambaci wannan aya game da Yesu — saiwar Yesse wanda yake tashi domin yă yi mulkin al'ummai, wanda Al'ummai suke sa begensu gare shi (Romawa 15:12). 11A wannan rana Uba Maɗaukaki zai sāke miƙa hannunsa a karo na biyu domin yă dawo da raguwar mutanensa da suka ragu—daga Assuriya, daga Masar, daga Fatros, daga Kush, daga Elam, daga Shinar, daga Hamat, da kuma daga tsibiran teku. 12Zai ɗaga tuta ga al'ummai, yă kuma tattara waɗanda aka kora na Isra'ila; zai tattara mutanen Yahuda da suka warwatse daga kusurwoyi huɗu na duniya. 13Kishin Ifraimu zai ɓace, za a kuma datse abokan gāban Yahuda; Ifraimu ba zai yi kishin Yahuda ba, Yahuda kuma ba zai nuna gāba ga Ifraimu ba. 14Za su sheƙo a kan gangaren Filistiyawa wajen yamma; tare za su washe mutanen gabas. Za su ƙwace Edom da Mowab, Ammonawa kuma za su yi musu biyayya. 15Ubanmu zai hallaka gaba ɗaya reshen Tekun Masar; da iska mai zafi zai kaɗa hannunsa a kan Kogin Yuferatis. Zai raba shi rafuffuka bakwai domin mutane su iya ƙetarewa da takalma. c c v15 Tekun Masar shi ne Jar Teku; rassansa na arewa sun haɗa da Mashigin Suwez da Mashigin Aƙaba. 16Za a sami babbar hanya domin raguwar mutanensa da suka rage a Assuriya, kamar yadda ya kasance ga Isra'ila a ranar da suka fito daga ƙasar Masar.