Peter na Balumsat Bacham Lang Hiak Nge
Baze maknu bachu thangnu rwan khatle kiamrai natnu rwan khou cheksinnu, khatle Pukraangba han lat lang ngaakka phaangkriang bi lian thou lang kounu gaye.
Ani Pa na chongkhak heiya bi kabia nge 17
1 1Jisu Christa om chwanlaang tonu khatle chonglang Simon Peter na, ani Rikrwang khatle Kanthangnupa Jisu Christa, Bating ririak senu paan bina ani om balumsat danga baman kungnu balumsat lousunu rwan khou hiak nge: 2ani Pa khatle ani Pukraangba Jisu ding theinu paan bina nani khou phaangkriang khatle dai bazaangnu inku thounu to ding ngo.
Pa om Chaang bi Pemnu Rwan
3Bating lwat liannu khatle kasanu paan bina ani khou kounu Maan ding theinu paan bina, ring ongnu khatle Rikrwang ding kachinu lang bi ani ding brum bing ga Baom ngam liannuna pi thang rwe. 4Hei bing paan bina Maanna baman kungnu khatle bakung toga liannu chongren bing ga ani khou pi thang rwe, atiga bahak bathainu bina hung dingnu talei ram om tanaatnu bina dwak swakluga, nanina Rikrwang chaang bi pem lang nge. 5Atibriakpina, balang bing bi khaangluga, nani balumsat chung bi kasanu hap thang ngo, khatle kasanu chung bi theinu; 6theinu chung bi bazan ding karaknu; bazan ding karaknu chung bi khaang theinu; khaang theinu chung bi Rikrwang ding kachinu, 7Rikrwang ding kachinu chung bi unao kriang kalenu; unao kriang kalenu chung bi kriangnu. 8Hei bing nani khou amluga inku thou ongme dabe, ani Pukraangba Jisu Christa ding theinu bi bathaang maaknu khatle bakraa kraa maknu to mak lang nani ding pi ngaak thanglune. 9Tudannu hei bing lousu maknu maan ga mik chonu khatle nai bingza mu thei maknu nunne, baom thou damnu noh bina pi bathiang thangnu ding banim sat rwe. 10Atibriakpina, unao rwan ga, nani kounu khatle kathang swak thangnu ding pi tip thang lang karammo; hei bing ga nanina to dabe, khatchale son laye. 11Hadanga ani Pukraangba khatle Kanthangnupa Jisu Christa om krwang talei, khwa seiga amnu haba bi tok lang nani khou khopsaga pi thanglune.
12Atibriakpina nanina hei bing ga theiluga atun lousunu bazenu bi bachak ongme dabe le, eina bakaan thin hei bing ga nani khou pi baningsu thanglune. 13Ei hei pwan in bi ong basaan, baningsunu paan bina nani khou chok thang lang ei kasanu to ye diga baning nge, a a v13 Peter na baom pum ga ‘pwan in’ diga koue—haga rakanga louta dingnu bakaansemna am dingnu riak gaye (2 Corinthians 5:1–4 phaang ngo). 14ani Pukraangba Jisu Christa na akhou pi mu thangnu danga, eina apwan in ga rakanga louta dingnuwe dinu thei nge. 15Ei loi damnu nung bani, nanina bakaan thin hei bing ga baningsu ngam lang eina le karamlune.
16Balangbe ani Pukraangba Jisu Christa om ngam khatle hung dingnu ga nani khou pi thei thang langna, anina ningting kutthiam paan bina tannu pwaknu meiri ding zei to make, atiyeda anina Bating lwat liannu ga mikna mu ngaaknu nunne.
17Lwat lian kataknu lana Bakhou tanu khwan khat hungnu kaan bi, Maanna ani Pa khouna takung tazei khatle lwat liannu ga lou thang rwe: “Heiya Asa Kapaisa, Eina kriangnu maan gaye; Ei Balu chung bi karo tak rwe.” b b v17 Heiba bing ga takung la Pa om bazan chong bing gaye—Maanna Basa Kapaisa chung bi pem takka Maan ding kriangnu diga koue, Peter, James khatle John na Jisu bachaang kathan thangnu kaan bi ngaisunu khwan bachamme.
18Anina bathiangnu takung la Maan le diga ong briakpina, tambaan lana hungnu hei khwan ga anina bahakna ngaisu rwe.
19Atiga anina chongdip chong ga le amme, haga pi tip thangdamnu danga rwe. Zingnu riak pi baan ongnu lampui danga, khwa louthwan swakluga nani sung bi louthwan insi hungnu basaan, nanina haba ding ngaisunu ga kasanuwe. 20Balang bing lianna hei ga nanina thei langnuwe, Bathiangnu chongdip om rin chaak thangnu chong khatchale mi baom bazan chong han swaknu bina hung make. 21Balangbe rin chaak thangnu chong khatchale misa om nwamnu bina hung mak ngaake, atiyeda Katha Bathiangnuna kapaangnu danga mi nunna ani Pa khouna rin ngaake.